Lào Cai sir jos huôv tsar uô kinh tế cov huv đros tênhx qơư

          Đhâu hlo tsiêz têz qơưk, Ban seiz car Thax tsav kinh tế tỉnh Lào Cai tưz phuôx tôngv tsưr tsix Tsiêz chos ntông ntơưv Thax tsav công nghiệp Tằng Loỏng, hu zâuv têx lênhx hlôngr njêx muôs chor tsêr meir, chôngz lênhx ntâu tus canr bôv, kỹ sư, nênhs lox tôngv cxaz chuôz. Tas nro thax tsav qơư đar 18 ha ntơưv qơư tsiv uô tôngx Lào Cai chuôs li tâu chos ntông thiêz cxuô zav pax. Co zos taz viv têx sir jos hâur ntâu shông đhâu, chiê hlôngr yiêz tênhx qơư huv đros chor nênhs uô hâux lưv. Zơưv Nguyễn Hữu Sơn, Phưv Giám đốc tsiv uô tôngx Lào Cai heik pâuz: “Niêx shông pêz tưz tso tơưv tsưr ziv thiêz tưz fuô uô, lar heik zos hâur têx shông đhâu, công ty tưz chos yênhx cxênhz tsoz ntông njuôz, hâur 6 luz hlik, pêz muôx tsưr ziv muôz 1,5 tyv đeiv fuô uô luôs hâux lưv chos ntông njuôz”.

          Đơưk uô hâux lưv chuôz tsar kinh tế đros trâu taz por tênhx qơư, tỉnh Lào Cai thiêz têx doanh nghiệp cux tưz sir jos yưv pênhr, xưv lik, muôz têx vuôz tsuôz kiêk nênhs tsiv uô đuô lưv zav txix ciês thâuv nhiv kruôr muôx yưv. Ntơưv Công ty tsiv uô yuôx Đức Giang, doanh nghiệp no uô ntêx nyuôs yưv zuôr xar 200 tyv đeiv fuô uô luôs hâux lưv xưv lik têx kiêk nênhs, vuôz tsuôz. Cxix luôs no iz shông tưz xưv lik tâu nhos 5 cxênhz tênhr têx thạch cao uô xi măng, txo grêk tsơưs tâu 60% têx kiêk nênhs vuôz tsuôz niêx shông. Zơưv Đặng Tiến Đức, Phưv Giám đốc Công ty tsiv uô yuôx Đức Giang heik: “Công ty taz por côngz trâu tênhx qơư xi măng chiê muôx txâuk phưx vưv tsiv uô, li ntơư zuôr tsi muôx nzir têx kiêk nênhs vuôz tsuôz hâur tsêr meir, taz por Công ty huôv tsar uô tâu truôx ntêr têx luôs hâux lưv heik sâuv. Iz chas chor tsêr meir xi măng cux tưz txo grêk tsơưs krêz uô têx poz jêz, paz tênhx qơư hâur têx công ty tsiv uô xi măng hur jông đuô”.

           Lào Cai tsênhv sir jos njuôk hov chor thax tsav công nghiệp thiêz hu zâuv lênhx nênhs yưv pênhr trâu luôs hâux lưv co txix krêz uô têx muôx ntơưv qơư hlôngr uô truôx jông trơưk tsưr ziv yiêz. Tỉnh tsưr ziv zos hu zâuv têx dưv anr tsiv uô khoar cxax; taz sik tsi muôx kiêk nênhs vuôz tsuôz uô ruôr hiêv txos tênhx qơư. Zơưv Hoàng Chí Hiền, Giám đốc Sở Công Thương tỉnh Lào Cai heik pâuz: “Tỉnh thâuv tưs tưz heik cxuô doanh nghiệp tsuv uô li chas chiê uô hur tênhx qơư, txo grêk têx vuôz tsuôz, kiêk nênhs, lar heik zos tsuv taz por tsi uô ruôr hiêv txos tênhx qơư. Viv têx xiv huv puôr lênhx muôs trâu 2 chas têz qơưk đrâuv, zos tsi bax uô jông mak zuôr huôv tsar uô tsi tâu truôx. Nhiv kruôr đhâu, tỉnh tưz chox kriê, tsuv cxiv tsa thax tsav công nghiệp Tằng Loỏng yênhx thax tsav công nghiệp hur jông”.

             Tỉnh Lào Cai cux tsênhv sir jos uô jông têx hâux lưv, xưv lik têx vuôz tsuôz, kiêk nênhs ntơưv chor thax tsav công nghiệp, thôngz đhâu cxix luôs liv, njuôk shuôs tênhx qơư thiêz têx tsêr meir xưv lik vuôz tsuôz kiêk nênhs. Lar heik, têx uô cxâuv lok tênhx qơư zuôr zênhx max tâu qênhz pov thiêz xưv bluô txos qơư, chiê têx thax tsav công nghiệp thâuv tưs cux hur jông./.

