VOV4.M’nông: Tâm kêng măng 27/4, ta nâm nău ƀư tơm bah Kruanh Quốc hội Vương Đình Huệ, Ủy ban Thường vụ Quốc hội hŏ n'hơr ti ŭch nău dăn đă bah Chính phủ, an dŏng 12, 1 rbăn rmen prăk mpêt nkrem dŏng bah ngân sách trung ương gay rvăt vaccine njrăng n'gang nuh srê Covid-19. Nău dŏng tơm prăk dja gay rvăt vaccine njrăng n'gang nuh srê Covid-19 lah nău khlay n'hanh jăch ndăn, đăp mpăn tĭng ƀư trong kơl lam rêh jêng kon nuĭh tĭng di quy định ta Luật ngân sách ngih dak. Chính phủ hŏ kơp nđăp ăp tơm prăk n'hanh rnoh dŏng tâm di n'hanh geh ntŭk nsing. Yơn lah, Ủy ban Thường vụ Quốc hội njrăng đă ntop kơl an ăp n'gor jêr jŏt tâm pă tâm ban prăk ngân sách tâm di đah rnoh ngăch rvăt n'hanh dŏng vaccine đŏng. Lah ta rnôk ntơm pơk rơh hop tâl 55, Kruanh Quốc hội Vương Đình Huệ dăn đă ăp nhih pah kan nchrăp na nê̆ ăp nău mbơh ta rơh hop bôk năp, Quốc hội khóa 15. Nchrăp rơh hop bôk năp, Quốc hội khóa 15 pah kan tâm 11 nar; ntơm pơk tâm nar 20-7 n'hanh lôch jêh tâm nar 03-8. Ta rơh hop dja, Quốc hội mbra ntêm âk mông nar, mĭn uănh n'glêh an mpeh pah kan nuĭh kan./.

Nuĭh rblang: Điểu Thân