Pox niêv heir nênhs Poz Ziz nhoz Điện Biên por hưv, tuôr tsês jông zuk heir nênhs txux chi vênhx huôv tsi chiê pôngz plox

Huôk njôngr thâuv têx luz six hơưv shênhx, chor tuz nhuôs tưz cơưv ntơưr tas ntơư lok sik hnuz kaz ciêz, pos Hoàng Thị Phượng-heir nênhs Poz Ziz nhoz phường Điện Biên Phủ, tỉnh Điện Biên ho moz siêz lus kriê chor nhuôs tsưr ziv cơưv sênhr chêr hu gâux, heik cưr cxiêx Poz Ziz. Pos Phượng heik pâuz, tsôngv box Poz Ziz nhiv no zos heir nênhs muôx jênh sôr chôngz đuô hur si tỉnh Điện Biên, tsav 38% ntâu jênh sôr tas nro tỉnh. Sơưr đơưk uô nênhx nhoz Điện Biên thiêz thax tsav Tây Bắc ntêr lok, muôx yênhx puô shông, tsôngv box Poz Ziz thâuv tưs tưz shir phaz viv tsênhv tuôr thiêz por hưv tâu tsês ntâu txux chi vênhx huôv jông tsi chiê pôngz plox. Iz hâur têx txux chi, cêr nênhx phôngz cxưx ntơư zos, lênhx pox niêv Poz Ziz đuz kơưk zir tưk sâuv tiêx tâuz hâu-no zos iz txux chi, cêr nênhx phôngz cxưx jông thâuv nzor, cê heik lol lênhx pox niêv iz cêr khax jông jav, cê zos chiê pâuz tsênhz lênhx pox niêv ntơư tưz muôx txix gơưv. Pos Hoàng Thị Phượng heik pâuz: “Pos niêv Poz Ziz đuz luz nênhx zos thâuv zuôr txir mak kơưk zir tưk sâuv tiêx tâuz hâu. Taz sik zos hmôngr tsi jông, tus txir trâus tuôs mak lơưr zuôr kơưk luz zir tưk kêix trâu saz xik; thiêz zos tror zuôr đuô txir, lơưr zuôr kơưk zir tưk kêix trâu saz lâus”.

Txix têx cêr nênhx phôngz cxưx txos trâu ntênhs hội thâuv ntêx, lok sik têx txux chi sênhr chêr uô si lov jêv hu gâux, heik cưr cxiêx, chor lâul thâuv ntêx txux chi tsưr ziv krêz phaz huôv tsar uô nox uô hnar.....puôr lênhx tâu pos Phượng, têx lênhx pox niêv hnuz nhôngs siêz ndo njôngr chiê, por hưv tsês kriê trâu cxênhx hluôk pâuz thiêz đros tuôr jông tsês. Niêv lâul hỏ Phượng Hoài, nhoz phường Điện Biên Phủ heik: “Trơưk li cur mak, pax huôv, cưr cxiêx sênhr heik tâu jông cux zos muôx tsưr ziv thiêx xar tơưv tâu têx suôz gâux, suôz cưr cxiêx jông heik lol cêr uô nox, gâux đrâul siz đhok, siz huv. Thiêz cur zuôr sir jos xar tơưv, sâu têx pax huôv, suôz cưr cxiêx chiê tuôr tâu tsês zuk heir nênhs txux chi vênhx huôv, kriê cxênhx hluôk đros por hưv tsi chiê pôngz plox”. 

Iz heir nênhs nhiêk muôx nhiêk têx txux chi cêr nênhx vênhx huôv jông tsi siz thôngx  thiêz puôr lênhx zos heik lol sâuv luz nênhx xênhz huôx, cêr uô nox uô hâuk.... Đros thiêz pox niêv heir nênhs Cho nhoz Điện Biên, txơưv zuk heir nênhs têx chêr tsôngk yo tsi yuô hnar txos hâur niêx hnuz, taz sik cux tsênhv tâu chor pox niêv vir ndâuk xơưs uô thiêz hnar đreiv hâur têx hnuz lov jêv, ntênhs hội. Chảo Thị Ton, heir nênhs Cho nhoz jok Đề Tâu, xã sáng Nhè, tỉnh Điện Biên heik pâuz: “Txix thâuv tsênhv zâu, cur tưz lok six nhiêv zuk heir nênhs têx txux chi cêr nênhx phôngz cxưx thâuv nzor. Thâuv zâu pov têx lênhx niêv, lênhx pos uô pax ntâuz, xơưs tsôngk yo hnar mak cur lok six nhiêv cơưk. Txơưv tiêk tsi tâu hloz, taz sik cur tưz xar cơưv uô pax ntâuz, viv li tâu têx lênhx pos, lênhx niêv kriê cur tsưr ziv xơưs uô. Txos nhiv no, cur tưz muôx têx xơưs uô tâu têx chêr tsôngk trâu zuk hnar lơưv”.

