VOV4.Sêdang - Hâi kố, lơ 25/10, Kuô̆k hô̆i tơpui tơno mơ’no tơdrêng tung um tiô troăng măng internet  ‘na tơdroăng tơkêa bro Luât ‘mâi rơnêi, tơ’nôm mâu luât dêi Khu luât xăm tối xăm tơkêng mâu ngế pro xôi kân; tơdroăng tơkêa bro Luât ‘mâi rơnêu, tơ’nôm mâu troăng dêi Luât Xêo kế tơmeăm khoăng ƀă tơpui tơno a tôh ‘na tơdroăng tơkêa bro Luât tê mơdró Ƀaoh hiêm (‘mâi rơnêu). Tung hâi lơ 24/10, Kuô̆k hô̆i hiăng tơpui tơno mơ’no tơdrêng tung um tiô troăng măng internet 'na‘mâu tơbleăng tơdroăng pêi cheăng dêi Khu kăn ki tơleăng xiâm, Kăn pơkuâ Kơ koan hnê séa ngăn arak luât xiâm; tơdroăng hbrâ, mơdât kâ kơhveăm liăn ngân 2021; Tơdroăng tơkêa bro Pơkâ ‘na tơkŭm po roh tơleăng mơ’no tơdrêng tung um tiô troăng măng. Tơdroăng xiâm châ hên ngế kăn rơhêng vâ ‘nâi plĕng vâ tơpui tơno mê cho tơkŭm po tơleăng mơ’no tơdrêng tung um tiô troăng măng internet ƀă tơdroăng hbrâ mơdât kâ kơhveăm liăn ngân. Hên mâu kăn tối, tơdroăng kâ kơhveăm pro pá ăm kuăn pơlê, khu tê mơdró tung kơpong pơkuâ ‘na mơ-éa, ki rơhêng vâ tối tung kơvâ kŏng an, khu mô đô̆i, khăm pơlât, ai hên mâu ngế kâ kơhveăm liăn ngân, thế tơpôu xôi kân.

A Sa Ly tơplôu ƀă tơbleăng