Lơgât ôm hyô ngê̆ thuâ̆t Đà Lạt tơbleăng ăm vâ chê 60 tíu troh a tíu xiâm pơlê kong kơdrâm Đà Lạt ƀă mâu kơpong achê châ tơbleăng ƀă péa nâl tơpui Ănglê ƀă nâl Xuăn. Lơgât châ xoăng pro chiâng 8 khu, môi tiah: tơnêi tơníu ƀă kế tơmeăm kơnía, kong kế nhâ loăng. Tíu ki mơđah tơbleăng ƀă tíu ngê̆ thuâ̆t, tíu ki mơđah hơdruê xoăng ƀă hên ki ê pro chiâng tơ’lêi hlâu ăm tơmối ôm hyô châ ngăn châ hmâng châ lăm troh a mâu kơpong ôm hyô, túa lĕm tro, ngê̆ thuât dêi kơphô̆ ngo kố.

Pôa Đặng Quang Tú, Kăn hnê ngăn Vi ƀan pơlê kong kơdrâm Đà Lạt ăm ‘nâi, mơ’nui hơnăm 2023, Đà Lạt châ hâk tơngăm, păng ‘nâng chiâng ngế ki tơrŭm tung mâu pơlê kong kân ki rơkê plĕng dêi UNESCO tung kơvâ hơdruê. Tơdroăng chêh pro lơgât ôm hyô ngê̆ thuât Đà Lạt cho 1 tung 3 túa tơmiât ki rơkê râ kong pơlê cho vâ pêi pro hơ’lêh mâu tơdroăng ki kal hikăng tơhrâ drêng mot tơrŭm tung tơdroăng, xuân môi tiah mơdêk hnoăng cheăng dêi túa lĕm tro ƀă túa ki rơkê plĕng tung mơnhông krá tơniăn.

“Tơdroăng ki kố ôh ti xê to tơdroăng ko djâ troăng, mê ối cho kông tơdjêp pơla mâu ngê̆ sih, mâu tíu cheăng ‘na ngê̆ thuât ƀă pơlê pơla; gum po ăm mâu tơdroăng ki hơniâp ro ‘na tơdroăng ton nah, túa lĕm tro ƀă tơdroăng ki rơkê plĕng, tơdrêng amê hlối mơdêk tơdroăng ki mơnhông krá tơniăn dêi kơvâ ôm hyô, ngê̆ thuât tro ƀă pơlê kong kơdrâm hơdruê. Tung la ngiâ ah, ngin kô pơtối pêi pro klêi, mơnhông ƀă po rơdâ lơgât kố vâ tơbleăng tŭm ƀă tro mâu tơdroăng ‘na mâu tíu troh ngê̆ thuât nếo, mâu tơdroăng túa lĕm tro ki lĕm tro dêi kong pơlê”.

Tơpui a leh pơxiâm mơhno mâ, pôa Jonathan Wallace Baker, ngế xiâm teăng mâ Khu tơrŭm Hnê hriâm, Khoa hok ƀă Túa lĕm tro dêi Khu lâp kong têa (UNESCO) a Việt Nam tối rơdêi, ing rôh ki veăng tung Troăng mâu pơlê kong kơdrâm ki rơkê plĕng UNESCO tung kơvâ hơdruê, Đà Lạt rế kơhnâ veăng tung mâu tơdroăng cheăng râ lâp plâi tơnêi ƀă tung kơpong troăng pơkâ, rế mơjiâng túa pơkâ pêi pro vâ mâu tơdroăng tơhrâ ƀă troăng pơkâ kố.

UNESCO phiu ro drêng châ rơtế prôk ƀă tŏng kum Đà Lạt chêh pro lơgât ôm hyô – môi to lơgât mơni kô mơnhên nhên ƀă xoăng mâu tơdroăng tơmiât rơkê pơlê pơla dêi pơlê kong kơdrâm xuân môi tiah mâu tíu troh ôm hyô akố.

“Á hlo tiah kố túa tơmiât kố kô veăng kum pơkâ nhên ăm kong kế nhâ loăng túa lĕm tro ƀă tơmiât rơkê dêi pơlê kong kơdrâm Đà Lạt kô ƀă cho môi kế tơmeăm ki ai pơxúa vâ tơmối lăm ngăn mơni kô châ prôk lăm tơ’lêi hlâu tung pơlê kong kơdrâm. Tơdrêng amê hlối chiâng vâ tŏng kum mâu kơ koan Tơnêi têa pơkuâ ngăn ƀă mơdêk kế tơmeăm kơnía, mâu tíu ki rơkê tro dêi pơlê kong kơdrâm kố châ tro lĕm tâ”.

Xuân tiô pôa Jonathan Wallace Baker, Đà Lạt ai mâu tơdroăng ki ai hlâu kân tung tơdroăng ki xúa mâu ivá túa lĕm tro dêi tơná ăm mâu tơdroăng cheăng tung la ngiâ mơnhông krá tơniăn, xua tíu kố ai hên khôi hmâ túa lĕm tro xua pơlê pơla 20 hdroâng kuăn ngo pro chiâng. Xua mê, tơdroăng tơrŭm tro pơla mơnhông cheăng kâ rêh ối pơlê pơla ƀă rak vế ƀă mơdêk kế tơmeăm ngê̆ tnhuât ƀă tơtrŏng troh tơdroăng ki ai hên tung tơmiât rơkê dêi rêm ngế krê, khu pú hên lơ pơlê pơla kô ôh ti xê to mơdêk cheăng kâ dêi pơlê kong kơdrâm mê ối vâ rak vế kế tơmeăm ki kơnía git.