VOV4.Sêdang - Kơxo lơ 12/10, Khu pơkuâ ngăn Đảng ƀô̆ kong pơlê Kon Tum po rôh hôp má 5 hneăng má 16 po rơdâ ƀă hên tơdroăng ki kal. Tiô tối tơbleăng a rôh hôp, xua tơdjâk ing pơreăng COVID-19 mê pro hên tơdroăng pơkâ ‘na cheăng kâ rêh ối pơlê pơla dêi kong pơlê Kon Tum tung 9 khế bu châ iâ, môi tiah: Nâp liăn Tơnêi têa a kong pơlê dâng 1 rơpâu rơtal liăn, bu châ 59,2% tiô tơdroăng pơkâ dêi kong pơlê pơcháu; kơxô̆ cheăm pêi klêi thôn pơlê nếo tâk 1 to cheăm, bu châ 12,5 túa pơkâ; ƀăng tơnêi pêt loăng pơkeăng ki nếo pakĭng sâm Ngọc Linh ai 960 ha, bu châ 48% túa pơkâ ƀă hên ki ê.

Tâ tá rôh hôp má 5 Khu pơkuâ ngăn Đảng ƀô̆ kong pơlê Kon Tum hneăng má 16

Rôh hôp tơkŭm tơpui, mơgêi ƀă tơbleăng hên tơdroăng pơkâ ki kal, môi tiah: ‘Mâi rơnêu, ‘mot tơ’nôm tơdroăng pơkâ pêi cheăng dêi khu pơkuâ ngăn Đảng ủy Kon Tum hneăng má 16; Mơgêi tơdroăng pơkâ “’Na pơtối mơjiâng mâu cheăm ki malối xơpá tung tơdroăng nếo”; Mơgêi tơdroăng pơkâ “’Na mơjiâng, ƀă mơnhông mâu kơvâ cheăng kâ xiâm ƀă kế tơmeăm ki xiâm” ƀă hên tơdroăng ki ê.

Katarina Nga tơplôu ƀă tơbleăng