Khưx phưx qênhx shênhx khiêr têz qơưk tsi trơưk chei nhoz thax tsav ntus đriv Sơn La

Nhoz zuk kuz têz kuz qơư luz nênhx txov nhêv, xar tiêk muk nhoz đrâuv luôs 2 chas têz qơưk zuôr jông đuô, tix lâus Cxiv Xênhv Zax nhoz jok Huổi Men, xã Mường Lạn, huyện Sốp Cộp, Sơn La 2 niêv txir tưz quyết tinhv yêik muk nhoz  qơư yiêz. Taz sik, kror uô tix lâus Cxiv pâuz tâu, đhâu 7 shông nhoz qơư yiêz cux tsi trơưk li siêz xar: “Shông 2016, đhâu thâuv 2 niêv txir seiz lax, sik thôngx ziv tưz siz zâuv muk uô jos, seiz jor iz vax tsơưz nhoz tỉnh Bò kẹo (Lào). Muk uô jos lok six txov nhêv cơưk, tsi xưk li siêz xar, uô lok tsi txâuk nox. Seiz jor vax tsơưz tâu 6 shông, cur pov txov nhêv hênhr, tsi muôx cưr tix nênhx tsa, tsi muôx tsar jok, công an nhoz no, tsi muôx ntâuz ntơưr....viv li lok six phiv liv, cur 2 niêv txir tưz seiz lax siz zâuv tror lok zuk têz qơưk. Txos tsiêz, thâuv hli 2/2024 pêz tưz tror kaz lok Việt Nam”.

Thâuv njiz trâus têx li heik sâuv, tix lâus Cxiv Xênhv Zax thiêx xar txos lis viv tưz njênhs thiêz mnôngs trơưk luôs lưv tus heik, muk uô jos saz têz qơưk đrâuv mak zuôr muôx phênhv sâu txix 30-40 tsov đeiv iz hlik, taz sik tsênhz tiês tix lâus chuôz zis tsuôk tâu nhos 15-16 tsov đeiv iz shông xưz, tsi txâuk nox, tsi txâuk zôngv. Muôx têx, mê nhuôv cux tsi tâu muk cơưv ntâuz ntơưr xưk luôs lưv tus: “Cur chuôz zis muôx 2 tus nhuôv, iz tus 6 shông, iz tus 9 shông cux tsi tâu muk cơưv ntơưr. Cur cux lok six xar chiê mê nhuôv muk cơưv txux chi, têx nhuôs lok cux xar muk cơưv ntơưr, taz sik nhoz saz têz qơưk đrâuv pêz tsi muôx ntâuz ntơưr viv li tsi tâu muk cơưv”.

Hmôngr jông thâuv tror lok têz qơưk, tix lâus Cxiv Xênhv Zax chuôz zis tưz tâu cấp ủy, hâu nov ntơưv qơư thiêz tsôngv cưr tix nênhx tsa sơưr đơưk hâur jok cêr moz siêz, paz max txos chiê truôx tuk luz nênhx. Zơưv Hua Xênhv Thox, Bí thư chi bộ, Tsar jok Huổi Men, xã Mường Lạn, huyện Sốp Cộp heik pâuz, tix lâus Cxiv chuôz zis cux zos iz kro chiê jok yax kriê, vênhv tôngv tsôngv niêv txir lax pêx xênhv sơưr đơưk tsi muk lol, khiêr têz qơưk tsi trơưk chei: “Hâur ntu chuôz zis tror lok hâur thax tsav qơư, têx hloz seiz car jêx jok cux tưz cơưv pêx xênhv thiêz phênhz ar trâu chuôz zis uô tsêr nhoz chiê truôx tuk luz nênhx, iz chas ntơư cux heik tsôngv lax pêx xênhv sơưr đơưk sik đros paz hnuz côngz đas jos chiê paz chuôz zis cxiv uô vax tsêr”.

