Ƀă ki xiâm dêi kong pơlê peăng kong ngo ai hên kuăn pơlê hdroâng kuăn ngo rêh ối, ƀă kơxô̆ ngế vâi kơdrâi rơneh kuăn a hngêi hên tâng pơchông ƀă kơlo ki riân tơdjuôm dêi lâp tơnêi têa. Tơbleăng Tơdroăng tơkêa 8 ‘na pêi pro tơdâng tơ’mô pơla kơdrâi ƀă kơnốu ƀă tŏng gum mâu tơdroăng ki kal ăm vâi kơdrâi ƀă vâi hdrêng, pơla hơnăm má I (2021-2025), Gia Lai cho 1 tung 10 to kong pơlê châ kơjo tơbleăng 4 tơdroăng tŏng gum liăn ăm vâi kơdrâi hdroâng kuăn rơneh kuăn tơniăn ƀă rak ngăn kuăn krâu mo, tung mê: rak ngăn krâu hdrối vâ rơneh; tŏng gum păn rak tung pơla rơneh; tŏng gum păn răk klêi kơ’nâi rơnêh; rak ngăn ivá ngế hdrêng.

Tung pơla hdrối nah, rêm râ hô̆i hiăng tơrŭm ƀă kơvâ ngăn pơkeăng tơkŭm po vâ chê 100 rôh hnê tối ‘na tơdroăng hnê hriâm mơnhông ki rơkê ƀă mơhnhôk vâi kơdrâi rơneh kuăn a tíu khăm pơlât, tơ’mot lối 7 rơpâu ngế nâ o tung hơnăm rơneh kuăn veăng tơmâng. Pakĭng mê, hiăng hrê tơdroăng tŏng gum ăm 361 ngế hô̆i viên vâi kơdrâi rơnêh a tíu khăm pơlât ƀă tâi tâng kơxô̆ liăn vâ chê 365 rơtuh liăn. Ing mâu tơdroăng tŏng gum kố, ôh ti xê mơdêk ki hlê plĕng, túa ki rak ngăn ivá ăm vâi kơdrâi, vâi hdrêng.

Mơngế hdroâng kuăn ngo mê ối veăng gum pro ivá vâi nâ o troh tíu khăm pơlât vâ rơneh kuăn ƀă kơhnâ pêi pro tro troăng hơlâ ‘na pơ’leăng mâ mơngế. Nâ Rơ Châm Alênh, pơlê Amơng, cheăm Ia Mơ Nông, tơring Čư̆ Păh, kong pơlê Gia Lai ăm ‘nâi:

“Á châ vâi gum roê ăm tah ăm o kŭn. Ing tơdroăng mê á hlo ro xua rế châ vâi gum, rế châ hnê ăm tơdroăng rak ngăn kuăn tŭm mâu tơdroăng. Rơneh kuăn a trăm xă o kŭn ối châ vâi pâk ăm tŭm vaccine, hlối châ khăm ăm kuăn pin há”.

Ing tơdroăng ki tơbleăng pêi pro hên tơdroăng cheăng mâu tơdroăng ki tŏng gum ăm vâi kơdrâi hdroâng kuăn ngo rơneh kuăn tơniăn ƀă rak ngăn ivá châ chăn ăm ngế hdrêng hiăng gum mơdêk ki hlê plĕng dêi mâu nâ o vâi kơdrâi ‘na rơneh kuăn tơniăn; ‘na rak ngăn ivá ngế nôu, ngế hdrêng; nâ o vâi kơdrâi châ xúa, pâk mâu pơkeăng, hlê ƀă rak ngăn kuăn tơxĭn tro túa. Nâ Đinh Ly Ơn, pơlê Hek, cheăm Čư̆ A Thai, tơring Phú Thiện, kong pơlê Gia Lai tối: Á rơnêh kuăn má môi, xo ah môi rơneh kuăn má péa nếo. Drêng vâ chê rơneh á lăm hngêi pơkeăng cheăm vâ khăm ngăn vâ tơniăn ăm tá nôu ƀă kuăn. Á kô mơ-eăm rak ngăn vâ kuăn ai ivá mo sêi”.

