VOV4.Sêdang - Pơreăng COVID-19 dế tâ tú ó, tơdroăng hnê hriâm kal athế rak vế, pêi pro mâu tơdroăng ki hbrâ mơdât tâ tú dêi pơreăng xuân athế pê klêi hnoăng cheăng hnê hriâm a mâu hngêi trung a Dak Lak, xua nôkố dế trâm hên pá puât, xuân pơloăng mơnuá há. Hbrâ rơnáu, pêi pro tơtro tung tơdroăng hơ’lêh nhên hnoăng cheăng vâ ga chiâng tơdroăng ki kal khât tung kơvâ hnê hriâm tơdroăng cheăng a kơpong Dak Lak hnối vâ pêi pro klêi mâu tơdroăng cheăng ki hiăng pơcháu, cho pêi 2 hnoăng cheăng ki xiâm cho rế hnê hriâm tơniăn xuân hbrâ rơnáu mơdât pơreăng.

Klêi kơ’nâi vâ chê 3 pơla măng tĭng hnê hriâm tiô troăng hyôh Internet, khu  cô ƀă hok tro hngêi trung mâm non pơlê kân Phước An, tơring Krông Pač, kong pơlê Dak Lak hiăng hâk phiu, pói rơhêng vâ drêng châ xo tơdroăng pơtâng tối sap ing hâi lơ 4 khế 9, hok tro a “kơpong ngiât” kô vêh hriâm nếo. Laga, bu kơ'nâi 1 hâi hriâm tơŭm, Vi ƀan hnê ngăn tơring hiăng pơkâ mâu hngêi trung pơtê pơtân tơdroăng hriâm tơkŭm, mê kô athế hriâm online xua dế pơla kố, lâp kong pơlê, tơring xuân ối ai pơreăng tâ tú. Cô Trần Thị Nga, Kăn pơkuâ ngăn hngêi trung mâuh yău pơlê kân Phước An tối ăm ‘nâi, tơdroăng kố hiăng hbrâ rơnáu hdrối, ôh tá xê tá hâi ‘nâi nhên, mê khoh chiâng hbrâ rơnáu tơniăn hdrối.

“Hngêi trung mâm non a pơlê kân đi đo hbrâ rơnáu vâ mâu vâi o vâi muăn lăm troh a hngêi trung. Hngêi trung xuân hiăng veăng tơkŭm pro mơgrúa lĕm tung lâm hriâm, a plông, tíu tâ tá tơkŭm ăm mâu vâi thái cô ‘mâi rơnuâ tiô kơ tơdroăng hiăng hbrâ rơnáu. Hngêi trung hiăng hnê troh tâi tâng mâu thái cô, kăn ƀô̆ ki cheăng ‘na hnoăng cheăng hbrâ rơnáu, mơdât mâu tơdroăng ki hnê mơhno dêi râ kơpêng. Tơkŭm thế mâu vâi cô pêi pro klêi mâu video hnê mơhno ăm mâu vâi o, vâi muăn ‘na túa rêh ối, ‘na hnoăng cheăng hbrâ tơplâ mơdât pơreăng ƀă mâu ƀai hriâm ki kal ăm mâu vâi hdrêng châ 5 hơnăm, pơtroh ăm nôu pâ vâi muăn vâ nôu pâ vâi ‘nâi plĕng nhên ƀă hnối hnê tối mâu kuăn ‘nĕng a hngêi”.

Môi to lâm hnê hriâm tơkŭm a pơlê kân Phước An, tơring Krông Pač

Ƀă mâu râ hriâm ki kân tâ, môi tiah mâu vâi o, vâi muăm ing lâm 1 troh lâm 12, hngêi trung yăo yuk thưong xuên, pakĭng tơdroăng ki hbrâ rơnáu ‘na mâu tơdroăng ki mơdât pơreăng, mâu hngêi trung xuân hiăng rơnáu mâu túa hnê hriâm, rơnêu chương ƀai ki hriâm tiô kơ chôu phut, hâi khế, tơtro tung tơrêm kơpong, rêm tơdroăng cheăng vâ ăm ga i tơƀrê. Thái Đặng Như Sang, Kăn phŏ pơkuâ ngăn hngêi trung râ má môi Phước An, pơlê kân Phước An, tơring Krông Pač, kong pơlê Dak Lak tối ăm ‘nâi:

“Khu thái cô pơkuâ ngăn hngêi trung hiăng hlê plĕng nhên tơdroăng “tơplâ ƀă pơreăng môi tiah tơplâ ƀă xâ” hbrâ rơnáu tuăn hiâm mơno vâ hơ’lêh túa hnê hriâm tiah a hâi kố, mê cho tơdroăng hnê hriâm mơ’no tung um tiô troăng hyôh Internet, xua mê, drêng ai tơdroăng ki lâi ‘lo ngin kô hbrâ tơdroăng ki hriâm ƀă troăng hyôh Internet. Tung pơla hnê hriâm tiah mê, ngin xuân hiăng hnê tối ăm mâu thái cô kal athế rah xo chôu phut ki tơ’lêi hlâu vâ tơkŭm hnê, mâu thái cô kô hnê mâu tơdroăng ki kal má môi, ki xiâm má môi ăm hok tro, tâng u ối chôu phut mê kô athế hnê hriâm vâ rơbot pêi pro mâu ƀai ki po rơdâ, trâu rơdâ tâ ăm hok tro”.

