VOV4.Sêdang - Tung pơla hdrối kố nah, kong pơlê Dak Lak hiăng ai lối 17 rơpâu ngế sap ing mâu kong pơlê peăng Hdroh vêh dêi ngi pơlê, pơklât thế klâ ối krê tiô pơkâ hbrâ mơdât pơreăng COVID-19. Rơtế amê, ai lối rơtuh ngế vêh ngi kơpong peăng Tơdế tơnêi têa, lo troh a peăng Kơnhŏng ki hngế hngo, xuân tơkâ luâ kong pơlê Dak Lak. Mâu khu râ, kơvâ cheăng, khu pú hên rơtế ƀă kuăn pơlê a kong pơlê hiăng kum kế kâ, hmê kơchâi, têa ôu tê kơtê ăm mâu ngế ki prôk a troăng ƀă ngế ki klâ ối krê hmiân tuăn hbrâ mơdât pơreăng. Tơdroăng cheăng kố hiăng veăng kum ăm rôh vêh dêi ngi pơlê ki trâm hên xơpá, tơbrêi tơbrêh chiá tơtô iâ.

Troăng prôk ing pơlê kong kân Hồ Chí Minh vêh a pơlê Quảng Nam, nâ Đỗ Thị Thanh Châu hiăng châ “tơdah xo” tŏng kum tá tơmeăm tá tuăn mơno. Drêng pơtê chêng a tíu vâi veăng kum ăm hmê kâ ƀă têa ôu pa ngiâ hngêi trung râ má péa Trần Phú, cheăm Hòa Phú, pơlê kong kơdrâm Ƀuôn Ma Thuột, kong pơlê Dak Lak, nâ tâ rơrêk tung hiâm mơno hlối ƀriê lo têa mâ:

“Ai hmê, têa ôu, têa tôu ro. Kơxo xuân ai vâi nâ o ăm o kŭn liăn. A tâ rơrêk tung hiâm mơno tơdroăng ki ‘nâi hơ-ui mê. Rôh apoăng prôk tâ khéa la drêng hiăng prôk a tâ ƀriê tung hiâm mơno hlo tơdroăng ki hơ-ui pâ hên ‘nâng vâi veăng hơlêm ăm pin hiăng tâ hơniâp ro tung hiâm mơno ƀă hmôu pơ ối pâ mâu vâi ngoh nâ ki veăng kum”.

Mâu ngế pleăng hnoăng tơná veăng pế hmê kơchâi a hơpiâp tŏng kum

Tung pơla hdrối kố nah, Khu lo tŏng veăng kong pơlê Dak Lak tơrŭm ƀă mâu Khu ai tuăn hơ-ui hiăng pế rơpâu hnoăng hmê kâ rêm hâi kum ăm kuăn pơlê ki lo ing mâu kong pơlê peăng Hdroh vêh. Mâu hmê kâ, hơhôp rơhé lơ kơ-ƀăn mi hiăng veăng hơlêm kơdroh ki rơlâi rơlo, pá puât dêi mâu ngế kuăn pơlê tung pơla prôk drô troăng vêh.

Jâ Trần Thị Phương Thu, Kăn phŏ hnê ngăn Khu lo tŏng veăng kong pơlê Dak Lak ăm ‘nâi: rêm hâi ai sap 5 rơpâu troh 6 rơpâu hnoăng hmê kâ châ mâu khu tŏng kum pế, hơpêap hmê kâ tŏng kum a rêm tíu tŏng kum drô troăng kân 14 (cho dêi cheăm Hòa Phú, pơlê kong kơdrâm Ƀuôn Ma Thuột). Khu kố hiăng tơkŭm xing xoăng, klâ hâi ƀă klâ tíu ki vâ tơdah vâ kơdroh kơxô̆ mơngế  tơkŭm krâm luâ râ a môi tíu.

“Nôkố, a mâu tíu gak ngăn mơdât pơreăng a mâu hơlâ troăng kân pơlê kong kơdrâm Ƀuôn Ma Thuột, kong pơlê hiăng hnê mơhno bú tối tơbleăng ƀă xing xoăng troăng ăm mâu tơring vâ tơdah kuăn pơlê ki vêh ing mâu tơring, tơkŭm test rĕng ƀă rah klâ ăm ối krê. Hlo ti mê, Khu lo tŏng veăng kong pơlê hiăng hnê mơhno ăm mâu tơring, pơlê krâm, pơlê kong krâm pơtối tơdah tŏng kum ăm mâu kuăn pơlê ‘na kế kâ, têa ôu. Hlối pơkâ troăng rơhlâ mơhnhôk, pro hơpiâp pế hmê kâ vâ kum ăm tơdroăng hbrâ mơdât pơreăng a kong pơlê”.

Mâu hmê kơchâ tâ xú lĕm pơtroh ăm mâu tíu kal tŏng kum

Ôh tá xê to a pơlê kong kơdrâm Ƀuôn Ma Thuột, mâu hâi hdrối nah mâu tơring dêi kong pơlê Dak Lak drô troăng kân 14, hên khu tŏng kum, mâu ki pleăng hnoăng tơná ƀă mâu khu dêi kong pơlê xuân hiăng tơrŭm tơkŭm po hên tíu vâ tŏng kum ăm mâu ngế ki prếo vêh dêi a pơlê ki prôk tơkâ luâ.

