“Việt Nam lĕ nchrăp lor n’hanh dŭt n’hâm nchrăp ăp nău khlay gay tâm di nău ntrŭnh mpeh nău mât uănh nglăp rwăt n’hanh tăch n’gluh ăp ndơ mô ƀư roh bri n’hanh hŭch bri bah Liên minh châu Âu (kuăl lah Nău ntrŭnh nking n’gang phah bri)”. Aơ lah nău năl bah ntoh măt Mpôl ntoh măt Liên minh châu Âu ta Việt Nam tâm rgum nchră “Tâm rgâl kỹ thuật mpeh Nău ntrŭnh nking n’gang phah bri n’hanh ăp trong pă manh mô ƀư phah bri, roh bri ta Việt Nam” ƀư lơ 12/7, ta Dak Lak.

Rgum nchră yor N’gâng kan tuch tăm mât rong n’hanh hun hao ƀon tâm rgop đah Mpôl ntoh măt Liên minh châu Âu ta Việt Nam ƀư. Aơ lah ngoăy tâm âk nău ƀư dŭt n’hâm bah Việt Nam tâm trong rƀŏng nkra njêng, dŏng uĕh nđĭr nâp nâl. Ta rgum nchră, ntoh măt Mpôl ntoh măt liên minh châu Âu ta Việt Nam, ăp rmôt kan ndrel dak bah dih, ăp ntŭk kan mpeh tâm n’gâng kan, nău kan trung ương, kruanh 5 n’gor Tây Nguyên (Dak Lak, Lâm Đồng, Gia Lai, Dak Nông, Kon Tum) ndrel ntoh măt ăp hiệp hội nău kan ndoh ndơ, ăp doanh nghiệp cà phê, cao su, si n’hanh ndơ bah si lĕ tâm rgâl mbơh nău mpeh trong ƀư, ăp trong mkra n’hanh ndoh ndơ ntop kơl ƀư tĭng nău ntrŭnh nking n’gang phah bri n’hanh ăp trong pă manh mô ƀư phah bri, roh bri ta Việt Nam.