Nênhs Cho hnar trik lur chês li ntênhs txi côngv yuôx đrox njuôz thor muôx jông đas jos, luz nênhx truôx tul

          Txix ntâu cxênhx nênhs lok no, nênhs Cho hnar trik lur chês nhoz xã Phú Xuyên, huyện Đại Từ, tỉnh Thái Nguyên tưz txơưx muk pêv har jôngr đê yuôx lok kho moz. Têx zav yuôx njuôz pêv har jôngr đros tsôngv box nhoz no puôr lênhx zos têx lok six muôx tsiv grê har jôngr khơưk muôz trâu tsôngv box chiê phax tar thiêz kho têx zav moz gênhs.

          Tsôngv box xar tiêk lênhx nênhs, tsoz chos thiêz cxuô zav puôr lênhx muôx njux plik. Viv li, têx cưk yuôx njuôz nhoz xã Phú Xuyên xar tiêk: đaz yuôx thâuv tưs cux por vêv tsôngv box, têx cưk yuôx li cxuô huôx tôngv puôr lênhx muôx đaz yuôx seiz njôngr. Niêv lâuk Dương Thị Kim Cảnh, tsôngv box nhoz jos Tân Lập, xã Phú Xuyên pheiz kênh: “Txix thâuv ntêx têx lâuk tưz tsês chiê têx tsoz yuôx muôx tsiv grê pêv har jôngr. Têx yuôx co paz kho jông moz, têx zav moz li moz lok poz kêx cxa, moz plaz tsuôk zuôr đê mê njik blôngx lok râuz hâuk txơưv jông moz. Phongz qơưx txi côngv yuôx njuôz hâur shôngk shông zos chiê ndo txos đaz xênhz têz xênhz qơư li têx tsiv grê jông, puz têx tsoz yuôx njuôz jông. Thiêz cux zos thor cov đaz xênhz têz xênhzx qơư por hưv têx yuôx njuôz, paz yuôx tuôx thiêz hloz lox sei…”

          Hâux lưv txi côngv đaz yuôx tâu uô hâur yênhx ziv chuôz khênhr muk đê yuôx đrox njuôz, khênhr zôngv yuôx đrox njuôz, nhiv no phênhv ntâu nhoz têx chuôz zis tsiv uô yuôx đrox njuôz kho moz. Phongz qơưx no tâu uô hâur shôngk shông yiêz, khênhr zos thâuv nox tsiêz tas tsưr tsêr zuôr xeir hnuz jông thiêz hu txir nênhz tuôx uô. Taz sik cux muôx chuôz zis txi côngv iz shông 2 jiês, uô thâuv hâur shôngk shông thiêz đraz shông. Zơưv Triệu Văn Viên, tsưr tsêr muôs yuôx đrox njuôz nhoz jos Tân Lập, xã Phú Xuyên puz pâuz: “ Phongz qơưx txi côngv đaz yuôx hâur shôngk shông yiêz zos iz phongz qơưx muôx đros đeiv hâur luz nênhx. Đrâuv co, iz jiês jiês muk đê yuôx, pov tsoz yuôx xuz thơưx mak thor đhâu co thiêx li đê lok tsêr. Yuôx tsuôk tâu đê cov txâuk, tsi đê ntâu, chiê lênhx tưs cux tâu đê yuôx lok zôngv thiêz cux zos por vêv tsoz chos pêv har jôngr. Cưk yuôx tsuv tsưv ziv thâuv thav luk, tsi heik têx lo luk tsi jông txos đaz yuôx, tsi li mak zuôr njiz trâus têx hmôngr tsi jông”.

          Trôngx mor txi côngv mak tsov lơưr tsưr tsêr li têx muôx hâur chuôz zis, tsuôk zuôr muôx greix, iz tul keiz, lok sik 2 đeiv tâuv pax, 2 luz kê keiz, iz ntiv cxur cux txi côngv tâu. Tiv zix zos tsuv muôx nênhs Cho li chor shaz ntơưr cxix cxuô. “Hnuz no zos jông hnuz, pêz chuôz zis uô trôngx mor muôx keiz, nduôr, shaz ntơưr. Pêz thor uô tsâus txos pox côngz zơưv côngz, txos đaz xênhz têz xênhz qơư, đaz yuôx. Xar njôngr nêx jênhv thiêz phôngv cov chuôz zis li hâux lưv uô yuôx njuôz tâu truôx jông, thor tsôngv box sđ lênhx tưs cux muôx jông đas jos”.

          Lơưr txir nênhz Phùng Văn Lầm: Phongz qơưx txi côngv no đros nênhs Cho hnar trik lur chêk mak tsuôk hu txir nênhz tuôx hu ntơưv thax đaz. Taz sik đros nênhs Cho heik cxuô mak tsuv muôx 2 txir nênhz, iz lênhx hu hâur tsêr, iz lênhx hu đrâuv jôngr nhoz jê har jôngr.

          Hu tas, trôngx mor tâu gra lok, têx lênhx nênhs hâur chuôz zis shir phaz nox hâuk, xar njôngr tâu đaz xênhz têz xênhz qơư por hưv jông.

