VOV4.Sêdang - Kơxo lơ 5/7, Tíu xiâm Séa ngăn châi tamo kong pơlê Lâm Đồng hiăng tơdah xo lối 50.350 ƀô̆ test séa ngăn rĕng ‘na xiâm kối pơreăng SARS-CoV-2 sap ing môi khu mơdró kâ tŏng kum ăm kong pơlê. Ƀô̆ test séa ngăn rĕng xiâm kối pơreăng SARS-CoV-2 kố châ Khu xiâm ngăn pơkeăng ƀă khăm pơlât hbru ăm phêp xúa, ai ki rĕng ƀă ki tơƀrê tiô pơkâ dêi Khu xiâm ngăn pơkeăng ƀă khăm pơlât lâp plâi tơnêi WHO châ Kŏng ti Tơlo liăn rơxế chơ tơmối Phương Trang roê xo sap ing Hàn Quốc vêh diâp ăm kong pơlê Lâm Đồng kum ăm hnoăng cheăng hbrâ mơdât pơreăng COVID-19.

Lâm Đồng tơdah xo lối 50 rơpâu ƀô̆ test séa ngăn rĕng SARS-CoV-2

Tiô pôa Nguyễn Quốc Minh, kăn pơkuâ tíu xiâm Séa ngăn mơdât châi tamo kong pơlê Lâm Đồng, tơdroăng ki xo mâu ƀô̆ test séa ngăn rĕng kố ai pơxúa khât, cho tơdroăng ki pêi pro tơdrêng kum ăm hnoăng cheăng hbrâ mơdât COVID-19 tung pơla dế nôkố dêi kong pơlê. Drêng tơdah xo, tíu pêi cheăng kô rĕng xing xoăng ăm mâu tíu pêi cheăng ki ai tơdjâk tung kong pơlê vâ mơdêk ki tơƀrê tung tơdroăng séa ngăn, kum rak tơniăn ăm hnoăng cheăng hbrâ mơdât pơreăng.

Katarina Nga tơplôu ƀă tơbleăng