Co tsuôk zos iz hâur 37 chuôz zis, muôx 180 lênhx nênhs khiêr têz qơưk tsi trơưk chei lơưr Cơ quan muôx vax huôv huyện Sốp Cộp thôngz sâu txix shông 2020 txos nhiv no. Têx li heik co phênhv ntâu muôx nhoz thax tsav tox siêz đêz đrôngs, ntus đriv, thax tsav txov nhêv hâur huyện Sốp Cộp li: Têx xã Mường Lèo, Mượng Lạn, Nậm Lạnh, Sam Kha. Trung tá Quàng Văn Soạn, Phưv Tsar Công an huyện Sốp Cộp, tỉnh Sơn La heik pâuz: “Lok sâuv qir tiv pêx xênhv khiêr têz qơưk, xuz thơưx Công an huyện xav tinhv zos viv iz cxiê lênhx pêx xênhv trâus luôs lưv tus nziêk đas, hâuz zâuv tiêk, saz têz qơưk đrâuv liêx têz đar, zôngx ziv uô nox, uô jos tâu ntâu nhiêx txiêx..... Taz sik, tsênhz tiês tso pov, saz têz qơưk đrâuv tsi xưk li luôs heik, tsi zôngx ziv uô nox. Ntu jê lok no tưz muôx iz cxiê chuôz zis khiêr muk têz qơưk đrâuv tror lok hâur thax tsav qơư”.

Têx li heik sâuv cux tsuv muôx cơ quan muôx vax huôv, hâu nov ntơưv qơư thiêz côngv thôngx jêx jok sik hux jos truôx chiê yax kriê, gra siêz tsưr ziv jênhv pâuz trâu tsôngv lax pêx xênhv lok khiêr têz qơưk thiêz muk lol đhâu ntus đriv tsi trơưk chei têx tsi jông. Iz chas ntơư, tror muôz jông six hơưv huôv tsar kinh tế-xã hội, paz zok nriêr hâux lưv uô trâu tsôngv pêx xênhv ntơưv qơư...., sik đros tsưx phưv truôx tuk chính trị, thax tsav ntus đriv Sơn La./.

Lê Hạnh-Riê Lâux cxeik, nhênhv

Zaoz zux tox siêz sir jos hlôngr yiêz

Yên Bái zos iz hâur têx tỉnh xuz thơưx nhoz tox siêz Tây Bắc uô hâux lưv seiz shuôk sik côngv đuô têx tsêr cơưv ntơưr. Lơưr co, txos nhiv no tas nro têx tsêr cơưv mê puôr lênhx sik côngv lok tsênhv qơư tsênhv. Txix co cơ sở cxuô zav chiê kriê ntơưr tâu taz por lơưr trơưk ploz tsênhr. Nhoz têx tsêr cơưv shir phaz no, đrâuv taz por tsaz yênhx cơưv lơưr cui tênhv, tas nro têx huôx tôngv đrâuv six hơưv cơưv ntơưr puôr lênhx ndar txos chuôz cxaz yênhx tưv, pênhr xưv trâu shux xênhz. Cưk kriê Hà Việt Thành, Hiệu trưởng Tsêr cơưv cxênhx iz thiêz cxênhx oz Suối Giàng, huyện Văn Chấn, qơư muôx 100% shux xênhz zos mê nhuôk tsôngv box mênhx cxưx Hmôngz pheiz kênh: “Coaz tsôngv tiv zix zos hâux lưv kriê thiêz cơưv ntơưr huv đros thax tsav qơư, shux xênhz lok six shir phaz, muk cơưv ntơưr cxix cxuô cux xưk li sir jos cxaz chuôz têx huôx tôngv. Shux xênhz gruôs cơưv ntơưr thâuv tưs cux tax 100%”.

          Lơưr Bộ ploz tsênhr zos UB tỉnh Yên Bái tso tơưv, “ Tsêr cơưv shir phaz” taz por 20 ploz tsênhr tsênhv tsênhz, muôx 8 ploz tsênhr lok tênhx qơư tsêr cơưv, 6 ploz tsênhr lok tsưr tsix kriê ntơưr thiêz têx huôx tôngv zaoz zux; 6 ploz tsênhr lok têx coaz siv hâur thiêz đrâuv tsêr cơưv. Zơưv Đào Anh Tuấn, Phưv giám đốc Sở zaoz zux thiêz thox cxov tỉnh Yên Bái puz pâuz: “Cxiv tsa “tsêr cơưv shir phaz” ndar txos 3 ploz tsênhr: siz hluz-taz por-seiz jông. Chiê uô tâu têx ploz tsênhr co, iz lênhx cưk kriê thâuv tưs cux tsuv seiz njôngr zuk, hlôngr yiêz jênhv pâuz, txix co tsưr tsix têx huôx tôngv kriê ntơưr, zaoz zux chiê muôx tâu tênhx qơư mak mê nhuôk shux xênhz thâuv tưs cux pov tâu hluz, tâu taz por thiêz seiz tâus”.

