VOV4.Sêdang - Pơxiâm sap hâi lơ 13/10, kong pơlê Kon Tum tơkŭm po tơdroăng mơnúa ăm rơxế pơto tơmối kơtâu tiô troăng ki tơniăn troh 9 kong pơlê, pơlê kong kơdrâm ối tung Tơnêi têa, mê cho: Vĩnh Phúc, Hải Dương, Thái Bình, Thanh Hóa, Quảng Ngãi, Đà Nẵng, Gia Lai, Bình Định ƀă kong pơlê Thừa Thiên Huế. Vâ tơniăn tơdroăng hbrâ mơdât COVID-19, Vi ƀan kong pơlê Kon Tum pơkâ Khu pơkuâ troăng prôk ƀă rơxế kơtâu dêi kong pơlê tơrŭm ƀă Khu pơkuâ troăng prôk ƀă rơxế kơtâu kong pơlê, pơlê kong kơdrâm ki tơdjâk môi tuăn tơdroăng tơkŭm po ƀă tơdroăng ăm rơxế kơtâu a mâu troăng tiô hnê mơhno dêi Khu xiâm pơkuâ troăng prôk ƀă rơxế kơtâu.

Xôh pơkeăng kơdê pơreăng mâu rơxế pơto tơmối ahdrối vâ mot a kong pơlê Kon Tum

Khu pơkuâ ngăn pơkeăng ƀă khăm pơlât hnê mơhno, pêi pro mâu troăng hbrâ mơdât pơreăng COVID-19 ƀă mâu tơmối ing mâu kong pơlê ki tối mê vêh a kong pơlê ƀă pêi pro mâu troăng séa ngăn, khăm ngăn mâu ngế ki kố tiô pơkâ.

A Sa Ly tơplôu ƀă tơbleăng