Công nghệ sôr paz chi cax trâu chor jêx jok ntus đriv

Jok tox siêz Hoang Thèn, xar Sì Lở Lầu, tỉnh Lai Châu muôx zuôr xar 500 ziv chuôz zis, 2.000 ntâu lênhx nênhs Hà Nhì uô nênhx nhoz. Nhiv no, hâux lưv yax kriê chêi têz qơưk têx cui tênhv lok tsês chiê têx fov, chuôz lov tơưs zos Zênhx Pênhz phax Vàng Ma Chải sêiz car zaz zâuv chôngz pox nhuôs tuôx mnôngs. No cux zos jiês chiê bôv đôiv pênhz phax kriê trâu pêx xênhv sir zongv điệm thoại txơưx njê, nriêr pâuz têx xor mông, chêi têz qơưk têx cui tênhv, muôx tas nro hâux lưv hêik pâuz chor nênhs fêv đhâu mạng. Pos Phu Mờ Mè, nhoz jok Hoang Thèn hêik pâuz: “Tâu mnôngs canr bôv pênhz phax yax kriê, pêz tưz pâuz tsênhz đuô txos têx kror tsik zos, têx kror zos thâuv sir zôngv fov lok sik chuôz lov tơưs. Cur tsênhv tâu muôz puz điện thoại txơưx njê jông hênhr, cans bôv kriê trâu zuk kriz sêiz, nhêv oz pêz tês xưz mak tưz paz zuk hêik kriê tâu trâu zênhx pâuz thâuv pov muôx têx phiv liv. Cur tsik xar tiêk luz điện thoại zâu no zuôr uô tâu li ntơưr, hêik trâu canr bôv pâuz mak tsik thav zuk muk njiz ciês lơưr”.

Sâuv têx trôngz, muôx huôz tsâuk, chor tuz lênhv pênhz phax cux tsênhv hnuz hmo sir jos muk kriê paz trâu pêx xênhv pâuz tâu công nghệ sôr. Nhiv no, hlôngr trâu sâu ntơưr pênhr, lok sik tuôx ciês trâu ntơưv chor tưz lênhv qơư nhoz chiê hêik pâuz, pox nhuôs zuôr xa têx xor mông hêik pâuz đhâu ứng dụng lok sik hêik kriê đhâu zôngv điện thoại kriz mã QR.

Đại úy Phu Già Pô, canr bôv đôiv Vận động quần chúng, Zênhx Pênhz phax Vàng Ma Chải hêik: “Pêx xênhv nhoz ntơưv qơư cux zuôr hêik pâuz tâu chor nênhs fêv, tsuôk sir zôngv điện thoại xưz, tsik thav sâu ntơưr, tsik thav tuôx trâu ntơưv taz viv chiê hêik pâuz li thâuv ntêx lơưv. Pêz kriz uô chor mã QR trâu ntơưv ntâu qơư li têx ciêz, tsêr vênhx huôv, trạm tênhv…paz zôngx ziv đuô trâu pox nhuôs”.

Ntơưv chor jêx jok ntus đriv qơư Zênhx Pênhz phax Vàng Ma Chải sêiz car, nhiv no chor nênhs Hà Nhì, Hmôngz, Cho… kriz điện thoaik sêiz, nriêr pâuz têx xor mông lok chêi, cơưv txux chi, hêik kriê trâu bôv đôiv pâuz… tưz zos kror sưv đros. Lơưr Thiếu tá Nguyễn Duy Khánh, Chinhr triv viên phưv Zênhx Pênhz phax Vàng Ma Chải, côngz nghệ sôr tưz tsik zos paz trâu pox nhuôs” pâuz têx chêi, uô nênhx huv zos trơưk chêi”, mak tsênhv zos chor nênhs paz trâu bôv đôiv pênhz phax por vêv tâu truôx jông ntus đriv: “Chôngz pox nhuôs, tiv zix zos chor nênhs lâul, hêik txos công nghệ mak tsik pâuz zos li chak. Canr bôv, chiến sĩ tưz muk txos ciês trâu ntơưv lơưr têx vax tsêr kriê, kriê trâu pox nhuôs zôngv điện thoại chiê nriêr pâuz têx txux chi, sêiz xor mông, cơưv shâuv thiêz nriêr pâuz chêi têz qơưk sâuv nền tảng công nghệ sôr”.

