Hiăng chiâng tiah hmâ, rêm kơxo má xông koi, pôa Y Tài, ối a cheăm Quảng Phú, tơring Krông Nô, kong pơlê Dak Nông hmâ tiê mơ’no dêi rơ’jíu vâ tơmâng Tơdroăng tơpui nâl M’Nông dêi Rơ’jíu Việt Nam. Pôa Pôa Y Tài tối, hơnăm kố hiăng hluâ 80 hơnăm, laga rơhêng vâ tơmâng tơdroăng nếo ai tung tơnêi têa pin ƀă kong têa ê ing rơ’jíu ƀă nâl M’Nông. Ki rơhêng vâ tối, tơdroăng tơpui ối tối ăm ‘na tơdroăng ki rơkê khoa hok kih thuât ƀă cho kế ki vâ xah, ƀă mâu tơdroăng rơhdruê, rơngêi, ting ting, hơ’muăn, gum rak vế khôi túa lĕm tro mâu hdroâng kuăn ngo.

“Á tơmâng rơkong tơpui ƀă nâl M’Nông tung Rơ’jíu Việt Nam sap ing hơnăm 2006 troh nôkố, á hmâ tơmâng tơdroăng hnê ‘na pêi chiâk deăng vâ séa ngăn ‘na kih thuât ƀă rak ngăn mâu loăng plâi, má 2 nếo cho tơmâng rơhdruê, rơngêi hdroâng kuăn ngo M’Nông dêi tơná, nâl M’Nông tơpui tung Rơ’jíu Việt Nam tơmâng tơ’lêi tơmâng, nâl M’Nông preh xua mê mâu rơkong tơpui ki pro phá tơ-ê ki ê dêi M’Nông pơrá hlê plĕng tâi tâng, cho ro ‘nâng, ing tơdroăng kố á pói vâ rơxông ối nếo nôkố mơ-eăm hriâm tâp rơkê, mơ-eăm mơnhông ƀă rak khôi túa lĕm dêi hdroâng kuăn ngo tơná, ôh tá xê xua tơdroăng rêh ối nếo nôkố mê lôi piu dêi mâu khôi túa lĕm tro dêi hdroâng kuăn ngo tơná’’.

Klêi kơ’nâi 18 hơnăm tơpui tung ƀâng hdroâng kuăn ngo, Tơdroăng tơpui nâl M’Nông dêi Rơ’jíu Việt Nam chôa ‘lâng tơxâng mâu tơdroăng kal vâ tơmâng dêi mâu ngế tơmâng Rơ’jíu. Mâu ngế rah chêh, mâu ngế tơpui tung rơ’jíu môi tiah Thị Đoắt, H’Thi Rya, Điểu Thân, Y Sưng đi đo hriâm tơdroăng ki rơkê, tơdroăng ‘na pêi cheăng vâ teăm tiô troăng rơ’jíu tiô rơxông nếo. Ôh tá xê to tơplôu, pơchuât mâu tơdroăng nếo ai, tơdroăng cheăng a kơbong thâu hrik, mâu ngế rah chêh ối troh mâu pơlê tung kơpong Tây Nguyên vâ ‘nâi tơdroăng nếo ai, chêh tơdroăng nếo ai, chêh ƀai, pêi pro mâu tơdroăng hên hĭn, ro rih.

‘Nâi tơdroăng ki mê cho hâk tơngăm, pôa Y Cam, Kăn phŏ hnê ngăn Viƀan cheăm Quảng Phú, tơring Krông Nô, kong pơlê Dak Nông mơnhên:

“Nâl M’Nông tung Rơ’jíu Việt Nam cho ro ‘nâng, tơmâng tơ’lêi plĕng, tơdroăng ‘nâng ‘nâi, cho ai hên tơdroăng tơbleăng tŭm mâu tơdroăng ki xiâm ki kuăn pơlê kal, môi tiah troăng hơlâ dêi Đảng, Tơnêi têa troh ƀă kuăn pơlê, môi tiah tơbleăng troh kuăn pơlê ‘na kih thuât tung pêi chiâk deăng, rak ngăn kơphế, tiu... kuăn pơlê xuân tơmâng troh tơdroăng nếo ai pơlê pơla, tơdroăng kal khât ƀă kuăn pơlê. Á pói vâ mâu pú hmâ tơplôu tơbleăng, tơpui pơchuât nâl M’Nông ai hên tơdroăng nếo, ro tâ ƀă kal khât tâ ăm kuăn pơlê’’.

