VOV4.Sdang - Kơxê lơ 12/10, a Pơlê kong kân Hồ Chí Minh, pôa Nguyễn Xuân Phúc, Kăn xiâm hnê ngăn tơnêi têa ƀă Khu râ kăn teăng mâ Kuô̆k hô̆i Pơlê kong kân Hồ Chí Minh séa ngăn tơdroăng pêi pro tơdroăng hbrâ, mơdât pơreăng COVID-19 tiô Pơkâ 30/2021 dêi Kuô̆k hô̆i; mâu hlá mơ-éa dêi Chin phuh, Ngế pro xiâm hnê ngăn Chin phuh; mâu troăng vâ mơdât pơreăng COVID-19, mơnhông mơdêk cheăng kâ – rêh ối pơlê pơla tung pơlê kong kân tung la ngiâ. Pôa Nguyễn Xuân Phúc pơtroh rơkong hơlêm trâu rơdâ ƀă Đảng ƀô̆, khu râ kăn pơkuâ ƀă kuăn pơlê Pơlê kong kân Hồ Chí Minh ‘na mâu tơdroăng hiá, châi hiâm xua pơreăng xông tâ tú.

Pôa Nguyễn Xuân Phúc, Kăn xiâm hnê ngăn tơnêi têa rơtế veăng roh séa ngăn dêi Khu râ kăn Kuô̆k hô̆i

Vâ rak tơniăn tơdroăng cheăng kâ pơlê kong kân, Kăn xiâm hnê ngăn tơnêi têa pơkâ thế pơlê kong kân pơtối rak tơniăn mâu troăng cheăng kâ châ tơ’lêi hlâu, mê cho tơ’lêi pơto tơmeăm khoăng; tơdroăng prôk lăm kuăn mơngế; mâu tơdroăng ‘na liăn ngân, mung liăn, kơxô̆ liăn ăm khu tê mơdró; vêh tơdjêp tơdroăng tê mơdró tơmeăm khoăng ƀă pêi cheăng. Rơtế amê cho pro tơniăn mơnhông khu tê mơdró, tơpui tơno vâ ‘nâi nhên pá puât dêi rêm tơdroăng tơkêa bro.

A Sa Ly tơplôu ƀă tơbleăng