Tơdrêng ƀă tơdroăng cheăng tŏng kum mâu ngế ki prôk troăng, pơla hdrối kố nah, mâu khu grup ƀă kuăn pơlê a Dak Lak xuân tơkŭm po hơpiâp pơchên hmê kâ tê kơtê vâ kum ăm mâu ngế ki klâ ối krê tơchoâm pú hên. Jâ Hoàng Thị Thu Hương, Kăn hnê ngăn Khu vâi kơdrâi cheăm Xuân Phú, tơring Ea Kar pơkuâ  “Hơpiâp xơrô liăn’’ akố, tiô ăm ‘nâi, hơpiâp pế hmê kơchâi kố ai 100 ngế veăng, rêm hâi ai 5 ngế troh 10 ngế nâ o pơ’lêh dêi rơpó pế. Troh nôkố mâu nâ hiăng pế ăm lối 10 rơpâu hnoăng hmê kâ tê kơtê kum kuăn pơlê ki klâ ối krê.

“Ing tơdroăng ăm hlo khât kuăn pơlê vâ tối hên ngế lăm pêi cheăng kâ hơngế vâ vêh dêi a pơlê xiâm xơpá o khât ƀă rơpŏng hngêi ối hơngế ôh tá ai liăn, ôh tá châ chiân ăm hmê kâ, têa ôu. Mê ngin ki pế hmê xơrô liăn kố ƀă khu grup lăm mơhnhôk kuăn pơlê pơtối rak vế pêi pro ing ai rơnó ai pơreăng nah ta troh nôkố. Vâi nâ o akố vâ, hlối mơ-eăm pêi cheăng tá tuăn tá hiâm mơno, thăm nếo hên vâi nâ o ngin ôh tá êa mơhnhôk thế, la lâi vâi châ toh vâi lăm pêi veăng kum môi tiah tơdroăng cheăng dêi tung rơpŏng hngêi há. Ki apoăng ing mơhnhôk mâu rơpŏng ki ai kuăn ‘nĕng, ai mơngế tung rơpŏng hngêi klâ ối krê a kong pơlê lơ tơring veăng pế hmê kơchâi, vâ ‘nâi ngin pế hôm tơniăn krúa há, hôm kơhiâm, pêi hôm krúa há lơ ôh”.

Hmê kâ kum tê kơtê ăm mâu ngế ki prếo vêh hmiân tuăn klâ ối krê

Tiô pôa Đào Đức Hoàn, Kăn xiâm hnê ngăn Vi ƀan cheăm Xuân Phú, tung pơla hdrối kố nah ai lối 100 ngế vêh ing mâu kong pơlê peăng Hdroh vêh dêi a pơlê, dế klâ ối krê tơchoâm a mâu hngêi hôp kuăn pơlê a mâu thôn. Vâ kuăn pơlê hmiân tuăn mơ-eăm klâ ối krê, mâu kăn cheăm tơring ƀă mâu khu grup hiăng mơhnhôk mâu khu mơdró, mâu ngế ai tuăn hơ-ui veăng tơlo liăn phái ăm “Hơpiâp xơrô liăn”, kum ăm mâu kơpong klâ krê tơchoâm pú hên.

“Kuăn pơlê ki vêh rôh apoăng trâm hên xơpá. La klêi kơ’nâi môi péa hâi vâi hlo ‘na tơdroăng pế hmê kơchâi kâ xuân môi tiah tơdroăng pêi pro dêi kong pơlê ‘na hbrâ mơdât pơreăng mê vâi hmiân tuăn, rak vế pêi pro tro mâu pơkâ, tơdroăng pơkâ hbrâ mơdât pơreăng COVID-19. Troh nôkố cheăm Xuân Phú hiăng tơdah lối 1 rơpâu ngế tung mâu rôh vêh klâ ối krê a kong pơlê. Tâi tâng mâu ki mê ôh tá êa nâp liăn kâ hmê a mâu kơpong klâ krê. Nôkố tơdroăng hbrâ mơdât pơreăng dêi kơpong klâ krê ngin trâm hên tơ’lêi hlâu xua kuăn pơlê rơtế veăng kum ăm mâu ngế ki vêh prôk chêng prếo vêh dêi a pơlê”.

Mâu hmê kâ, rơhế lơ kơƀăn mi, kong kếo têa diâp ăm a kŏng mơngế ki prôk drô troăng ƀă mâu ngế klâ ối krê mơhno hiâm mơno pâ khât dêi kuăn pơlê a Dak Lak ƀă mâu tơdroăng xơpá. Tơdroăng ai tuăn hơ-ui pâ mê dêi mơngế kuăn pơlê a Dak Lak hiăng veăng “tơdah“ xo ăm rôh vêh a pơlê ki ối pá puât.

VOV Tây Nguyên

Gương tơplôu ƀă tơbleăng