Paz uô tsêr nhoz, krêz hâu cêr trâu têx chuôz zis pluôs Lai Châu muôx luz nênhx truôx tuk

Tix lâus Chinh Xênhv Zax nhoz jok Dền Thàng A, xã Dào San, huyện Phong Thổ, tỉnh Lai Châu tưz muôx ntu zos chuôz zis pluôs; 4 lênhx nênhs hâur chuôz zis phênhv sâu tâu chênhr zos khov trâu têx liêx têz niêv txir muôz thâuv tix lâus pheiz chuôz gơưk 2 niêv txir muk nhoz gơưk. Luz tsêr đar xar muôx 20 xưv phaz muôz shôngz ntông uô txix shông 2019 tưz puôk tsuôx ntâu, tsi yuô jông nhoz, khênhr trâus xâu nas, yâu chuô. Khov têz qơưk muôz paz 40 tsov đeiv thiêz kêr txeik nzir 120 tsov đeiv, tix lâus  tưz cxiv uô tâu vax tsêr khor truôx, đar đuô nhoz: “Tâu têz qơưk paz thiêz cur cux txuôs, bax tâu mê njik chiê uô tsêr nhoz. Nhiv no tâu tsôngv pêx xênhv paz hnuz côngz, cur kêr txeik nzir têx cưr tix nênhx tsa iz lênhs iz kro mê njik viv li cux uô tâu vax tsêr truôx khor lơưv”.

Chiê luôs hâux lưv paz uô tsêr nhoz trâu têx chuôz zis pluôs, chuôz zis zuôr xar pluôs  tâu fuô uô trơưk cui tinhv, zos lênhx nênhs tâu paz max, cơ quan muôx vax huôv tưz hux jos đros hâu nov cxuô thax tsav qơư qênhz shuôs chor chuôz zis zuôr tâu paz cxiv uô yiêz ntơư têx vax tsêr nhoz thiêz sâu bê chiê heik trâu têx hloz pâuz, muôx tsưr ziv paz. Đros trâu têz qơưk pênhr paz, cxuô thax tsav cux sir jos uô luôs hâux lưv yax kriê, vênhv tôngv pêx xênhv hâur qơư nhoz paz nzir nhiêx txiêx, hnuz côngz chiê paz uô tsêr nhoz trâu têx chuôz zis pluôs, chuôz zis zuôr xar pluôs. Zơưv Nguyễn Văn Tuấn, Phưv tsar Phongx kinh tế cxiv uô têx côngz trênhx huyện Phong Thổ, tỉnh Lai Châu heik pâuz: “Txix ciês hâur shôngk shông, Ủy ban huyện tưz chox kriê Phongx kinh tế cxiv uô têx côngz trênhx muk cxuô xã chiê Ủy ban cxuô xã qênhz shuôs thiêz đas cir fuô uô luôs hâux lưv heik sâuv hâur shông. Txos nhiv no, têx chuôz zis tưz cxiv uô tiêr thiêz muôz nhiêx uô tsêr tâu zuôr xar 5 tyv đeiv trâu chor chuôz zis cxiv uô yiêz xar muôx 300 chuôz zis thiêz zuôr xar 30 chuôz zis kho đuô”.

Huyện Phong Thổ muôx 17 xã, thị trấn mak muôx 12 xã zos xã txov nhêv; têx chuôz zis pluôs hâur huyện tsav zuôr xar 28%. Txơưv kinh tế, xã hội tsênhv yuôr ntâu txov nhêv, taz sik đros thiêz siz hluz siz paz, tsi chiê lênhx nênhs tưs trâus pôngz kaz, phôngz yaox sik đros paz uô tsêr nhoz trâu têx chuôz zis pluôs, chuôz zis txov nhêv tưz tâu cxuô cấp, cxuô ngênhx hâur thax tsav fuô uô đêz đar trâu cxuô qơư. Pos Mai Thị Hồng Sim, Phưv chủ tịch Ủy ban huyện heik pâuz: Txix shông 2022 txos nhiv no, ntơưv qơư paz max uô tsêr nhoz trâu zuôr xar 1.200 chuôz zis pluôs, chuôz zis zuôr xar pluôs, paz tsôngv lax pêx xênhv hla đhâu phiv liv chiê truôx tuk luz nênhx, huôv tsar uô nox uô hâuk:“Phong Thổ fuô uô têz qơưk tsaz yênhx txo grêk cêr pluôs, chor chuôz zis tâu paz lơưr đêx anr zos iz cxênhz ntâu ziv chuôz zis; têz qơưk tsaz yênhx huôv tsar kinh tế, xã hội thax tsav tsôngv box heir nênhs tsơưs thiêz tox siêz paz 200 ntâu chuôz zis. Huyện tưz muôz têx tsaz yênhx lok fuô uô cê chiê paz têx chuôz zis pluôs, chuôz zis txov nhêv cxiv uô khor truôx iz luz tsêr đar 30 xưv phaz, thiêz iz chuôz zis tâu paz 40 tsov đeiv. Têx pênhr co tưz paz tsôngv pêx xênhv muôx nzir nhiêx txiêx cxiv kho vax tsêr, cux li uô đuô yiêz chiê truôx tuk luz nênhx”.

   Tas nro tỉnh Lai Châu nhiv no tsênhv yuôr zuôr xar 3 cxênhz chuôz zis pêx xênhv tsuv tâu paz uô tsêr nhoz, hâur ntơư tsuv cxiv uô đuô vax tsêr yiêz zos 2 cxênhz ntâu luz tsêr. Hâur shông zuôr txos, luôs hâux lưv paz cxiv uô tsêr nhoz trâu têx chuôz zis pluôs, chuôz zis zuôr xar pluôs tâu xav tinhv zos hâux lưv zov chênhr hâur thax tsav qơư. Zơưv Hoàng Kiều Anh, Phưv Chủ tịch Ủy ban MTTQ VN tỉnh Lai Châu heik pâuz: “Chiê hu zâuv nzir pênhr jos paz uô tsêr nhoz trâu têx chuôz zis pluôs, chuôz zis txov nhêv hâur thax tsav tỉnh, MTTQ tỉnh tsênhv hux jos đros cxuô cơ quan, taz viv, ntơưv qơư sir jos yax kriê, vênhv tôngv cán bộ công chức, viên chức, đoàn viên, hội viên thiêz tsôngv pêx xênhv sik đros paz uô. Tiv 2, fuô uô jông cxuô luôs hâux lưv, tsưr ziv chiê vênhv tôngv, hu zâuv sơưr đơưk sik đros paz nhiêx txiêx, hnuz côngz đas jos lok sik têx chuôz laov cxiv tsa. Tỉnh têx sir jos tưz uô tsênhz mênhx hâur Ủy ban tỉnh li tsưr ziv, hâur co uô cov tiêr luôs hâux lưv paz uô tsêr nhoz trâu têx chuôz zis pluôs, chuôz zis txov nhêv hâur thax tsav lok shông 2025”./.

Khắc Kiên-Riê Lâux cxeik, nhênhv