VOV4.M’nông: Yan vai tuch tăm 2020-2021, nkuăl Lắk n’gor Dak Lak srih tăm geh rlau 5.300 ba ba dak, ngăn lah tâm rgum tâm ăp xã: Ƀon Triết, xã Đắk Liêng ndrel Xã Buôn Tría. Dôl tâm yan rek ba, kônh wa ta aơ rhơn ngăn yor năm aơ ba geh âk, tăch lŏ khlay đŏng.

Dôl ma mu ru nchuăn ba leo rgum, wa Nguyễn Thị Phán, ta Thôn Bung Tung 1, xã Buôn Triết, rhơn ngăn, bri mih nar năm aơ ueh, ba hun hao, geh âk play. Yan aơ, wa srih rlău 4 ha ba ntil Đài Thơm 8. Bu hăn rvăt tât ta lŏ yor ri ma nau rek ndrel ma tăch ba bah rnăk wa nơih ngăn. Wa Phán nchrăp, rnăk khân păng mra geh nklăp 150 rkeh tâm yan aơ:

  ‘Kơt ngih gâp nê srih ntil Đài Thơm kŏ geh 1,2 tấn/sào. Hôm rnoh ri vay ăp năm ri geh khlay lơn rđil năm e, bu hăn rvăt tât lŏ ri lôch rek nơm tăch nkre ro. Ba ri bu rvăt âk, năm aơ rnoh hao oi ri ma kônh wa nơih tăch đŏng”.

Êp ma nê, rnăk wa Nguyễn Công Hùng, ta Thôn Mê Linh 2, xã Buôn Triết, kŏ dôl ma rek ba. Wa nkoch, rnăk wa geh 5 ha lŏ, ta ưbah âk năm ma aơ ri kŏ srih ntil ST-24. Năm aơ, ndrel ma tăm ba, wa hôm tăm rgâl bơi tât 5 sào lŏ gay ma tăm bum chin. Nau rhơn lơn ma geh âk, rnôk yan bum chin aơ wa lŏ geh bu rvăt âk, rnoh tăch tâm lŏ geh ntơm 8-10 rbăn/kg. Ba kŏ geh âk, rnoh lŏ khlay lơn ma ăp năm:

  ‘Năm aơ saơ geh ba âk lơn, geh 1,2 tât 1,3 tấn du sào ba rih, lôch rek lah geh bu hăn rvăt nkre ro, rnoh bu dôl ma rvăt lah 6.700/kg. Bu hăn rvăt tât ta lŏ, tâm ngih nơm”.

Lah xã knŭng ƀư lŏ, geh âk rnoh neh tăm ba ngăn tâm nkuăl Lăk, tâm yan mih năm aơ, xã Buôn Triết srih tăm bơi tât 2000 ha ba dak. Tĭng wa Bùi Mạnh Hải, Kruanh UBND xã Buôn Triết, năm aơ bri mih nar tâm di, trong dak tŏ lŏ geh mât đăp mpăn rnoh dak ri ma ba hun hao ueh, ân geh săk rnglay âk. Nau geh nklăp 9 tấn tâm du ha lŏ, êng nê, du đê̆ ntil ba kơt lah Đài Thơm 8, ST-25, ST-25 ân geh ntơm 12 tât 13 tấn. Ba geh bu hăn rvăt tât ta lŏ, rnoh geh ntơm 5.800-700/kg ba tĭng ntil tăm. Rđil ma rnoh geh aơ ri âk lơn bơi tât 1000/kg rđil yan bah năp nê:

 ‘Geh nau kơl an bah Ngih dak ntuh kơl nkra trong bah xã kŏ kơt lah du đê̆ trong hăn lăp tâm tâm lŏ yor ri ma nơih ngăn ân kônh wa tâm nau kan nchuăn rdeng ndơ tuch tăm. Tal bar lah bri mih nar nơih ueh ri tât rnôk aơ hôm geh duh nar ueh, nơih ân kônh wa rek ba. Xã Buôn Triết geh nau vay tuch găm nkre tâm rgop nau tă bah nau blau ơm ndrel kơt tĭng nau kan tuch tăm mhe ndrel geh nau kơl an bah ntŭk kan ntrŭt nsôr tuch tăm ndrel ăp nŭih kan khoa học yor ri ma du đê̆ ntil ba ma kônh wa leo nsĭt srih tăm tâm nkuăl ri geh nau đăp mpăn săk rnglay ndrel geh rnoh âk”.

Kŏ tĭng wa Hải, gay kơl an ƀon lan tuch tăm ân geh nâp nâl, n’gâng kan tâm nkuăl kŏ ƀư nau tâm nchră, ntĭm mbơh nau tă blau nau kan tuch tăm, săch ntil tăm, nkhĭt bu tuh ba. Nkre lah, xã kŏ tâm rgop nsum ma ăp ntŭk kan tâm boh nau kan bah xã đah ăp rmôt kan pă tăch ntil geh nau bu rnơm ngăn ndrel ăp rmôt kan tâm boh nau kan srih tăm, tuch tăm ăp ntil tơm tăm geh văng sa âk. Rnơm ma nê ăp năm êp aơ, nau geh bah ntil ba mro đăp mpăn ndrel nar lơn ma âk. Nŭih ƀon lan kŏ nchrăp kơt tĭng ăp nau kan tuch tăm mhe tâm nau kan bah nơm leo dŏng ăp máy móc dŏng kan yor ri ma nau kan mât chăm ndrel rek ba nar lơn ma nơh ueh ndrel săk rnglay. Ndrel đah nau kan tăm tơm jŏ năm, tơm ba kŏ dôl ma geh ntŭk dâk geh rnoh tâm nkuăl neh prêh aơ, rgop nau leo nau đăp mpăn ndơ sa ndrel nau geh văng sa âk ân kônh wa ƀon lan./.

                        Nŭih rblang: H’Thi