Ntrŏng pah kan rnoi mpôl đê̆ n’hanh mât chăm  nău rêh ƀon lan rnoi mpôl đê̆ lah nău dơn kan khlay, tâm bah ri aơ nơh,  n’gor Sóc Trăng hŏ rgum ntrôl ngăch nău an tĭng ƀư ăp trong nchrăp kan…tâm bôk  nău kan gưl neh dak hun hao wăng sa-  rêh jêng kon nuĭh nkual ƀon lan rnoi mpôl đê̆ n’hanh mpeh yôk yang, lvang năm 2021- 2030, tâm nê, geh nău ntop kơl rgâl nău kan an ƀon lan rnoi mpôl đê̆, ntơm bah nê hŏ tĭng kơn kơl an rnăk ach o geh tay ndơ ma wăng sa, ntop tay nău geh, tĭng kơn nsan hao gay đăp mpăn nău rêh.  

Lah rnăk Khmer ach o, bar hê ur sai yuh Huỳnh Thị Cẩm Tú n’hanh nô Thạch Thường ta ấp Vĩnh Thanh, xã Vĩnh Quới tâm jă hao Bình Dương ƀư công nhân. Rnôk nuh srê Covid-19 ntoh luh năm 2021, ur sai plơ̆ sĭt ƀon tơm, me bơ̆ an du blah neh ƀư jay gŭ êng, hăn kan thuê bu joi nău rêh. Ăp năm  aơ mô geh ndơ ma rsong hăn jêng nău kan wăng sa mâp dŭt âk jêr jŏt. Yor kơt nê̆, rnôk dơi sơch ntop kơl 10 rkeh prăk rgâl nău kan, bar hê ur sai hŏ rvăt ndeh honda nkre ƀư  ndeh rsong hăn, nkre rdeng play hăn tăch. Yuh Huỳnh Thị Cẩm Tú, an gĭt, nơm geh bôk ndeh ma  nău  tăch rgâl bah rnăk jêng dơh ngăch lơn:

Rnăk wâl nsĭt geh wăng sa mô đăp mpăn, mô geh tơm prăk, mô geh ndeh rsong hăn tăch rgâl, yơn hôm dơi ngih dak ntop kơl ri geh rvăt dơi du bôk ndeh gay rdeng ndơ hăn tăch, aƀaơ rgâl jêng ƀư nău kan tăch rgâl dĭl. Du khay joi geh 7-8 rkeh prăk, tăch rpŭng kai, lah lĕ khay rpŭng ri rgâl tăch play êng ƀa ƀă, kơt bum silat, play vú sữa, play ƀek. Rnăk gâp dŭt lah uĕh Đảng, ngih dak hŏ ntop kơl an hên du rnoh prăk gay tăch rgâl đŏng, 2 hê ur sai mbra nsrôih gay klaih rlău dơi ach o, gâp mpŏng nău rêh rgâl kloh lơn.

Hôm wa Sơn Thị Lùng, ta ấp Vĩnh Thành, xã Vĩnh Quới, đah rnoh prăk rlău 10 rkeh prăk dơi ntop kơl bah  bôk  nău kan gưl neh dak hun hao  wăng sa- rêh jêng kon nuĭh ƀon lan rnoi mpôl đê̆, păng hŏ rvăt 1 mblâm sŭr me ntil, nkra tay ndrung sŭr ơm n’hanh rvăt ndơ sa an  sŭr tâm ăp khay bôk năp. Rvăt tay neh mir bah kơi jay, păng tăm tay biăp gay ƀư ndơ sa an sŭr. Lôch bơi 4 khay mât, păng nchrăp tăch sŭr deh bôk  năp, đah 13 mblâm  kon sŭr, nchrăp nsĭt geh rlău 20 rkeh prăk. 

Dơi ntop kơl kơt nê gâp saơ dŭt âk. Aƀaơ sŭr hŏ deh rlău 10 mblâm, n’hanh gâp tăch lĕ du me dĭl. Gâp mât ndê ngăn, tơm prăk nsĭt geh hŏ kơl rnăk wâl gâp đăp mpăn.