Thanh Thủy-Riê Lâux cxeik, nhênhv   

Pêx xênhv Điện Biên muk cxax yuôx vắc xin phax moz khâuz thuôk

           Tsênhv qơư Cxax yuôx FPT Long Châu, chi nhánh Võ Nguyên Giáp, thành phố Điện Biên Phủ, tỉnh Điện Biên, yênhx puô lênhx pêx xênhv tsênhv sơưr uô hax, uô têx ntâuz ntơưr chiê cxax yuôx vắc xin phax moz khâuz thuôk. Bác sĩ Nguyễn Thị Thu Hoài, sêiz car Tsênhv qơư puz pâuz: hli uô ntêx, xav iz hnuz tsuôk muôx nhos 10 lênhx nênhs tuôx cxax yuôx vắc xin phax moz khâuz thuôk; taz sik têx hnuz jê lok no, iz hnuz, chor nênhs tuôx cxax txix 100-150 lênhx nênhs: “2 hnuz lok no, iz hnuz muôx nhos 100 lênhx nênhs tuôx cxax yuôx phax moz khâuz thuôk, ndê muôx nhos 20 jiês. Chor vắc xin xưk li tưz zuôr tas”.

           Đrâuv Tsênhv qơư cxax yuôx FPT Long Châu, ntơưv chor tsênhv qơư cxax yuôx txơưr sâuv thax tsav tỉnh, hâur xar muôx 1 ciêz đhâu, chor nênhs tuôx cxax yuôx vắc xin phax moz khâuz thuôk cux chuôz ndê chôngz lênhx, tiv zix zos đhâu xor mông muôx chôngz nênhs trâus moz khâuz thuôk hnhar sâuv tas nro têz qơưk. Bác sĩ Đàm Thanh Tú, Tsênhv qơư cxax yuôx Nam Thanh, phường Nam Thanh, thành phố Điện Biên Phủ puz pâuz: cxuô hnuz, Tsênhv qơư tsuôk chiê 3 lênhx y, bác sĩ uô hâux lưv mak chor hnuz đhâu tưz tsuv tso nzir nênhs chiê uô hâux lưv. Txơưv tưz bax muôx 1.500 ntâu côngz yuôx vắc xin phax moz khâuz thuôk cov txâuk cxax trâu pêx xênhv hâur jiês no, taz sik, tiv chor nênhs tuôx cxax yuôx chuôz ndê chôngz lênhx, viv li chor yuôx vắc xin tsuôk txâuk chiê cxax hâur oz pêz hnuz zuôr txos xưz: “Chor nênhs tuôx cxax yuôx phênhv ntâu zos nhoz thành phố Điện Biên Phủ thiêz huyện Điện Biên. Taz sik cux muôx iz cxiê lênhx nênhs nhoz têx thax tsav txơưr tsênhv đăngk cir tuôx cxax yuôx. Gri cxax yuôx nhiv no tsênhv truôx tuk, tsik txơưr txar, tas nro chor qơư cxax yuôx puôr lênhx cxax lơưr gri txix 300-330.000 đêiv iz côngz yuôx”.

            Lơưr chor tsênhv qơư cxax yuôx li ntâuk gri, chor nênhs xar cxax yuôx vắc xin phax moz khâuz thuôk chuôz ndê chôngz lênhx zos pêx xênhv tưz jênhv pâuz tsênhz đuô đhâu muôx moz Covid-19; ntâu ziv chuôz zis tưz chiê tas nro chor nênhs lâul thiêz chos nhuôv zâu tuôx cxax yuôx hur si. Niêv tix Nguyễn Thị Nhàn, nhoz jok 4, xar Pom Lót, huyện Điện Biên hêik pâuz: “Jiês no tsênhv muôx chôngz nênhs trâus moz khâuz thuôk viv li chuôz zis cux cxơưx. Hnuz no chox chor mê nhuôv tuôx cxax yuôx tas mak zuk cux tso siêz đuô lơưv”.

             Bác sĩ Phạm Đức Tài, Trưởng khoa phax tar caz moz siz cik, Tsênhv qơư Qênhz yuôx caz moz tỉnh Điện Biên puz pâuz: Cxax yuôx vắc xin phax moz khâuz thuôk tưz tâu njuôk xav jông paz muôx tâu ntâu kror liv, zos phax tar trâus moz khâuz thuôk, tuôx tsêr kho moz thiêz txo grêk trâus tuôs tiv trâus moz khâuz thuôk: “Chiê phax tar moz khâuz thuôk mak pêx xênhv tsuv sir jos kriz uô jông iz cxiê tsưr ziv li uô thể dục tsik so huv đros hnuz nhôngs; nox hâuk cov txâuk tsơưr pưr, tiv zix zos chor nhuôv zâu, pox niêv xênhz nhuôv hâur chêr thiêz chor nênhs trâus moz têx zav moz txơưr”.

            Hâur qênhx shênhx moz txơưr txar phiv liv, sir jos cxax yuôx phax tar caz moz thiêz kriz uô jông têx tsưr ziv vêv xênhz zos kror zov chênhr, txix co paz phax tar tâu jông chor zav moz siz cik hêik cxuô thiêz phax tar tâu jông moz khâuz thuôk./.

Vũ Lợi-Lik Thox cxêik nhênhv