Tsuôk hâur iz ntu lur, 1.000 ntâu mã QR tưz tâu kriz uô txos chor jêx jok ntus đriv, paz trâu pêx xênhv zôngx ziv txuôk đros bôv đôiv pênhz phax. Tưz muôx 64 xor mông hêik pâuz, hâur co 21 xor mông muôx tsiv gri, tâu xa txos chor zênhx, paz tir tar tâu ntâu txuz uô cxâuv chêi têz qơưk. Đại tá Nguyễn Văn Hưng, Chinhr ủy Ban Chỉ huy Bôv đôiv Pênhz phax tỉnh Lai Châu puz pâuz: “Đhâu qênhz yuôx, sâuv tỉnh thax tsav ntus đriv tsênhv yuôr muôx 2.000 ntâu ziv chuôz zis tsik tâu muôx điện thoại txơưx njê. Pêz tưz sik côngv đros cxuô cấp, cxuô nganhx, hêik sik côngv paz tâu xar muôx 1.500 luz điện thoại muôz trâu pêx xênhv. Nhiv no Ban Chỉ huy tsênhv chox kriê kriz uô thư viện sôr chêi têz qơưk, paz trâu pêx xênhv zôngx ziv nriêr pâuz txix cho lok por vêv tsưr qênhx têz qơưk, ngaz tuk ntus đriv têz qơưk. Đhâu co, paz trâu pox nhuôs nhoz ntus đriv pâuz ntâu đuô thiêz sir jos uô lơưr chêi têz qơưk”.

Nhoz ntus đriv Lai  Châu, qơư muôx chor tuz lênhv Pênhz phax muk lok, uô hâux lưv yênhx hnuz, “txux chi công nghệ sôr” tưz thiêz tsênhv paz trâu tsôngv box cxuô mênhx cxưx muôx nzir txux chi thiêz pâuz txos ntâu kror đuô hâur luz nênhx, paz đros uô jông đuô côngz xưv por vêv thax tsav ntus đriv./.

Khắc Kiên-Lik Thox cxêik nhênhv

Tsôngv box tox siêz Sơn La shir phaz thâuv côngz tsinhx đêx hur tâu krêz uô

Hâur ntâu shông đhâu, tsôngv box tox siêz xã Chiềng Mung, tỉnh Sơn La tsik muôx txâuk đêx hur sir zôngv zos iz kro cêr cxơưx. Zơưv Tòng Văn Xuân chuôz zis, nhoz jos Xum, txix thâuv ntêx txos nhiv no, phênhv ntâu zos zôngv đêx hâur kror đêx cxơưr chiê xênhz huôx niêx hnuz. Taz sik, đêx phênhv ntâu tsi taz por tsơưr lươngv, tiv zix zos hâur ntu pox nhuôk uô têz tsêz chos kôngz, chuôz zis thâuv tưs cux cxơưx muôx yuôx tuô đrox xâuntưk lok trâu têx kror đêx, uô zênhr shar txos lênhx nênhs hâur chuôz zis li đas jos: “Tsêr meir cxiv uô nhoz no, tas nro tsôngv pox nhuôk hâur jêx jos, hâur xã puôr lênhx shir phaz, tsi cxơưx muôx yuôx tuô đrox xâuk lok hâur kror đêx cxơưr, nhiv no lênhx tưs cux xar njôngr muôx tâu đêx hur sir zôngv”.

