Pov tsir paz cxơưz hlôngr yiêz sôr nhoz tox siêz Lai Châu

          Niêv tix Hà Thị Sinh, nhoz jok Nậm Dê, xar Bình Lư, tỉnh Lai Châu yênhx hnuz puôr lênhx Livestream muôx ciês chuôz zis thiêz pox nhuôs hâur thax tsav chor hax huv kôngz nuv. Niêv tix chor jiês livestream muôx yênhx cxênhz lênhx nênhs sêiz, chôngz lênhx nênhs tưz zuôr ciês têx hax huv đhâu mạng xar hôiv. Txix co, ziv chuôz zis tưz muôx tâu phênhv sâu truôx txix 8 txos 10 triệu đêiv iz hli.

            Niêv tix Hà Thị Sinh puz pâuz: Đhâu mnôngs Đaix nta suôz Việt Nam chor tsaz yênhx piêr kriê txxux chi sôr, tsưr ziv livestream thiêz tâu pox nhuôs hâur jok kriê, niêv tix tưz uô siv muôx hax huv online, paz buôs ti tâu ntâu lênhx nênhs zuôr sâuv tas nro têz qơưk: “Cur lok six shir phaz thâuz muôx nzir phênhv sâu, txơưv tsik ntâu taz sik cux txâuk chiê txoz cxơưx trâu luz nênhx. Tiv oz zos zuk cux paz trâu zuk truôx siêz đuô thâuv thav luk, njiz đros chôngz nênhs. Co zos oz kror zuk pov tưz hlôngr yiêz tâu zuk, tsik cxơưx txos zuk zos mênhx cxưx lok sik zuk tưz muôx 40 shông lok cux tsênhv muôx hax huv livestream tâu. Thiêz txos nhiv no mak pov tiêk zuk tưz hlôngr yiêz lok six ntâu hâur luz nênhx”.

            Iz chas têx xor mông, jax sâu sâuv sóng nta suôz, xa đuôz, mak canr bov têx tôv hlôngr yiêz sôr côngv thôngx li chor jiês kriê ciês trâu sơưr đơưk tưz paz trâu tsôngv box tox siêz Lai Châu jux juk pâuz tâu têx kror liv tsênhv tsênhz txix công nghệ sôr.

           Trung tá Nguyễn Đức Duẩn, uô côngz xưv ntơưv Phòng Chinhr triv, Ban Chỉ huy Bôv đôiv Pênhz phax Lai Châu zos iz lênhx canr bôv sir jos paz thiêz đros đrêiv jêx jok, tưz tsik so kriê trâu pêx xênhv muôs hax huv ciês sâuv têx qơư muôs hax huv điện tử. Trung tá Nguyễn Đức Duẩn tsik so xêir tsov tsưr ziv thav luk sưv jê, zôngx ziv pâuz chiê paz trâu pox nhuôs zôngx ziv cơưv tâu thiêz uô trơưk: “Đrâuv yax kriê lok Đảng, Têz qơưk têx cêr chêi cik txos hlôngr yiêz sôr, cur cux tsik so xêir tsov têx tsưr ziv uô tâu jông thiêz têx kror liv tsênhv tsênhz mak pêx xênhv tưz uô tâu đhâu sir zôngv hlôngr yiêz sôr. Chênhr viv li hâur chor jax sâu cur tsik so tso nzir têx zav đuôz jông, hêik txos têx lênhx nênhs uô tâu jông, têx hâux lưv jông tsênhv tsênhz muôx hâur yênhx hnuz nhoz thax tsav ntus đriv trâu sơưr đơưk pâuz. Đhâu têx kror tsênhv tsênhz li co, pox nhuôs cux zôngx ziv pâuz tâu, ndo tâu thiêz zôngx ziv uô trơưk”.

           Đros chor nênhs sâu xor xưv cơ quan pov tsir, chiê piêr kriê tâu têx tsưr ziv uô jông, txơưx xar tơưv, truôx jông hâur hlôngr yiêz sôr nhoz cxuô thax tsav qơư, yênhx lênhx nênhs puôr lênhx sir jos nriêr pâuz thax tsav qơư, xêir tsov têx tsưr ziv chiê hêik kriê, viv no zos iz hâur têx tsưr ziv yax kriê trâu chôngz lênhx nênhs uô trơưk. Jax sâu pov tsir tưz zos yênhx têx kror tsênhv tsênhz, paz trâu pêx xênhv hlôngr yiêz siêz xar, sir jos buôs ti trâu chor công nghệ yiêz.

