Châ hlo hên tơdroăng ki ton nah mơhno ai tơdroăng mơjiâng pro kế xâng, pâ pro ƀă hmốu a tíu rêh ối chal vâi krâ roh nah a tíu hriăn plĕng tơdroăng roh nah Xí Hai.

Kố cho tơdroăng xiâm châ tơbleăng a hneăng hôp tơbleăng tơdroăng châ tơƀrê ti tăng tơmeăm roh ton nah tung tơdroăng hriăn plĕng tơmeăm roh nah Xí Hai roh má 3 xua Tíu chôu ‘măn tơmeăm khoăng ton nah Dak Lak tơkŭm po kơxê lơ 13/9.

Tơdroăng hriăn plĕng tơdroăng roh nha Xí Hai ối tung thôn 6, cheăm Ia Jlơi, tơring Ea Súp, kong pơlê Dak Lak, châ hlo apoăng hơnăm 2020. Tíu chôu ‘măn tơmeăm khoăng roh nah Dak Lak hiăng tơrŭm ƀă Tíu chôu ‘măn tơmeăm roh nah Tơnêi têa chiâ tăng 2 xôh tung mâu hơnăm 2021 ƀă 2022. Ing mê, châ xo hên tơmeăm roh nah, tơmeăm ki kơnía, ki phá tơ-ê, roh apoăng tăng hlo a Tây Nguyên; tung mê, ai ‘’Ti tăng châ hlo kế pong hmốu Xí Hai’’ hiăng châ mơnhên cho Tơmeăm kơnía tơnêi têa sap ing hơnăm 2023.

Mơnhên tâi tâng ăm hlo tíu ai tơmeăm ron ton nah Xí Hai hiăng ton kơtăn kố dâng 4 rơpâu hơnăm troh 2 rơpâu hơnăm hdrối nah, hiăng ai ton lối 1 rơpâu hơnăm, sap ing rơxông Mơ’nui xúa hmốu nếo troh rơxông chiâng xúa meăm. Tung roh chiâ tăng roh má 3, pêi pro sap ing mơ’nui khế 6 troh khế 7 hơnăm kố, bu tung môi klôh chiâ dâng 20 met karê hiăng tăng châ vâ chê 1.400 tơmeăm mê cho hmốu kơlĭng, kế ki pêi xăn, chông, kế tâ tơmeăm, kế pong loăng, hên tơmeăm tơhneăng dêi mâu kế ki pong rơgi tơmeăm, xơkê hmốu, tơmong pong ƀă hía hé.

Ki rơhêng vâ tối, roh apoăng tăng hlo mâu kế ki vế prế, hên kế ki mơnâ mâ ngăn ƀă hmốu dế pro tá hâi kêi đeăng, mâu kế tơđôu, tơhneăng, vâ mơhno ivá ‘na tơdroăng mơjiâng pro kế ki mơnâ mâ ngăn ƀă hmốu a kố.