Cxiv kho đuô têx côngz trênhx, cêr muk lol trâus puôk tsuôx nhoz tox siêz Ngọc Chiến

Iz lênhx nênhs muôz ar têz, ntâu lênhx txơưr đuô paz chuôz zênhx, hnuz côngz đas jos, tas nro sơưr đơưk siz thôngx siêz, sik đros uô.....khov li co têx cêr muk lol tưz tâu cxiv kho, uô đuô yiêz; ntâu côngz trênhx tưz tâu cxiv tsa nhoz thax tsav tox siêz Ngọc Chiến. Thiêz chênhr tsôngv pêx xênhv sik thôngx siêz, siz paz li ntơư cux tưz paz tror cxiv kho tâu têx ntu cêr trâus puôk tsuôx, têx tus qox trâus đêx nas cuôr yôngz, ar poz cxuz. Tix lâus Lò Văn Lôn, Bí thư chi bộ, tsar jok Đông Xuông, xã Ngọc Chiến heik:“Hâur coz nas lox nhiv kruôr đhâu, pêz jok trâus ruôr hiêv hnhar lok têx chuôz zênhx chuôz tav thiêz côngz trênhx, lar heik zos tus qox đei sơưr đơưk khênhr muk lol đhâu đêx ntơư trâus đêx nas cuôr yôngz, tsi jông tas. Chor nênhs siêz jông paz 110 tsov đeiv, pêz cơưv jêx jok, njuôk xav tsuv tas 300 tsov đeiv thiêx cxiv uô, kho tâu tus qox co, pêz tưz yax kriê, vênhv tôngv tsôngv cưr tix nênhx tsa, sơưr đơưk cux thôngx ziv, jông siêz uô, sik đros paz hnuz côngz đas jos, chuôz zênhx, tus muôx tsơưs paz tsơưs, lênhx tưs muôx ntâu paz ntâu, siz chos paz tâu 200 tsov đeiv ntâu chiê uô đuô tus qox heik sâuv”.

Txix canr bôv xã, jok, txos tsôngv lax pêx xênhv, niêx hnuz sơưr đơưk puôr lênhx tuôx ntơưv têx côngz trênhx, iz lênhs uô iz zav hâux lưv, sik đros paz hnuz côngz đas jos chiê jok nzor hla đhâu txov nhêv, phiv liv. Niêv lâul Quàng Thị Xiên, nhoz jok Đông Xuông, xã Ngọc Chiến heik:“Đêx nas uô qox, cêr muk lol hâur jok trâus puôk tsuôx, tsi jông tas, lok six phiv liv muk lol. Cur chuôz zis cux paz 2 tsov đeiv thiêz đros tsôngv box hâur jok cxiv uô, kho đuô cêr. Nhiv no muôx cêr jông muk lơưv, pêz shir phaz hênhr”.

Chor chuôz zis hmôngr tsi jông vax tsêr, chuôz zênhx chuôz tav uz no trâus đêx nas uô ruôr hiêv, puôk tsuôx cux jux juk tâu cxiv kho, uô đuô. Têx chuôz zis txov nhêv tưz truôx tuk qơư nhoz, tâu paz max vuôk vor tsêr txos trâu têx chuôz zênhx chuôz tav thiêz nhiêx txiêx chiê cxiv kho luz nênhx..., hâur co muôx niêv lâul Cuz Xênhv Thox, nhoz jok Chom Khâu, xã Ngọc Chiến:“Cur chuôz zis lok six txov nhêv cơưk, vax tsêr trâus nas chuô uô ruôr hiêv, puôk tsuôx tas. Muôx têz qơưk, doanh nghiệp paz, no zos iz kro huv lok six muôx liv trâu chuôz zis, paz cur chuôz zis muôx qơư gâuv yar gâuv nas hâur ntu zuôr txos”.

Coz nas chuô sôr 03 hâur hlik hli 9/2024 tưz uô ruôr hiêv hnhar trâu xã Ngọc Chiến, iz lênhx nênhs trâus plox mông, yênhx châuv luz tsêr trâus puôk tsuôx tsuv yêik txar zênhx max muk nhoz qơư truôx tuk, yênhx puô ha blêx, jâuz tâuv trâus đêx nas ngaz, ar, poz jêz cxuz đros trâu ntâu ntu cêr muk lol trâus đêx cuôr yôngz, puôk tsuôx, tsi jông. Txơưv li ntơư, taz hâur ntu tsi tâu muôx 4 luz hlik, txix têx tsưr ziv jông thiêz tas nro cxix luôs chính trị hâur xã cêr sik thôngx siêz, sir jos paz, thax tsav trâus đêx nas uô ruôr hiêv nhoz Ngọc Chiến tưz jux juk huôv tsar, hlôngr yiêz. Hli 10/2024, đhâu thâuv phênhv ntâu truôx tuk luz nênhx trâu tsôngv box đros tsưr ziv “4 ntơưv qơư”, xã Ngọc Chiến tưz krêz côngz cxiv uô 21 côngz trênhx kho đuô têx trâus đêx nas uô puôk tsuôx, ruôr hiêv. Zơưv Lò Văn Thoa, Chủ tịch Ủy ban xã Ngọc Chiến, huyện Mường La, Sơn La heik:“Xuz thơưx, pêz xav tinhv kror zov chênhr đuô hur si zos tsôngv pêx xênhv côngz đas jos sik đros paz cxiv kho, uô đuô têx côngz trênhx trâus đêx nas uô puôk tsuôx, tsi jông. Lar heik zos tas nro têz qơưk cêr moz siêz, paz trâu Ngọc Chiến, hâur ntu đhâu pêz txeik tâu lok six ntâu cxuô cấp, tsôngv niêv txir cưr tix nênhx tsa sơưr đơưk hâur cxuô thax tsav sâuv tas nro têz qơưk cêr sik pheiz kênh, nhiêx txiêx muôz paz”.

