Nău rhơn bâh ăp nuĭh ƀon lan kan lŏ mir tăm ba, bâh ăp nuĭh tăm sầu riêng, biăp bum play tâm năm 2023 lĕ an saơ nău ntoh ang dŭt rhơn tâm nău pah kan jan sa n’hanh tăch ndơ an dak bah dih ndơ tuch tăm rnôk tăch an dak bah dih phe n’hanh biăp play geh dŭt âk.

Năm 2023, n’gâng kan tuch tăm hôm nha geh mât nău hun hao âk, hun hao lĕ rngôch, đah rnoh hun hao GDP lam n’gâng kan geh 3,8%, dŭt âk tâm âk năm dăch aơ. Lĕ rnoh prăk geh tăch an dak bah dih ndơ tuch tăm tui ka mât ta rnoh âk, rlău 53 rmen đolar, geh rnoh dŭt âk 12,07 rmen đolar, hao 43,7%. groi kruanh n’gâng kan tuch tăm mât rong n’hanh hun hao ƀon lan Phùng Đức Riến uănh năl, tuch tăm geh lah tay na nê̆ nău khlăy, lah nău kơl kan bâh n’gâng kan wăng sa, mât đăp mpăn rnă njrăng ndơ sông sa, ăp nău kan uănh năl têh bâh n’gâng kan wăng sa n’hanh ntop mât đăp mpăn wăng sa têh.

 Tâm rnôk nău dŭt jêr jŏt, yơn đah nău nsum soan bâh lĕ ntŭk rêh jêng, bâh ăp ntŭk kan ndrel đah n’gâng kan tuch tăm, mpôl he lĕ sĭt tât nău kan geh dŭt âk nău kan khlăy. Du năm nsrôih gay ma he sĭt tât nău dơi ăp nkô̆ mpŏng kan khlăy, geh chính phủ n’hanh trung ương uănh rnê âk, hôm nha lha na nê̆ nău kơl kan bâh n’gâng kan wăng sa, ntop khlăy ta n’gâng kan wăng sa neh dak tâm rnôk geh nău jêr jŏt.

Năm 2023 lah năm geh mpơl ueh bâh n’gâng kan phe ba rnôk geh tăch phe an dak bah dih geh klâp ma 8,2rkeh tấn đah rnoh prăk geh tăch an dak bah dih bơi tât 4,8 rmen đolar, hao 40% đah năm ba năp, ta rnoh dŭt âk tâm bar pe jât năm ba năp. Wa Nguyễn Như Cường, kruanh n’gâng kan tuch tăm an gĭt, nchroh năm 2024, nău kan ta ntŭk tăch rgâl phe ba hômk nha ŭch ta rnoh âk, n’gâng kan tuch tăm geh ntĭm đă n’hao tay nău pah kan jan sa, ngăn lah ba geh ueh, gay ma mât đăp mpăn tăch an dak bah dih an nâp nâl.

 Mpeh nău tăch phe ba an dak bah dih bâh Việt Nam tâm năm 2024 tĭng nău nchrăp bâh n’gâng kan tuch tăm mât rong n’hanh hun hao ƀon lan ndrel đah ăp ntŭk srih tăm klâp ma 7,1 rkeh ha mô lah ba dâng du đê̆, tâm nĕ hôm nha mât đăp mpăn rnoh 43 rkeh tấn. Đah kơt nĕ rĭ he mbra dơi geh mât đăp mpăn ndơ sông sa ta ăp rơh tâm ăp nău tât. N’hanh he hôm nha geh mât đăp mpăn tăch phe tâm năm 2023.

Năm 2024, nchroh nău wăng sa geh tâm rdâng tay đah âk nău jêr jŏt, ntul rlong, kơt lah: rnoh ndơ dng bôk năp kơl tâm nău pah kan tuch tăm ta rnoyh hao khlăy, nuh srê ta tơm tăm, ntil rlong geh âk nău ntoh luh, mih dak buk geh tât dŭt âk, duh phang hô lơn, mbra geh nău kro ntang, mô tŏng dak dŭt âk yor nău tât bâh El Nino..ngăn lah nău tât bâh rơh tâm lơh, uh ah ta lam ntur neh ƀư an ntŭk tăch rgâl jur hao ndal. Wa Nguyễn Văn Việt, kruanh n’gâng kan kế hoạch, n’gâng kan tuch tăm mât rong n’hanh hun hao ƀon lan an gĭt, n’gâng kan tuch tăm nsrôih rlet rlău, geh âk nău mpŏng kan nsrôih an geh ƀư.

 Tât năm 2024, mpôl hên geh saơ lah n’gâng kan tuch tăm rĭ geh 3 nău jêr ngăn, tal ngoăy lah ntŭk tăch rgâl, tal 2 lah trôk nar, tal 3 lah mô dơi njrăng nuh srê. Mpeh ntŭk tăch rgâl mpôl hêhn mbra nsrôih, nuh srê hên mbra dơi săm yơn lah trôk nar lah nău jêr. Mpeh nău mpŏng kan năm 2024, gay ma geh nău ngăch hun hao lam n’gâng kan 3.0-3.5%. lĕ rnoh prăk tăch ndơ an dak bah dih ndơ tuch tặm tui ka klâp ma 54-55 rmen đolar. Rnoh xã tâm di nkual ƀon lan mhe geh 80%.

Bâh nău tăch ndơ an dak bah dih geh njoat hun hao âk, hao rlău 70% đah năm 2022, geh bơi tât 5,7 rmen đolar, nău leo pah kan jan sa mât đăp mpăn tâm di ueh, uănh năl nău tât ta tơm tăm n’hanh n’hao mbơh tăch rgâl đah ăp ntŭk tăch rgâl geh n’gâng kan biăp play uănh khlăy. Nău rhơn bôk năm 2024 rnôk ăp ntil ndơ kơt sầu riêng an nđik, play đung rêh, bơ, play bŭng.tât tay mbra geh an tăch ta dak bah dih ta Trung Quốc geh knơm âk mbra kơl an n’gâng kan biăp play hao tay dŭt đê̆ lah 1 rmen đolar ta năm 2024.Nău nĕ an saơ, mô dơn rgâl bâh nău mĭn pah kan jan sa tât nău wăng sa, n’gâng kan tuch tăm hôm nha geh mpŏng tât nău pah kan ueh nđir n’hanh nâp nâl. Aơ lah nkô̆ mpŏng bâh nău wăng sa tâm năm 2024 n’hanh ăp năm let năp tay, gay ma ƀư ueh trong kan hun hao n’hanh Nghị quyết Trung ương gay ma rdâk njêng nkual tuch tăm ueh mhe, nkual ƀon lan mhe, ƀon lan tuch tăm gĭt blău.