           Zơưv Nguyễn Ngọc Tuyền, Phưv Giám đốc Báo thiêz Nta suôz-Xa đuôz tỉnh Lai Châu puz pâuz: Chiê pêx xênhv pâuz tâu jông txos têx công nghệ, côngz xưv yax kriê tsuv hlôngr yiêz hênhr, muôz pêx xênhv uô tsênhv njiêz. Ntu đhâu, taz viv tưz uô yênhx puô jax sâu pov tsir nhoz ntâu zav, phưx vưv chor nền tảng mạng xar hôiv, paz trâu pêx xênhv zôngx ziv pâuz tâu jông đuô. Taz viv tưz huôv tsar hênhr chor nền tảng sôr li: youtube, Fanpage, tiktok, Zalo, zaz zâuv yênhx cxênhz lênhx nênhs tsov cưv txos: “Pêz xav jênhv xar cov pêx xênhv buôs ti tâu thiêz sir zôngv công nghệ sôr cov tâu jông, mak tsuv zôngx ziv pâuz tâu thiêz muôx yưv sâuv têx nền tảng mak lơưr sir zôngv yênhx hnuz. Pêz tưz hlôngr yiêz têx tsưr ziv yax kriê, hlôngr txix xa têx xor mông trâu tsưr ziv yax mông sâuv ntâu kror, muôz pêx xênhv uô tsênhv njiêz. Đrâuv pov tsir in, pov tsir điện tử, tsaz yênhx nta suôz, xa đuôz, pêz tưz tsêx trung huôv tsar sâuv chor nền tảng mạng xar hôiv”.

            Chor pov tsir, nta suôz, xa đuôz txos chor nền tảng sôr hlôngr yiêz, pov tsir tsênhv paz trâu công nghệ txos jê đuô trâu pêx xênhv nhoz tox siêz Lai Châu. Thâuv chor mêir điện thoại txơưx njê ziv muôx ntâu jux juk nhoz chor jêx jok, pêx xênhv tox siêz txơưx uô sâuv không gian sôr, mak co cux zos thâuv têx hlôngr yiêz tâu kriz uô jông nhoz thax tsav ntus đriv.

             Txix Đảng têx chủ trương lox lok hlôngr yiêz sôr, Nghị quyết 57 lok huôv star khoa học, công nghệ, hlôngr yiêz xar tơưv thiêz hlôngr yiêz sôr têz qơưk tsênhv jux juk tâu kriz uô txix têx hlôngr yiêz tsênhv tsênhz hâur pêx xênhv nhoz tox siêz luz nênhx. Hâur co muôx cơ quan pov tsir, txix têx kror sưv jê thiêz piêr kriê txos ntâu qơư, txix ntâu zav cux tsênhv paz muôx tâu têx tsưr ziv uô yiêz, paz muôz công nghệ txos jê đuô trâu yênhx lênhx pêx xênhv./.

Khắc Kiên-Lik Thox cxêik nhênhv

Tsêr kho moz nhuôs zâu T.Ư sir jos paz huôv tsar cxix luôs kho moz nhuôs zâu Sơn La

            Ngênhx Y tế Sơn La nhiv no muôx 19 tsêr kho moz têz qơưk, têx qơư kho moz nhuôs zâu tâu fuô uô ntơưv 14 taz viv; hâur co, muôz khoa kho moz nhuôs zâu-mê nhuôv mok lok uô cê tsav phênhv ntâu (10/14 taz viv), tsuôk zos tsêr kho moz Đa khoa tỉnh thiêx nhiêk muôx nhiêk qơư seiz njuôk shuôs, kho moz gênhk trâu têx nhuôs zâu, nhuôv mok xưz.

           Trơưk li tsênhv njiêz seiz lax, thôngx ziv tâu cir, Sở Y tế tỉnh Sơn La thiêz tsêr kho moz nhuôs zâu T.Ư zuôr sik hux jos huôv tsar cxix luôs qơư seiz njuôk shuôs, kho moz nhuôs zâu tỉnh Sơn La truôx jông; Gra siêz luôs hâux lưv seiz njuôk shuôs, kho moz gênhk thiêz tsoz phưz đas jos nhuôs zâu; cxơưz cxiz sik hux jos lok sâuv kriê txux chi, tsưr ziv uô hâux lưv, nhênhz chơưv khoa học, hlôngr yiêz txux chi thiêz hlôngr yiêz sôr; iz chas ntơư sir jos fuô uô têx hâux lưv truôx tuk xã hội thiêz tsoz phưz đas jos nhuôs zâu hâur thax tsav tỉnh.