          Nhiv no, nênhs Cho Phú Xuyên- Đại Từ- Thái Nguyên li yuôx đrox njuôz tưz yênhx xiv huv nto bê, paz huôv tsar uô ju lix, tâu ntâu tsôngv kruô nhiêv txos. Đros pox nhuôk nhoz no li phongz qơưx txi côngv đaz xênhz têz xênhz qơư, đaz yuôx cux tâu tuôr tsês chiê thor cov muôx jông đas jos, luz nênhx ngaz tul, cux xưk li hâux lưv uô yuôx đrox njuôz chax chês tâu tuôr tsês thiêz huôv tsar jông./.

Chẻo Thu-Txâur Vax cxeik nhênhv

Qơư ndis uô si Mộc Châu muôx chôngz lênhx kruô tuôx sêiz shuôk

        Trơưk li tsôngv px ntơưv qơư, cxuô qơư ndis uô si hâur thax tsav huyện Mộc Châu tưz muôx ntâu hlôngr yiêz txuôk đros têx pax txir khơưz tơưs yiêz jông jav đuô hâur ntâu shông đhâu. Hâur têx hnuz hli 2 no, txix têx tsoz chos ntông txir khơưz ntêr shông cux li tsoz chos ntông txir khơưz mok, puôr lênhx iz cxix tơưs pax đơưz đra pâus jông jav nhoz cxuô qơư ndis uô si hâur thax tsav huyện Mộc Châu, muôx chôngz lênhx kruô tuôx sêiz shuôk. Pos Nguyễn Thị Oanh, thơưx sêiz car qơư chos pax thiêz qơư ndis uô si Mộc Châu phêiz kênh: Hâur têx hnuz kaz ciêz, qơư sêiz car chos pax Mộc Châu tưz tok tâu xar muôx 1 cxênhz lênhx kruô tuôx ndis uô si, sêiz shuôk têz qơưs. Taz sik shông no, oz kror qơư co, muôx têx hnuz cux tok tâu 1.500 lênhx kruô; têx tsêr tsês trâu tsôngk kruô hâur iz hnuz cux tok tâu yênhx puô lênhx kruô tuôx nhoz so muk lok. Chênhr zos li hêik ntơư, cxuô zav jâuz, grêix uô tok tsôngv kruô tsuv zuôr oz chas thax tsav lok thiêx txâuk”

          Thị xã Mộc Châu muôx zuôr xar 300 qơư txâuk tok 10 cxênhz lênhx kruô hâur iz hnuz tuôx so, nox nhoz muk lok; taz sik hâur têx hnuz kaz ciêz, muôx txos 40 cxênhz lênhx kruô, viv li, cxuô qơư nhoz so cux uô truôx jông luôs hâux lưv chơưx kruô, tok kruô. Đros co, iz cxiê chuôz zis hâur thax tsav cux phêiz kênh zuk chuôz zis têx qơư so tsês trâu tsôngv kruô. Pos Đồng Thị Hoà, iz lênhx px nhoz thị xã Mộc Châu hêik pâuz nzir: Cur chuôz zis tưz tsês oz qar qơư pư tsês trâu tsôngv kruô nhoz Hà Nội tuôx ndis shuôk têz qơưs, muôx 5 lênhx nênhs lâuk, 3 lênhx nhuôv zâu chiê so đhâu hmo tsik zuôr nhiêx. Cur chuôz zis jông siêz hênhr, viv paz trâu tsôngv kruô thâuv muôx chôngz lênhx tuôx ndis uô si trâu Mộc Châu tâu qơư so”

        Têx luôs hâux lưv uô muôx liv co, tưz paz uô trâu tsôngv kruô tuôx ndis uô si, sêiz shuôk têz qơưs shir phaz lul thâuv tuôx ndis têz qơưs txos Mộc Châu. Pos Hoàng Thị Phương, nhoz Hà Nội tuôx ndis shuôk têz qơưs shir phaz lul hêik pâuz: Viv cur tsik hu xor tôngx trâu chor tsêr tok kruô uô ntêx, li ntơư thâuv tuôx txos trâu Mộc Châu tưz tsik yuôr iz kror qơư so tưs hlo. Taz sik, hmôngr jông, pêz cux tâu tsôngv px nhoz Mộc Châu shir phaz lul kênh qơư trâu pêz so đhâu hmo chiê ndis suôk têz qơưs”

        Trơưk li pos Nguyễn Thị Hoa, Phưv Chủ tịch UB thị xã Mộc Châu, muôx chôngz lênhx kruô tuôx ndis uô si trâu Mộc Châu, hâu nov thị xã tưz chox car cxuô lực lươngx muôx vax huôv qênhz yuôx, tsưx phưv truôx ngaz tuk muk lok tâus cêr, vệ xênhz tênhx qơư thiêz vệ xênhz zav nox. Lar hêik zos, cxuô qơư uô jâuz mor, tsuv bax cov txâuk cxuô zav jâuz mor, grêix tsês trâu tsôngk kruô.

          Chiê uô cov tâu truôx jông cxuô luôs hâux lưv chơưx kruô, tok kruô tuôx ndis uô si trâu Mộc Châu hâur ntu zuôr txos no, hâu nov Thị xã Mộc Châu tsênhv zuôr cxơưz cxuô tsưr tsix muôz pênhr nhiêx tuôx cxiv uô cxuô qơư so, qơư uô jâuz mor, cux li qơư ndis uô si cov ziv hnuz ziv đros tsôngv kruô siêz nhiêv./.   

                                      Lê Hạnh- Tsu cxêik nhênhv