VOV4.M'nông: Ôi 24/11 (tĭng mông ta ntŭk), ta Tokyo, tâm rnôk hăn khâl ngăn Nhật Bản, Thủ tướng Phạm Minh Chính râng rơh mâp, pah kan đah ăp kruanh rđău kan tập đoàn têh bah Nhật Bản tâm trong rgâl mbrô. Ta rơh mâp, Thủ tướng Phạm Minh Chính an gĭt: mhe aơ, nuh srê COVID-19 hŏ ntrŭt ntrôl dăng rgâl mbrô ta Việt Nam. Tâm 20 năm, rnoh âk nuĭh dŏng ndơ bah ngai mhe geh 12%, yơn tâm pe khay rnôk nuh srê Covid-19 ntoh luh, rnoh dja hŏ âk rlău bar tơ̆ hao 24%. Việt Nam geh 80% kon se nti, sinh viên nti pơk sŏng dăng, âk rlău rĭng geh lam ntŭr neh rlău 60%. Chính phủ Việt Nam hŏ geh ăp trong kan, ntrŭt ntrôl hun hao rgum mâp prăp nău lư, ŭch tât lăp tâm rmôt 50 dak mât prăp nău lư pơk tâm năm 2025, rmôt 30 tâm năm 2030. Lah ta rơh pah kan, Thủ tướng lah rjăp, rgâl mbrô mô dơn geh nău têk leo bah Chính phủ ma hôm geh nău tât râng bah nuĭh ƀon lan n'hanh doanh nghiệp đŏng, sŏk kon nuĭh ƀư n'gâng tơm, mpôl kan, ăp trong kan ân rƀŏng tât nuĭh ƀon lan n'hanh doanh nghiệp, nuĭh ƀon lan n'hanh doanh nghiệp râng tâm rnôk ndơ̆ rgâl mbrô. Mpeh du đêt nkô̆ nău na nê̆ ma ăp đại biểu uănh khlay, Thủ tướng nkoch trong nchrăp bah Việt Nam lah têh mhe ngăch tâm trong kan prăk kaih, ngân hàng gay ăp trong kan dja hăn lor dâk bôk năp tâm rgâl mbrô./.

Nuĭh rblang: Điểu Thân