VOV4.M’nông: Kêng măng (30/7), ta nkual ƀon têh Buôn Ma Thuột, ntơh măt kruanh rđău kan Nhih pah kan Radio nău ngơi Việt Nam way gŭ kan ta nkual Tây Nguyên (VOV-Tây Nguyên) ƀư pă an 2.200 blah kho ao ndrôm săk dak si, 500 bil ndrôm muh măt bah mprănh dak diu n'hanh âk ndơ dŏng sa khlay an Ntŭk rgum Mât uănh kop ji n'gor Dak Lak (CDC Dak Lak), gay ntop kơl mpôl kan dak si Dak Lak, geh tay ndơ năp dŏng njrăng, n'gang nuh srê COVID-19.

Wa Ngô Quang Khương - Groi giám đốc VOV-Tây Nguyên an gĭt đah ŭch rŏng ndrel hăn mpôl kan dak si n'gor Dak Lak nsum ti njrăng n'gang nuh srê COVID -19, đơn vị hŏ dâk rgŏ jă ăp mpôl kan, ăp nuĭh râng kơl ndơ dŏng kan dak si kơt: Ndơ ndrôm săk, bil ndrôm muh măt njrăng bah mprănh dak diu n'hanh ndơ dŏng sa khlay. Lôch 3 nar kuăl jă, hŏ geh 10 mpôl kan, ăp nuĭh râng kơl 2.200 blah kho ao ndrôm săk, 500 bil ndrôm muh măt njrăng bah mprănh dak diu n'hanh âk ndơ dŏng sa êng ƀa ƀă, lĕ rngôch rnoh khlay  bơi 170.000.000 prăk./.

Nuĭh rblang: Điểu Thân