Klêi 3 hơnăm tơbleăng tơdroăng tơkêa 8 a kong pơlê Gia Lai hiăng châ tơƀrê khât tung tơdroăng tah lôi mâu tơdroăng ki pá puât, tơdroăng tơmiât ôh tá tro ‘na kơnốu ƀă kơdrâi, pêi pro tơƀrê tơdroăng ki pro tơdâng tơ’mô pơla kơdrâi ƀă kơnốu ƀă mơdêk tơdroăng rêh ối liăn ngân, hiâm mơno ăm vâi kơdrâi ƀă vâi hdrêng kơpong hdroâng kuăn ngo. Ăm ‘nâi tơdjuôm ‘na tơƀrê dêi tơdroăng tơbleăng tơkêa 8 a kong pơlê, jâ Rơ Châm H’Hồng, Kăn hnê ngăn vâi kơdrâi kong pơlê Gia Lai ăm ‘nâi:

“Mâu túa, mâu tơdroăng cheăng drêng châ tơkŭm tơbleăng troh kong pơlê troh nôkố mê châ kuăn pơlê ƀă Hô̆i viên vâi kơdrâi hâk vâ khât, môi tuăn dêi râ Đảng, kăn pơkuâ cheăm tơring mơnhên tối khât. Tung la ngiâ ah mê rêm râ Hô̆i pơtối mơnhông hnoăng cheăng dêi tơná vâ tí tăng ‘nâi plĕng, tơkŭm, tơbleăng châ tơƀrê 16 tơdroăng cheăng ối tung 4 khu tơdroăng ki xiâm dêi Tơkêa 8, mơ-eăm pêi tơƀrê, ƀă hluâ tơdroăng pơkâ mơ’no dêi hneăng má I mơ’no. Ki xiâm cho tơkŭm po mâu tơdroăng cheăng pêi pro pơhlêh túa tơmiât, túa pêi, vâ tah lôi mâu tơdroăng ki pơrah pơla kơdrâi ƀă kơnốu, túa pơkâ kơdrâi ƀă kơnốu tung rơpŏng hngêi ƀă pơlê pơla; mâu khôi túa tơlá ki ‘mêi ƀă mâu tơdroăng ôh tá lĕm tro tung pơlê pơla kal tơdrêng ƀă vâi kơdrâi ƀă vâi hdrêng”.

Xuân tiô Kăn hnê ngăn vâi kơdrâi kong pơlê Gia Lai, Khu kô pơtối rak vế mâu túa pêi ki tro ‘ló, vâ pro pơhlêh túa tơmiât, túa pêi, mơdêk tơdroăng cheăng kâ ăm vâi kơdrâi, mơdêk pro tơdâng tơ’mô pơla kơdrâi ƀă kơnốu, tŏng gum mâu tơdroăng ki kal ăm vâi kơdrâi ƀă vâi hdrêng, rak vế rơkong tơpui ƀă tơdroăng ki veăng pro ai pơxúa dêi vâi kơdrâi ƀă vâi hdrêng tung mâu tơdroăng cheăng kâ rêh ối, pơlê pơla a pơlê pơla.

Séa ngăn ƀă tơpui tối, tŏng gum mơdêk ivá ăm mâu vâi kơdrâi veăng pêi cheăng tơdroăng kal kí. Tơkŭm po mâu tơdroăng hnê hriâm túa ki pro tơdâng tơ’mô pơla kơdrâi ƀă kơnốu, tơdroăng tŏng gum pơla kơdrâi ƀă kơnốu ăm kăn ƀô̆ tung khu pơkuâ cheăng kal kí, mâu krâ pơlê, ngế pơkuâ thôn, ngế ki châ kuăn pơlê loi tung pơlê pơla. Ing mê, kô pro ai tơdroăng ki pơhlêh nhên tung pêi pro tơdâng tơ’mô pơla kơdrâi ƀă kơnốu ƀă tŏng gum mâu tơdroăng pêi pro tơdrêng kal ăm vâi kơdrâi ƀă vâi hdrêng, gum mơdêk tơdroăng rêh ối liăn ngân, tuăn mơ’no ăm vâi kơdrâi, vâi hdrêng hdroâng kuăn ngo a kong pơlê Gia Lai.

Ƀă hên tơdroăng cheăng pêi ai pơxúa hiăng ƀă dế châ mâu khu râ Hô̆i ngăn vâi kơdrâi tung kong pơlê Gia Lai kơhnâ tơbleăng pêi, Tơkêa 8 châ tơngah kô pro ivá ăm mâu tơdroăng, túa pêi ki ê châ tơbleăng tiô túa ki tơƀrê ƀă krá tơniăn a kơpong kuăn pơlê hdroâng kuăn ngo a kong pơlê Gia Lai.