“Pêi pro tiô tơdroăng ôh tá pơrah kơdrâi ƀă kơnốu ƀă tơleăng mơnhên mâu tơdroăng  ki kal ƀă vâi kơdrâi ƀă vâi hdrêng” dêi tơdroăng tơkêa bro 8, Khu ngăn vâi kơdrâi kong pơlê Tuyên Quang hiăng tơkŭm tơbleăng pêi a 570 thôn dêi 121 to cheăm kơpong kuăn ngo tung kong pơlê. Vâ pêi châ tơƀrê tơdroăng tơkêa bro, rêm râ khu vâi kơdrâi kong pơlê Tuyên Quang hiăng mơjiâng vâ chê 340 tôh hnê tối tung kuăn pơlê veăng ai tá kơnốu ƀă kơdrâi.

Drêng ai tôh tối tơbleăng tung kuăn pơlê tơdroăng hnê tối pôi tá pơrah pơla kơdrâi ƀă kơnốu, mơjiâng tíu rêh ối tơniăn ăm vâi kơdrâi ƀă vâi hdrêng châ mơnhông rơdêi. Jâ Hoàng Thị Lan Anh, Kăn phŏ hnê ngăn Khu vâi kơdrâi cheăm Hùng Đức, tơring Hàm Yên tối tiah kố, tơdroăng mơjiâng Tôh hnê tối tung kuăn pơlê cho tơdroăng hnê mơhnhôk kuăn pơlê pơ’lêh tuăn tơmiêt, túa pêi cheăng, veăng tah tơdroăng tơmiât krê xêh tung rơpŏng hngêi ƀă tung kuăn pơlê:

“Tơdroăng mơjiâng tôh hnê tối tung kuăn pơlê kố kô kum tơdroăng hnê tối ăm mâu ngế tung khu ƀă kuăn pơlê kô hlê tâ ‘na tơdroăng ôh tá pơrah pơla kơdrâi ƀă kơnốu ƀă kô kum dêi rơpó pro tơdâng tơ’mô tung tơdroăng rêh ối tung rơpŏng hngêi pro chiâng môi rơpŏng hngêi rêh ối  tơtô, hơniâp lĕm’’.

A cheăm Hùng Đức, tơring Hàm Yên, Khu ngăn vâi kơdrâi kong pơlê rah thôn Khuôn Then pro tíu mơnúa mơjiâng tôh hnê tối tung kuăn pơlê. Tôh ki kố ai 8 ngế cho mâu ngế ki xiâm djâ troăng ahdrối kâi vâ hnê mơhnhôk. Nâ Vi Thị Xuân - môi ngế tung tôh hnê tối tung kuăn pơlê dêi thôn tối:

“Tơbleăng môi pôe hâi hnê tối gum ăm á hlê plĕng tơdroăng ki ôh tá pơrah pơla kơdrâi kơnốu ƀă hbrâ mơdât tơhôu, pôi tôu tơpâm dêi rơpó tung on veăng rơpŏng hngêi, kring vế vâi kơdrâi ƀă vâi hdrêng, krê tơná a xuân hnê tối ăm tâi tâng kuăn pơlê tung pơlê hlê pôi tá pơrah pơla kơdrâi ƀă kơnốu ƀă kring vế hnoăng rêh ối dêi vâi hdrêng ƀă vâi kơdrâi vâ hbrâ mơdât ki tơhôu tôu pâm dêi rơpó tung rơpŏng hngêi’’.  

Pakĭng Tôh hnê tối kuăn pơlê, rêm râ khu vâi kơdrâi kong pơlê Tuyên Quang ối mơjiâng vâ chê 30 tơdroăng ki mơnúa inâi loi khât vâ tơleăng tơdroăng tơhôu dêi rơpó, veăng gum mâu ngế ki tro tôu pâm tung rơpŏng hngêi. Tơdrêng amê, Khu ngăn vâi kơdrâi kong pơlê Tuyên Quang hiăng tơrŭm ƀă mâu hngêi trung hriâm mơjiâng kâu lak ƀô̆ “Xiâm tơdroăng ki pơ’lêh‘’. Kố cho  môi pâ vâ tơleăng mơnhên mâu tơdroăng kal pêi tơdrêng ƀă vâi hdrêng, ƀă kơpong  kuăn ngo.

O Hoàng Thị Khánh Huyền, hok tro Hngêi trung hnê kuăn ngo ai tíu kâ koi ối pơtê ATK tơring Sơn Dương tối tiah kố: veăng mot tung kâu lăk ƀô̆, o ƀă mâu vâi pú châ trâm tơpui tơno xah hêi, châ hnê tối mâu tơdroăng ‘na tuăn tơmiât ăm rêm ngế ‘nâi ‘na kơdrâi ƀă kơnốu. Pakĭng mê tơná o ối hlê hên tơdroăng, ‘na kring vế tơná vâ xông prôk tung la ngiâ:

“Veăng tung kâu lăk ƀô̆ gum á hlê ‘na xo on veăng ‘na tơdroăng tôu pâm tung hngêi trung, tơhôu tung on veăng rơpŏng hngêi; gum a hlê tơdroăng klê mê tối ăm mâu pú tung hngêi trung rơpŏng hngêi vâ ví tơdroăng ki tơhôu tôu pâm tung rơpŏng hngêi”.

Kâu lak ƀô̆ ‘’Xiâm tơdroăng ki pơhlêh’’ cho môi tung 4 túa pêi pro ki xiâm dêi tơdroăng Tơkêa bro 8 “Pêi pro tơdroăng ôh tá pơrah kơdrâi ƀă kơnốu hlối tơleăng mâu tơdroăng ki kal dêi vâi kơdrâi ƀă vâi hdrêng’’. Cô Lý Hải Vân, Hngêi trung râ má pái hnê kuăn ngo ai tíu kâ koi ối pơtê ATK tơring Sơn Dương ăm ‘nâi:

“Kô hnê tơ’nôm ăm mâu vâi pú tung kâu lăk ƀô̆ mâu ngế tung kâu lăk ƀô̆ vâ mâu vâi pú kô chiâng hnê tối ăm mâu vâi pú hok tro tung hngêi trung xuân môi tiah hnê troh lâp lu ‘na tơdroăng ki ‘ló tro ăm nôu pâ nhŏng o tung rơpŏng hngêi pú hmâ xuân môi tiah drêng vêh a pơlê xuân pêi mâu tơdroăng ki pơxúa vâ ‘no hnoăng cheăng gum ăm kuăn pơlê’’.

Tơdroăng mơjiâng kâu lăk ƀô̆ hiăng hbrâ ăm hok tro kuăn ngo vâ hlê hên tơdroăng, vâ ai pơxúa mơhnhôk thế mâu vâi o tối tơdroăng tơná tơmiât, pơhlêh tuăn tơmiât, túa hriâm, túa pêi pro ƀă veăng xut tah tơdroăng ki hmâ, túa tơlá ôh tá tro a kơpong kong ngo. Nôkố, mâu Kâu lăk ƀô̆ mê hiăng veăng pêi tro mâu tơdroăng, luât pơkâ tŏng gum, tơleăng mơnhên mâu tơdroăng tơdjâk troh vâi hdrêng; kơjo kum mâu thái cô ƀă nôu pâ pêi tro tơdroăng hnê kuăn ‘nĕng ƀă mơdât tôu pâ ‘nêk mơ’nêa, tê, tong rup, rĕng xo on veăng a vâi o hơnăm dế hriâm.