VOV4.Sêdang - Kơxê lơ 14/10, a Hngêi Kuô̆k hô̆i, pôa Vương Đình Huệ, kăn xiâm hnê ngăn Kuô̆k hô̆i ƀă pôa Phạm Minh Chính, kăn pơkuâ ngăn Đảng, Chin phuh, Ngế pro xiâm hnê ngăn Chin phuh hiăng pơkuâ po rôh hôp pơla Đảng đoân Kuô̆k hô̆i ƀă Khu kăn pơkuâ Đảng, Chin phuh ‘na tơdroăng ki hbrâ ăm Hneăng hôp má péa, Kuô̆k hô̆i hneăng má 15 (tiô tối hdrối kô po a hâi lơ 20/10).

Tâ tá hneăng hôp

Tơpui mơgêi rôh hôp, pôa Vương Đình Huệ, kăn xiâm hnê ngăn Kuô̆k hô̆i ăm ‘nâi, troh nôkố, tâi tâng mâu tơdroăng cheăng hbrâ ăm Hneăng hôp má péa hiăng klêi ƀă tơdroăng ki vâ môi tuăn hên khât. Kăn xiâm hnê ngăn Kuô̆k hô̆i xuân pơkâ thế, kăn pơkuâ Kuô̆k hô̆i, Chin phuh, Hngêi tơleăng xiâm, Viê̆n séa ngăn arak luât, Vi ƀan xiâm Măt trâ̆n Tơnêi têa Việt Nam, 4 Ƀơrô cheăng Tơnêi têa pơtối pơkâ thế mâu kơ koan tơrŭm cheăng krá tơniăn ƀă dêi rơpó tung pơla tơkŭm po Hneăng hôp má péa vâ rĕng pơkâ tơleăng mâu tơdroăng ki ôh tá tơniăn.

Pôa Vương Đình Huệ, kăn xiâm hnê ngăn Kuô̆k hô̆i pơchân hnoăng cheăng hbrâ ăm Hneăng hôp má péa pôu tá tơngôu, athế rak tơniăn hbrâ mơdât pơreăng, tơniăn kring vế ƀă hnoăng cheăng tối tơbleăng tung um tơvi.

Katarina Nga tơplôu ƀă tơpbleăng