Vâ teăm ƀă troăng mơnhông tơdjuôm dêi hlá tơbeăng tiô rơxông nếo, rơtế tơdroăng mơnhông ó rơdêi dêi hlá tơbeăng pơlê pơla, rơtế ƀă hlá tơbeăng tiô khôi vâi kâ nah ing rơ’jíu, ing hâi lơ 23/3/2024, Tơdroăng tơpui pơchuât nâl M’Nông dêi Rơ’jíu Việt Nam hiăng châ tơbleăng tung măng pơlê pơla Facebook ƀă Fanpage ‘’Nâl M’Nông VOV Tây Nguyên’’. Ƀă troăng pêi nếo kố hiăng gum hên ngế pơchuât ngăn Tơdroăng tơpui nâl M’Nông dêi Rơ’jíu Việt Nam. Môi ngế pơchuât ai nick name facebook cho ‘’Huế Xưa’’ tối ăm ‘nâi:

 ‘’Á ‘nâi nâl M’Nông ing ‘’Fanpage nâl M’Nông Tây Nguyên’’. Ing Fanpage kô chiâng vâ tơmâng mâu tơdroăng ki xiâm tung rơ’jíu, a trang web ƀă nâl M’Nông, mâu rơxông nếo nôkố châ ‘nâi tơdroăng ing măng pơlê pơla hên xua mê trang Fanpage kố cho tơtro ƀă pú hmâ ối nếo cho mơngế M’Nông hâk vâ ti tăng plĕng nâl tơpui khôi túa lĕm dêi tơná. Ai Fanpage ƀă nâl M’Nông tiah kố cho ro. Á hâk vâ tơdroăng hơ’muăn, tơmâng mâu ngê̆ nhân rơhdruê... ƀă mâu tơdroăng ki ê tung Facebook nâl M’Nông, tơdroăng tơtro ƀă ro ‘nâng’’.

Ki rơhêng vâ tối, ngế ki pơchuât ai nick name ‘’Songtheothoigian’’ tối hâk vâ ƀă hơniâp ro drêng châ ngăn trang fanpage  ‘’Nâl M’Nông VOV Tây Nguyên’’, ƀă đi đo chêh chư pơtroh kơ-êng mâu nâ tơpui pơchuât. Ngế ki ngăn pơchuât kố chêh chư tối: ‘’Á o hlo tung Fanpage Nâl M’Nông ai video clip nôu á rơhdruê, ngoh nâ hôm ối hên tơdroăng ki thâu nôu á rơhdruê há, tơbleăng hên tâ mê hôu ngoh nâ’’...

‘’Á o koh ngoh nâ, á inâi cho Nam, hơnăm kố 34 hơnăm, á ối a cheăm Quảng Trực, á tơmâng tơdroăng tơpui ƀă nâl M’Nông ing Fanpage ‘’Nâl M’Nông VOV Tây Nguyên’’, á hlo mâu nâ tơbleăng ƀai chêh um lĕm ‘nâng, á xuân hmâ tơbleăng mâu tơdroăng ngoh nâ tơbleăng vâ troh lâp lu nâp tơpui hdroâng kuăn ngo pin troh mâu pú hmâ hơnăm ối nếo hên tâ, nôkố alâi kơbố xuân xúa facebook xua mê troăng tơbleăng tơdroăng tơpui pơchuât tiah kố cho tơtro ƀă mâu ngế ki lâi ôh tá tơmâng tơdroăng tơpui pơchuât ing rơ’jíu’’.

Fanpage ‘’Nâl tơpui pơchuât M’Nông VOV Tây Nguyên’’ nôkố ai vâ chê 1.500 roh séa ngăn, rêm hâi fanpage pơrá tơbleăng mâu tơdroăng nếo ai, mâu ƀai pơchuât nâl M’Nông ƀă um mơhno a ngâ tơbleăng lĕm hlối ai um ƀă file ki chuât tơ’lêi hlâu ăm mơngế ki tơmâng tơtro ƀă hên ngế ki mot ngăn, ki má lối cho mâu pú hmâ hơnăm ối nếo... môi tiah: tơdroăng nếo ai, ƀai, tơdroăng hơ’muăn, tơdroăng pro pơro... Môi ngế pú hmâ ai nick name cho ‘’Tung Jôk’’ tối:

‘’Fanpage nâl M’Nông VOV Tây Nguyên cho ro, á hâk vâ tơmâng tơdroăng nếo ai, mâu ngoh nâ tơbleăng tơdroăng nếo ai hlối ai um ƀă rơkong pơchuât, bu kal po ngăn mê kô tâng, tơtro ƀă rơxông ối nếo nôkố ‘nâng’’.

Môi chât tơheăm hơnăm, Tơdroăng tơpui nâl M’Nông dêi Rơ’jíu Việt Nam, xua Kơ koan teăng mâ kơpong Tây Nguyên rah chêh, đi đo mơdêk ki dâi lĕm tơdroăng xiâm ƀă um mơhno pakong. Pakĭng tơdroăng tơpui mơ’no rêm hâi ƀă trang thông tin điê̆n tưh VOV4.M’Nông, mê Fanpage: ‘’Nâl M’Nông VOV Tây Nguyên’’ cho ‘’kơpeăng kŏng tơdjêp xŏn’’ dêi Tơdroăng tơpui pơchuât nâl M’Nông, tơxâng tơdroăng kal vâ rế hía rế hên dêi mâu ngế ki pơchuât ngăn.