Kơvâ ngăn ‘na pơkeăng ƀă khăm pơlêt kong pơlê Dak Lak dế pêi pro krâu khât tung tơdroăng khăm pơlât, hbrâ mơdât ƀă pơreăng tơngê lo mơheăm dế xông tâ tú kố. Tiô Khu xiâm ngăn ‘na khăm pơlât dêi kong pơlê Dak Lak tối ăm ‘nâi, ing apoăng hơnăm troh nôkố, lâp kong pơlê hiăng châ hlo ai vâ chê 4 rơpâu 400 ngế tro tâ tú pơreăng tơngê lo mơheăm, tung mê, ai 2 ngê hlâ.

Pơreăng tơngê lo mơheăm xông tâ tú hên a khế 8 ƀă khế 9 kố nah, ai 4 rơpâu ngế tro tâ. Pơlê kong kơdrâm Ƀuôn Ma Thuột ƀă tơring Čư̆ Mgar cho 2 tíu ki ai kuăn pơlê tro tâ pơreăng tơngê lo mơheăm hên má môi. Drêng hlo pơreăng xông tâ tú ó tiah kố, kơvâ ngăn ‘na pơkeăng ƀă khăm pơlât dêi kong pơlê Dak Lak hiăng tơrŭm ƀă mâu khu râ, kơvâ cheăng pơkuâ ngăn, pơlê kong kơdrâm, tơring, cheăm vâ xôh kơdê pơreăng; tăng rah ƀok thái pơkeăng ki rơkê vâ pêi pro hnoăng cheăng, hnê tối kuăn pơlê đi đo athế hbrâ kơchăng, ví ing tơdroăng tro tâ pơreăng.