Luôs hâux lưv tuôr tsês thiêz por hưv chiê têx txux chi vênhx huôv thâuv nzor nhoz Điện Biên tâu thax tsav qơư thiêz yênhx lênhx nênhs fuô uô txix ntâu faz tsưr ziv. Ntơưv cxuô jêx jok hâur Điện Biên nhiv no, phênhv ntâu puôr lênhx yênhx lix têx paz nthuôr uô cêr lov jêv, lok sik câu lạc bộ sênhr chêr uô lov jêv chiê sik đros nthuôr txux chi uô si lov jêv. Iz zav li Câu lạc bộ sênhr chêr uô si lov jêv ntơưv xã Na Sang, tỉnh Điện Biên, têx lênhx pos, lênhx niêv cux tsi so siz zâuv tuôx ntơưv tsêr vênhx huôv chiê siz kriê, sik cơưv shâuv uô si lov jêv. Đros thiêz lơưr, tsưx phưv truôx têx câu lạc bộ uô si li heik sâuv, iz chas chiê muôx đas jos jông, uô nênhx shir phaz, tsênhv paz trâu cxiv tsa, tuôr truôx thiêz por hưv tsês têx txux chi vênhx huôv jông hâur thax tsav tsi chiê pôngz plox. Pos Lù thị Oan-iz hâur têx lênhx nhoz hâur câu lạc bộ heik: “Pêz tsuv tuôr tâu tsês  têx txux chi vênhx huôv jông thâuv nzor tsi chiê pôngz plox. Txơưv nhiv no têz qơưk hlôngr yiêz thiêz huôv tsar ntâu, taz sik cux tsuv por hưv, tuôr tsês jông têx txux chi ntơư. Pêz txux chi vênhx huôv thâuv ntêx zos sênhr chêr uô si lov jêv, hu gâux, heik cưr cxiêx....”.

Iz heir nênhs nhiêk muôx nhiêk têx txux chi cêr nênhx vênhx huôv txơưr tsi siz thôngx, uô trâu cxuô jêx jok, thax tsav, têz qơưk ziv muôx ntâu tsar zav txux chi vênhx huôv jông. Hâur ntu por hưv thiêz tuôr tsês cxuô heir nênhs têx txux chi cêr nênhx jông, chor pox niêv, vir ndâuk Điện Biên iz fâuv đhâu iz fâuv, iz tiêv đhâu iz tiêv cux tsênhv moz siêz sik đros por hưv tsês têx txux chi ntơư tsi chiê pôngz plox./.

Thu Thùy-Riê Lâux cxeik, nhênhv

Ntênhk hôiv tâus cêr paz sik côngv lênhx nênhs thiêz vênhx huôv đruôk tôngx nxêz tôngx ntơưv Đà Lạt

Nhoz qơư muôx pak đêx, jôngr ntông chiêz thiêz chor pax tơưs jông jav, suôz đruôk tôngx nxêz tôngx đror nxê ntưk đros yênhx puô nghệ nhân tuôx txix têx tỉnh: Đắk Lắk, Gia Lai, Quảng Ngãi, Phú Thọ thiêz tỉnh Lâm Đồng li đhiê pax vuôs xoang. Iz đoàn, iz mênhx cxưx chox tuôx ntênhk hôiv tâus cêr têx vênhx huôv sik txơưr, paz muôx tâu ntâu kror jông lok Việt Nam thiêz thax tsav Đông Nam Á li têx vênhx huôv đruôk tôngx nxêz tôngx. Nghệ nhân Trần Ngọc Dũng, mênhx cxưx Thái, txix tỉnh Phú Thọ tuôx, jêik tsik tâu cêr shir phaz thâuv jiês xuz thơưx ciês tâu cxaz chuôz kriz uô ntơưv Đà Lạt: “Đros cur mak Đà Lạt muôx iz kror lok six jông. Qiv hơưv hur jông, lênhx nênhs sưv jê. Njiz tâu lok six ntâu mênhx cxưx txơưr muôx chor mênhs cxưx saz đrâuv têz qơưk thiêz chox tuôx ntơưv no têx vênhx huôv lok six jông. Zênhx tsik xar ndêiv muk hlo”.

Tưz tsik zos cxuô mênhx cxưx Việt Nam hnuz hôiv, ntênhk hôiv tâus cêr tsênhv zos qơư siz njiz vênhx huôv ntiêx têz. Iz lênhx nghệ nhân tuôx txix Thủ đô Viêng Chăn, têz qơưk Lào puz pâuz, cxaz chuôz ntênhk hôiv đruôk tôngx nxêz tôngx Đông Nam Á shông 2026 zos tỉnh Lầm Đồng tsưr tsix, Đoàn nghệ nhân tuôx txix têz qơưk muôx nxư ntâu tưz chox tuôx ntơưv no têx đruôk tôngx nxêz tôngx, tsông yo lok six jông txơưr thiêz Đà Lạt-Lâm Đồng cux tưz tsês chiê trâu chor nghệ nhân lok six ntâu kror jông, shir phaz: “Chor diễn viên Lào hnuz no hnar tiêz Lào, câur fuôv Lào lok six jông. Nhoz Lâm Đồng ntâu qơư lok six jông jav, qiv hơưv lax. Muôx ntâu zav pax jông. Pêx xênhv cux sưv jê thiêz muôx ntâu zav nox kaz”.

Hâur Ntênhk hôiv Đruôk tôngx nxêz tôngx Đông Nam Á shông 2025, Ntênhk hôiv tâus cêr tâu tsưr tsix iz ndis thax tsav Hồ Xuân Hương-Đà Lạt tưz tsik zos jiês chiê piêr pâuz, mak tsênhv zos kror paz siz txuôk đros côngv thôngx mênhx cxưx, têx têz qơưk hâur thax tsav thôngz đhâu vênhx huôv đruôk tôngx nxêz tôngx-zav di sản tsiv gri. Têx suôz đruôk tôngx nxêz tôngx tâu ntâuk đros nxê ntưk nhoz Đà Lạt tsênhk hêik txos sik côngv siêz thiêz sir jos tuôr tsês têx vênhx huôv jông cxôngx nzor hâur luz nênhx yiêz nhiv no./.

TTTN-Lik Thox cxêik nhênhv