Nău ntop kơl joi geh trong wăng sa, rgâl nău kan an ƀon lan rnoi mpôl đê̆ ăp năm  mhe aơ dơi thị xã Ngã Năm, n’gor Sóc Trăng uănh khlay tĭng ƀư n’hanh nsĭt geh âk nău dơi uĕh. Tâm bah ri aơ nơh, thị xã hŏ rgum ntrôl ngăch nău an ƀư  ăp trong nchrăp kan, nău kan jê̆…tâm bôk nău kan gưl neh dak  hun hao wăng sa- rêh jêng kon nuĭh tâm nkual ƀon lan rnoi mpôl đê̆ n’hanh mpeh yôk yang,lvang năm 2021- 2030, tâm nê, nău ntop kơl rgâl nău kan an ƀon lan rnoi mpôl đê̆, tĭng kơn kơl rnăk ach o ƀon lan rnoi mpôl đê̆ geh tay ndơ wăng sa, ntop n’hao tay nău geh, tĭng kơn nsan hao gay đăp mpăn nău rêh.

Tât aƀaơ, bah bôk nău kan ntop kơl neh gŭ ta 1 rnăk đah rnoh prăk 44 rkeh prăk; ntop kơl jay gŭ ta  35 rnăk đah rnoh prăk rlău 1,5 rmen prăk; ntop kơl rgâl nău kan 87 rnăk đah rnoh prăk rlău 767 rkeh prăk; ntop kơl ƀư trong dak dŏng 9 rnăk đah rnoh prăk rlău 27 rkeh prăk. Rlău ma nê, n’gâng kan ta ntŭk hôm ƀư 2 trong ntĭt leo ntop kơl tuch tăm, âk trong kan wăng sa nsum mpôl đŏng, nê lah trong leo mâp kik xiêm Pháp, ka nkhon vèo ta ấp Vĩnh Thuận, xã Vĩnh Quới n’hanh trong leo mât kik xiêm Pháp ta ấp Long Thành, xã Tân Long đah rnoh prăk rlău 343 rkeh prăk n’hanh mbra dơi an ƀư tay, pơk hvi tâm năm 2024. Wa Huỳnh Văn Lơ, Kruanh Jrô kan Lao động, Thương binh n’hanh xã hội thị xã Ngã Năm an gĭt:

Nsŏng kơl tay an UBND thị xã, an ƀư ăp tŏng trong nchrăp, n’hanh tĭng ƀư ăp tŏng trong kơl tĭng bôk nău kan n’hŭch ach o jŏ jong, bôk nău kan gưl neh dak hun hao wăng sa- rêh jêng kon nuĭh nkual ƀon lan rnoi mpôl đê̆ n’hanh mpeh yôk yang, lơn  âk rgum tâm trong rgâl nău kan, ntĭm nti nău kan an nuĭh kan tâm thôn ƀon gay nuĭh kan tâm thôn ƀon geh hăr blău ti kan râng nău kan nsĭt tay nău geh wăng sa đăp mpăn hun hao wăng sa rnăk wâl.

Trong nchrăp nkra mpeh nău mô tŏng neh gŭ, neh tuch tăm rgâl nău kan n’hanh dak dŏng geh nkô̆ khlay dŭt mha êng, gay nta trong dơh an ăp rnăk Khmer ach o dơi tât, rgâl nău kan, n’hao geh âk nău rêh, geh ăp tŏng ndơ dŏng rêh. Yor kơt nê̆, pah kan an ƀư dôl dơi n’gor Sóc Trăng lah nsum n’hanh thị xã Ngã Năm lah êng rgum tĭng ƀư, đăp mpăn di mpeh nuĭh kơl, ban ngăch gay ăp rnăk geh ndơ ma  nsan hao, rgop rgâl muh măt săk ntô, nău rêh - wăng sa nkual ƀon lan rnoi mpôl đê̆ tâm let năp tay./.