Ôi ntri 7/8, Rmôt Biên tập bah Tiểu ban wăng sa – rêh jêng kon nuĭh ƀư rơh hop rgum lam lĕ rngôch gay rgop an trong nchrăp siƀŭt mbơh uănh năl 5 năm tĭng ƀư trong nchrăp hun hao wăng sa- rêh jêng kon nuĭh 10 năm 2021 - 2030, trong rƀŏng, nău dơn kan hun hao wăng sa- rêh jêng kon nuĭh 5 năm 2026 - 2030 (way kuăl lah siƀŭt mbơh wăng sa  - rêh jêng kon nuĭh). 

Lah ntơm pơk rơh hop, Bộ trưởng Bộ Kế hoạch n’hanh Đầu tư, Kruanh rmôt Biên tập Nguyễn Chí Dũng an gĭt, rnôk rdâk njêng trong nchrăp siƀŭt mbơh wăng sa – rêh jêng kon nuĭh an ƀư ndăn ngăch,  răp  jăp lôch tâm nchră tâl 9 Ban Chấp hành Trung ương Đảng. Tĭng ƀư nău rđău đă bah Thủ tướng Chính phủ, Kruanh Tiểu ban wăng sa – rêh jêng kon nuĭh, Rmôt Biên tập hŏ ƀư tâm pă kloh nău dơn kan na nê̆ bah ăp nuĭh tâm rmôt râng rdâk njêng siƀŭt mbơh nsing ta đề cương dơi Tâm nchră Trung ương 9 uănh an dŏng. Trong nchrăp siƀŭt mbơh dơi rdâk njêng, wat jêh tĭng kơn, geh nău tâm rđĭl, nsing tâm ăp trong nchrăp bah siƀŭt mbơh chính trị nchih nkoch năn ngăch ăp nkô̆, đăp mpăn dơn  ngoăy.