          Hâur côngz xưv thox cxov hâux lưv uô, Yên Bái cux tsênhv pâuz ndaz ndơưv thiêz uô lơưr công nghệ thiêz hlôngr yiêz số li huôv tsar chiê thox cxov têx lênhx nênhs lox tôngv muôx pênhr xưv, tsi taz tuôv zênhv zoz qơưx tiv phaz mak tsênhv ndar txos muk uô hâux lưv saz đrâuv têz qơưk. Zơưv Đỗ Duy Thái, Phưv Hiệu trưởng Tsêr cơưv cao đẳng hâux lưv Yên Bái puz pâuz: “Lok hâux lưv cxiv tsa tsaz yênhx thox cxov hâur tsêr cơưv ntơưr đrâuv hâux lưv sik côngv thox cxov đros têx têz qơưk đros têx tsaz yênhx cấp ASEAN thiêz cấp têz qơưk mak tsêr cơưv tsênhv sik côngv đros têx doanh nghiệp chiê cxiv tsa tsaz yênhx thox cxov chiê shux xênhz thâuv tơưv shux muôx yênhx tưv thiêz pênhr xưv uô hâux lưv trơưk têx doanh nghiệp li zoz qơưx”.

          Zơưv Shôngx A Dinh, Phưv Chủ tịch UB xã Nậm Có, huyện Mù Cang Chải puz pâuz, xã muôx 1 cxênhz ntâu lênhx nênhs tsi pâuz ntơưr, hâur co phênhv ntâu zos pox niêv, hnuz nhôngs txix 15 txos 60 shông. Uô tsaz yênhx têz qơưk li qơư tsov txos, cấp ủy, chính quyênx tiv phaz tưz sik côngv đros têx chiz coaz chuyên môn, têx tsêr cơưv krêz lớp kriê hâur pâus ntơưr. Iz shôngk đhâu, xã tưz krêz 4 lớp kriê trâu 120 lênhx học viên. Thâuv cơưv tâu hâur pâus ntơưr têx pox niêv truôx siêz đuô cxaz chuôz tsaz yênhx cơưv cxênhx iz: “Têx nganhx, đoanx thêv hâur xã sik côngv đros phongx zaoz zux huyện, têx tsêr cơưv seiz shuôk têx lênhx nênhs tsi pâuz ntơưr thôngz đhâu côngz xưv qênhz yuôx zaoz zux yênhx shông. Txix co thôngz sâu, krêz lớp kriê hâur pâus ntơưr hâur têx shông lơưr co, chiê ntu zuôr txos sâuv thax tsav xã tsi yuôr lênhx nênhs tsi pâuz ntơưr”.

          Lơưr Ub tỉnh Yên Bái, shông cơưv 2023-2024, tas nro tỉnh muôx 400/451 qơư zaoz zux tâu côngz jênhv tax ploz tsênhr “Tsêr cơưv shir phaz” (tax 89%). 80% ntâu qơư zaoz zux tax ploz tsênhr “Tsêr cơưv hur jông” thiêz muôx nhos 53% qơư zaoz zux tax ploz tsênhr “Tsêr cơưv hlôngr yiêz số”.

          Tas nro tỉnh muôx 342 tsêr cơưv mê nhuôk zâu thiêz phổ thôngz tax ploz tsênhr têz qơưk (tsav 77% ntâu ) hâur co muôx 94 tsêr cơưv tax ploz tsênhr têz qơưk độ 2; chuôz ndê 36 tsêr cơưv pir đros shông tov ntêx. Têx cơ sở cxuô zav hâur tsêr cơưv tror tâu tsov cưv yưv pênhr, tuôv zênhv tâu zoz qơưx yiêz lok seiz car, hlôngr yiêz tsưr ziv kriê ntơưr, txos nhiv no chor tsêr cơưv truôx jông tax 88%.

          Viv iz Yên Bái hur jông, shir phaz, vênhv thix zaoz zux nhoz tỉnh tox siêz no tsênhv muôx têx trus hlôngr yiêz sei, truôx vênhs, sir jos cov huôv tsar chuôs têx tỉnh nhoz tiêx đras lok hâux lưv zaoz zux./.

Đinh Tuấn- Txâur Vax cxeik nhênhv