             Giáo sư, Tiến sĩ Trần Minh Điển, Giám đốc Tsêr kho moz nhuôs zâu T.Ư heik pâuz: “Tsêr kho moz nhuôs zâu T.Ư zos tsêr kho moz lox hâur têz qơưk, Tsêr kho moz nhuôs zâu T.Ư thâuv tưs tưz jông siêz, shir phaz lus đros ngênhx y tế tỉnh Sơn La fuô uô têx hâux lưv kriê cxaz txux chi yuôr trâus, paz tsưr ziv uô hâux lưv seiz njuôk shuôs, kho moz gênhk, nhênhz chơưv khoa học thiêz têx tsaz yênhx tsoz phưz đas jos trâu nhuôs zâu huv đros ntơưv qơư. Tiv 2, cux zuôr hux jos fuô uô têx hâux lưv lok seiz njuôk shuôs đas jos chiê qênhz pov nzor têx moz gênhk, piêr kriê đas jos thiêz têx tsaz yênhx truôx tuk xã hội trâu nhuôs zâu, lar heik zos chor nhuôv zâu muôx luz nênhx txov nhêv, nhuôv zâu thax tsav tox siêz đêz đrôngs thiêz tsôngv box heir nênhs tsơưs”. 

               Heik ntơưv ntênhs cir ntơưr, zơưv Hà Trung Chiến, Phưv Chủ tịch Thường trực Ủy ban tỉnh Sơn La khav tinhv: Co zos hâux lưv zov chênhr, krêz hâu cêr sik hux jos truôx jông đuô. Tsêr kho moz nhuôs zâu T.Ư têx cêr paz tsês trâu ngênhx y tế thiêz nhuôs zâu tỉnh Sơn La hâur kriê cxaz txux chi yuôr trâus trâu chor cưk yuôx, bác sĩ; paz lok tsưr ziv uô hâux lưv thiêz huôv tsar têx dịch vụ y tế tsơưr lươngv siêz hâur tsoz phưz, seiz njuôk shuôs kho moz gênhk trâu nhuôs zâu: “Pêz vav chiê siêz têx tsênhv njiêz tưz cir, hâur ntu zuôr txos zuôr muôx ntâu hâux lưv tsênhv tsênhz tâu fuô uô chiê jông trâu huôv tsar y tế tỉnh Sơn La. Hlôngr njêx muôs hâu nov tỉnh Sơn La, pêz chos luk trâu Giám đốc tsêr kho moz thiêz têx lênhx thơưx chox đoanx, hâu nov tỉnh Sơn La zuôr moz siêz chox kriê, tsês pênhr jos chiê fuô uô têx hâux lưv tưz cir ntơưr thôngx ziv hnuz no”

          Uô ntêx co, hnuz 17/6, Tsêr kho moz nhuôs zâu T.Ư Đoanx côngz xưv tưz muôx jiês qênhz shuôs, paz têx txux chi, tsưr ziv lês uô hâux lưv ntơưv Tsêr kho moz Đa khoa thax tsav Yên Châu thiêz qơư Y tế xã Yên Châu. Chor nênhs nhênhz chơưv hâur Tsêr kho moz nhuôs zâu T.Ư tưz buôk ti sik thav, kriê nzir tsưr ziv seiz njuôk shuôs, kho moz gênhk trâu nhuôs zâu; pheiz kênh iz cxiê tsưr ziv zov chênhr tsoz phưz chor nhuôv mok, phax tar têx moz zôngx ziv siz cik tâu thiêz fuô uô têx txux chi seiz njuôk shuôs, kho moz huv đros tsênhv tsênhz ntơưv qơư. Thix ziv ntâu tsưr ziv chiê lês uô tâu jông đuô cxuô luôs hâux lưv zok muôz, bax thiêz zuôr cxaz nzir têx chuôz zênhx phưx vưv uô hâux lưv chiê uô jông đuô cxuô cêr nuv hâur ntu zuôr txos./. 

Trấn Long-Riê Lâux cxeik, nhênhv