A tơring ki ối a kơpong hơngế hơngo, cho tơring Krông Bông, Hô̆i đong Đô̆i tơring Krông Bông hiăng tơkŭm po lâm “Kên khêi”, xua khu droh rơtăm, sinh viên hnê hriâm ăm hok tro a hngêi hok tro rêh ối. Lối 1 khế kố, pakĭng tơdroăng hriâm online, ai mâu sinh viên dêi hngêi trung Đại học Đà Nẵng, rêm hâi tơdah xo mâu vâi o hok tro râ má môi prếo vêh dêi a hngêi tơná vâ hnê hriâm. Kố cho mâu vâi o ki trâm tơdroăng ki xahpá ôh tá ai kơmăi vi tĭnh, phôn râng kŏng vâ hriâm mơ’no tơdrêng tung um. Sinh viên Nguyễn Bích Phương tối ăm ‘nâi, xua pơreăng COVID-19 mê o ôh tá khoh lăm troh a Đà Nẵng, mê athế hriâm online dêi a hngêi. Pakĭng tơdroăng hriâm, o ối mơhnŏng pleăng dêi hnoăng cheăng gum lâm hriâm “Kên khêi”.

“Tiô tơdroăng ăm ‘nâi, a tơring ai po tơdroăng lâm hriâm “Kên khêi” vâ gum ăm vâi o ki ai tơdroăng rêh ối xahpá lơ tá hâi teăm châ hriâm online. Á hiăng tơmiât kô veăng kum môi iâ hnoăng cheăng tơná vâ kum vâi o hriâm online tung rơnó pơreăng ki xâu xía kố. Drêng hlo mâu vâi o châ hriâm đi đo rêm hâi, mê á hlo phiu ro ó khât ăm mâu vâi o xua hiăng châ hriâm tŭm mâu ƀai”.

Lâm hriâm “Kên khêi” a tơring Krông Bông

Krông Bông cho tơring ối hơngế hơngo, xahpá má môi dêi kong pơlê Dak Lak. A tơring kố, drêng pơreăng COVID-19 hiăng chiá châ mơdât, hok tro hngêi trung râ má 3 hiăng châ lăm troh a hngêi trung hriâm. Krê hok tro râ má môi xuân ối hriâm online. Ngoh Bùi Tấn Lợi, Kăn hnê ngăn Hô̆i đong Đô̆i tơring Krông Bông tối ăm ‘nâi: Tơdroăng ki tơkŭm po lâm “Kên khêi” a mâu thôn, pơlê cho vâ veăng kum ăm mâi vâi o hriâm tung rơnó ai pơreăng. Tiah mê, mâu ngế ki mơhnŏng pleăng dêi hnoăng cheăng lăm troh a hngêi dêi hok tro lơ tơkŭm 2 troh 3 ngế vâi o hriâm dêi a hngêi tơná vâ hnê tối dêi pó túa hriâm ƀai ƀă xuân athế rak vế, pêi pro tơdroăng hbrâ tơplâ mơdât pơreăng COVID-19.

“Kố cho lâm ki nếo po vâ tơniăn ăm mâu vâi o châ hriâm. Mâu ngế ki pleăng hnoăng cheăng cho mâu vâi pú droh rơtăm, đoân viên, sinh viên, mâu thái cô ki pơkuâ ngăn vâi djâ kơmăi vi tĭnh, phôn râng kŏng troh a hngêi mâu vâi o. Dế nôkố, ngin dế po ai 10 to lâm hriâm. Kố cho túa pêi pro ki nếo ƀă ai pơxúa kân khât tung roh nôkố ƀă tung la ngiâ”.

Drêng dế ối trâm pá puât xua pơreăng pơtối tâ tú, Vi ƀan hnê ngăn kong pơlê Dak Lak hiăng pơcháu ăm tơrêm tơring, cheăm pơkâ dêi xêh túa hnê hriâm ăm ga i tơtro. Jâ Lê Thị Kim Oanh, Kăn phŏ ngăn ‘na hnê hriâm kong pơlê Dak Lak tối ăm ‘nâi, kơvâ hnê hriâm kong pơlê Dak Lak hiăng hlê plĕng nhên, tŭm têk mâu tơdroăng ki xahpá ƀă pơloăng mơnúa tung pơla ai pơreăng tâ tú xâu xía ƀă ton tĭn tiah dế nôkố. Khu hnê hriâm hiăng pâ thế Vi ƀan hnê ngăn kong pơlê kơjo kum rêm tơdroăng cheăng vâ hơ’lêh túa hnê hriâm, vâ ga tơniăn tơtro tung hnê hriâm, la ki xiâm dêi tơdroăng ki dâi khât dêi hnê hriâm ôh tá khoh chiâng hơ’lêh phá tơ-ê.

“Pakĭng mâu hngêi trung hiăng hbrâ rơnáu tơplâ mơdât pơreăng tiah pơla hdrối kố nah, ối ai tơdroăng ki hbrâ mơjiâng hên túa hnê hriâm phá tơ-ê dêi pó, ngăn tiô kơ tơdroăng, kum pro ti lâi vâ tơdroăng hnê hriâm xuân tro tiô kơ tơdroăng nôkố. Ing mê, tơdroăng ki pơkâ pêi pro 2 tơdroăng cheăng, rế tơplâ mơdât pơreăng rế kring vế tơniăn ăm tơdroăng hnê hriâm dêi hngêi trung kô tro tiô tơdroăng pơkâ”.

Ƀă tơdroăng ki hbrâ rơnáu tŭm têk ahdrối, pêi pro tro tơdroăng tung pơla dế ai pơreăng COVID-19, kơvâ hnê hriâm a kong pơlê Dak Lak dế kơdo mơ-eăm kring vế tơniăn tơdroăng cheăng ƀă ‘na ki dâi khât tung hơnăm hriâm nếo tiô túa ki tơtro má môi.

VOV Tây Nguyên

Nhat Lisa tơplôu ƀă tơbleăng