Zok nriêr cêr huôv tsar uô nox truôx trâu tsôngv pêx xênhv Làng Nủ

Tsêr vênhx huôv kuz jok Làng Nủ, niêx hnuz muôx lok six chôngz lênhx kruô tuôx chiê hlơưr shaz qơư txi côngv chor nênhs trâus tuôs hâur txuz tox xưz poz uô ruôr hiêv shông nhiv kruôr đhâu thiêz ndis seiz qơư bảo tàng. Niêv lâul Nguyễn Thị Kim-lênhx nênhs hmôngr jông tsênhv chiêx hâur txuz tox xưz poz trâus heik sâuv lênhk uô luôs hâux lưv chox kriê cêr sơưr đơưk ndis seiz têx trâus ruôr hiêv, tsi jông. Uô luôs hâux lưv no, niêv lâul muôx phênhv sâu tâu truôx tuk: “Làng Nủ thâuv tưs cux sor si, cxuô lênhx sơưr đơưk cux tsênhv tuôx paz, tuôx shuôs, moz siêz thiêz cxơưx txos. Uô chas tsi sir jos chiê hla đhâu têx phiv liv, cêr pôngz siêz, cov luz nênhx truôx tuk đuô. Chênhr viv li tsôngv pêx xênhv qir cxiv uô đuô luz nênhx yiêz, qir siz zâuv muk khưr uô liêx têz, tsêz chos kôngz”.

Đhâu têx trâus moz, trâus pôngz plox, phiv liv, txov nhêv, tsôngv pêx xênhv Làng Nủ tsênhv zok nriêr tsưr ziv huôv tsar uô nox yiêz. Iz cxiê lênhx mak nzaz nzơưv pênhr tsaz yênhx đêx hur chiê tror huôv tsar tu zus njêl tầm-luôs hâux lưv uô no iz txưv gra lok phênhv sâu tâu siêz trâu pêx xênhv uô ntêx thâuv tsi tâu trâus đêx nas uô ruôr hiêv. Iz chas co, ntâu chuôz zis sir jos huôv tsar chos têx shôngz ntông, zos tsoz chos chênhr hâur thax tsav qơư. Niêx hnuz, tix lâus Hoàng Văn Voi, nhoz jok Làng Nủ tsês ntâu six hơưv, hnuz nhôngs chiê tu têx ciêv fix, xar muôx 20 ha ntơư. Tsuôk 2, 3 shông xưz, tsoz ciêv fix zuôr hloz lox, jông txiêr sâu, tix lâus 2 txir tuz zuôr muôx phênhv sâu tâu, txoz cxơưx trâu luz nênhx: “Hâur ntu zuôr txos, cur xar cov tas nro cxuô chuôz zis trâus đêx nas uô ruôr hiêv hâur shông nhiv kruôr đhâu zuôr sir jos huôv tsar uô nox uô hnar, jux juk hla đhâu phiv liv, cêr txov. Xar njôngr cov sơưr đơưk muôx cêr thôngx siêz, siz hluz siz paz, plox jux juk têx cêr pôngz siêz, taz sik tsuv ndo njôngr tiêk, zuk hmôngr jông tsênhv chiêx, tsênhv muôx txox hmông nhoz, tsuv sir jos uô nênhx jông, tsi zos trâu zuk xưz, mak hur si trâu chor nênhs tưz trâus tuôs”.

Uô trơưk Thủ tướng Chính phủ chox kriê, huyện Bảo Yên, tỉnh Lào Cai tsênhv cxiv tsa đêx anr thiêz nzor qir têk cxiv kho tas nro têx đras liêx, ar têz trâus đêx nas cuôr yôngz, ar, poz jêz cxuz trâu tsôngv pêx xênhv chiê sơưr đơưk muôx liêx têz uô nox. Zov chênhr zos paz pêx xênhv xeir tsov zuz nôngz tsoz chos huv đros ntơưv qơư thiêz cxiv tsa cêr sik côngv sâu zuôr kôngz nuv. Zơưv Hoàng Quốc Bảo, Bí thư Huyện ủy Bảo Yên heik pâuz: “Tsôngv pêx xênhv nhoz no phênhv ntâu cux zos khưr uô liêx têz, kôngz lôngk. Đras liêx Làng Nủ kuz, trơưk li Thủ tướng Chính phủ thiêz hâu nov tỉnh chox kriê, pêz tsênhv đros taz viv piêr kriê sir jos cxiv kho têx tsi jông, trâus xưz poz, chiê pêx xênhv jông huôv tsar chos têx kôngz truôx tuk”.

Nhiv kruôr đhâu, iz taz viv tưz chos luk tror paz max, đros pêx xênhv Làng Nủ huôv tsar uô têx xiv huv muôx ntơưv qơư chiê phưx vưv kruô ju lix ndis shuôs têz qơưk uô si thiêz muôs trâu 2 chas thax tsav. Taz viv no chos luk, zuôr paz sâu zuôr pêx xênhv têx xiv huv uô tâu, chiê sơưr đơưk muôx phênhv sâu truôx tuk. Đros trâu hâu nov ntơưv qơư, côngv thôngx cêr paz max thiêz tsôngv pêx xênhv têx sir jos hla đhâu cêr txov, phiv liv, thax tsav qơư trâus ntux uô ruôr hiêv hnhar co tưz jux juk muôx luz nênhx yiêz, truôx tuk, tsâu sor./.

CTVVOVTB-Riê Lâux cxeik, nhênhv