VOV4.Mnông – Nthoi tay bôk nău kan rơh rƀŭn tal 57, ôi 15/6, ta Ngih quốc hội, Ủy ban Thường vụ Quốc hội an rgop nău mpeh nău mbơh uănh lah săk rnglăy ƀư tĭng trong nchrăp hun hao wăng sa-rêh jêng n’hanh tơm prăk ngih dak 6 khay bôk năm n’hanh ăp trong mkra ƀư tĭng nău nchrăp hun hao wăng sa-rêh jêng, tơm prăk ngih dak 6 khay dŭt năm 2021. Kruanh Quốc hội Vương Đình Huệ ƀư tơm rơh rƀŭn. Ta rơh rƀŭn, ăp nuĭh Ủy ban an lah: Chính phủ an tŏng ăp đăp mpăn wăng sa têh, an dơi mât rnoh mô ntoh hao tay n’hanh prăk kon đêt, rnoh khlay đăp mpăn, ntuh kơl nsum an dơi ƀư di nău rƀŏng, ntŭk ntô ntuh kơl tăch rgâl dơi groi nđôi uĕh mô rlu dơi rgâl, geh kơt nĕ rnôk srê hăn rlău jâng wăng sa dak he mư ngăch rdâk njêng n’hanh hun hao. Tĭng nău mbơh, 6 khay 2021, ngăch hao GDP nchroh mbơh geh nklăp 5,8%. Ndơ̆ an tơm prăk ngih dak geh 55,5% nău nchrăp trok, hao 10,9% nkôp đah rơh aơ năm 2020. Tâm rnôk srê Covid-19, ăp rnoh mrô an saơ uĕh yơn mô hŏ dơi geh nău rƀŏng ting trong nchrăp n’gluh an. Dôl uănh geh nklăp 23% rnoh doanh nghiệp rhoăt luh ntŭk tăch rgâl, nkoch nău lơh rdâng bah ăp doanh nghiệp lĕ hŭch yor srê.

Nuĭh rblang: Y Sưng Phê Ja