Trơưk li hâu nov xã Ngọc Chiến, txos nhiv no, hâur thax tsav qơư tưz hu lơưk sơưr đơưk sik đros paz thiêz tưz paz tâu iz cxênhz ntâu đeiv vuôk vor tsêr, iz cxênhz ntâu poz huv zos têx zav nox, chuôz zênhx zuôr trâus txos đros trâu cxiv uô 10 tus qox đei, xav hur si tas muôx 10 tyv đeiv ntâu.

Têx yuôz đês tror tâu cir tis sâuv tus đêx Chiến; cxuô tsar zav pax tror tơưs jông uô yiêz cxiê qơư; thax tsav trâus đêx nas uô ruôr hiêv mak câuk hmaz câuk ntông, đrox tsuôs qir hlar thiêz tuôx jov jơưk.... Hur tiz si têx li heik sâuv tso pov, ntơư zos canr bôv thiêz tsôngv pêx xênhv xã Ngọc Chiến cêr sik thôngx siêz, sir jos đhâu thâuv cxiv kho têx tsi jông, zuôr siz chos cxiv tsa thax tsav qơư no ziv hnuz ziv huôv tsar jông đuô./.

                                                                                                              Lê Hạnh-Riê Lâux cxeik, nhênhv

Lào Cai uô truôx luôs hâux lưv taz por zaoz thôngz

          Uô jênhv vưv sâuv chinhz yênhx truôx siêz, uô txos qơư, tsi muôx thax tsav txưr, txix ciês hâur shôngk shông 2024 txos nhiv no, lưx lươngv cảnh sát zaoz thôngz, Công an tỉnh Lào Cai tưz uô ntâuz ntơưr yưr lir 15 cxênhz ntâu luz yêz uô cxâuv; sâu tsês 3 cxênhz 600 ntơưr tso chei tsar yêz; sâu tsês 7 cxênhz ntâu luz yêz cxuô zav; tas nro nhiêx txiêx xưv bluô zos zuôr xar 38 tỷ đeiv.

          Đại tá Phạm Gia Chiến, Tsar phongx cảnh sát zaoz thôngz- Công an tỉnh Lào Cai puz pâuz:“Pêz chêx chôngk lok 5 qir tiv uô muôx yưv txiêz nanv zaoz thôngz, muôx hâuk chơưr bia thâuv tsar yêz, muk chênhr. Đros 2 qir tiv no, pêz hnuz tưs cux seiz car; pov lênhx nênhs tsar yêz muk chênhr mak tsuv yưr lir”.

          Đrâuv tsưr tsix qênhz yuôx, seiz car, yưr lir, lưx lươngv cảnh sát zaoz thôngz tỉnh Lào Cai tsênhv cxơưz tiês yax mông taz por zaoz thôngz txix ntâu tsưr ziv li yax mông hâur têx jiês ngoại khóa ntơưv tsêr cơưv ntơưr; yax mông đhâu loa nta suôz sâuv têx cêr muk lok…Ciês hâur têx hnuz no thâuv ntux pok huôz ntâu tsưr ziv khơưk muôz ntâuz ntơưr canhv pov sâuv têx đơưv siêz riêz nênhs li niêv cêr 4D muk Sa Pa. Tix lâuk Nguyễn Thanh Sơn, tsar yêz ju lix tuôx txix Hà Nội pheiz kênh:“Ntux pok huôz mak lok six lax muk lok, tâu heik kriê mak zuk ziv tsưv ziv đuô xưz. Muôx heik kriê paz zuk thiêz têx lênhx nênhs txơưr tâu taz por đuô, cê taz por trâu zuk cê taz por trâu tsôngv kruô”

          Chiê taz por trâu lênhx nênhs thiêz yêz muk lok, hâur shông 2024, lưx lươngv muôx txơưx jênhv nhoz Lào Cai tưz seiz shuôk 5 cxênhz ntâu qơư tsi taz por lok zaoz thôngz, hâur co muôx 6 qơư tâu seiz zos riêz nênhs sâuv têx niêv cêr chiê khưx phưx, sir jos yưr lir chiê hâur shông 2025. Đrâuv co, chêx chôngk cxiv tsa trâur nuv trôngx vas tsêr cơưv taz por sâuv tas nro tỉnh. Zơưv Đoàn Văn Huỳnh, Giám đốc Ban seiz car, kho đuô cêr ar tỉnh Lào Cai heik:“Đros thiêz Lào Cai, phênhv ntâu têx cêr muk lok puôr lênhx muôx tsêr cơưv ntơưr. Li sâuv niêv cêr lox muôx 100 ntâu tsêr cơưv, yuôr têx cêr txơưr muôx 200 ntâu tsêr cơưv, tas nro puôr lênhx krêz uô trâur nuv. Pêz tsênhv sir jos hâur shông no zuôr uô tiêr luôk hâux lưv no”./.

                                                                                                         An Kiên-Txâur Vax cxeik nhênhv