          Sik côngv đros cêr shir phaz no, zơưv Hà Văn Phương, cux nhoz jos Xum puz pâuz: thâuv ntêx chuôz zis tsuv chiv chir khơưz kror đêx cxơưr, đhâu co zôngv meir grus đêx grus chiê zôngv xênhz huôx; đêx tsi tâu đhâu yưr lir, muôx ntâu suôz jêz, zôngv ntêr mak zuôr uô zênhr shar txos đas jos. Nhiv no chuôz zis lok six xar njôngr tsêr meir đêx hur nzor huôx tôngv chiê zơưv chuôz zis cux xưk li têx ziv chuôz zis hâur jos tâu zôngv đêx hur, lơưr trơưk ploz tsênhr kỹ thuật têz qơưk: “Pêz nhoz no zuôr tâu sir zôngv đêx hur txix tsêr meir, njênhs njôngr tâu zôngv lêx ntêr, taz por huv vêv xênhz trâu têx ziv chuôz is; pov lok six shir phaz, muôx tsêr meir nhoz no pêz zôngv đêx cux tso siêz đuô”.

          Lơưr zơưv Trần Xuân Hiệp, Chủ tịch UB xã Chiềng Mung, xã muôx 40 ntâu jêx jos, 6 cxênhz ntâu ziv chuôz zis, đros zuôr xar 28 cxênhz lênhx nênhs nhoz uô nênhx, đrâuv têx chuôz zis nhoz buôk niêv đrôngs Sơn La kuz thiêz buôk tsênhv qơư xã, phênhv ntâu têx chuôz zis tsuv chiv chir khơưz kror đêx cxơưr chiê sir zôngv. Côngz tsinhx tsêr meir đêx Chiềng Dong muôx ziz njiêz lok six coaz tsôngv đros tsôngv box sâuv thax tsav li luz nênhx thiêz chính quyênx tiv phaz tsênhv sik côngv, paz cxuô zav jông tiv zix chiê doanh nghiệp krêz uô dự án trơưk tsưr ziv, thiêz uô tiêr lok kaz shông 2027: “Pêz tưz yax mông têx jêx jos cik txos paz cxuô zav chiê cxiv uô tsêr meir, chaz đêx txos cxuô jêx jos, tsi taz xã Chiềng Mung, mak trâu tas nro têx xã txơưr sâuv tỉnh; thôngx cxix têx ziv chuôz zis cux xưk li têx phòng, ban hâur xã puôr lênhx paz Công ty chiê taz por krêz uô hâux lưv cxiv uô tsêr meir, đhok têx car tso đêx taz por trơưk six hơưv”.

          Lok dự án, zơưv Nguyễn Văn Bá, Phưv Tổng giám đốc Công ty CP cungz đêx Sơn La puz pâuz, tsêr meir tso đêx Chiềng Dong tâu cxiv uô sâuv mênhv chêx đar 1,2 hecta, tas nro pênhr yưv uô zos 260 tỷ đeiv ntâu, đros tas nro têx zav chuôz zênhx, meir yiêz muôx công suất yưr lir 14 cxênhz yiv đruôz đêx iz hnuz hmo, taz por txâuk đêx hur cungz chiê xênhz huôx. Thâuv uô tiêr, tsêr meir zuôr cungz đêx hur trâu muôx nhos 20 cxênhz lênhx kruô nhoz têx xã Chiềng Mung, Chiềng Mai, Mai Sơn thiêz phường Chiềng Sinh: “Công ty tưz xeir công nghệ jông tiv zix chiê taz por muôx tâu đêx taz por lơưr Bộ y tế li cui tênhv tso tơưv. 2 zos six hơưv uô, công ty zuôr seiz car jông, cxiv uô trơưk tsưr ziv tso tơưv, xeir têx tsưr thâux muôx pênhr xưv, sik côngv đros têx ziv chuôz zis, chính quyênx tiv phaz uô cov tâu tiêr trâu hli 12/2027”./.

Trấn Long-Txâur Vax cxeik nhênhv