Hâi mơ’nui măng tĭng, a Hngêi trung Mâm non Hoa Hồng, cheăm Ia Dreh, kong pơlê Gia Lai, tíu mơngiơk eăng lĕm ếo pơtâk thăm rế ai kơdrâm mơngế troh ngăn, phiu ro xua idrâp chêng koăng. Kố cho tơdroăng ki châ tâ, châ hlo ‘na ếo pơtâk hdroâng kuăn ngo, teăn pong chêa vâi krâ nah ƀă mơđah tôu chêng koăng dêi mơngế Jarai. A kố, ôh tá xê to mâu ngế ki rơkê ‘na tơdroăng vâi krâ nah, tối cho ngê̆ nhân, mê mâu cô yăo, mâu vâi o ối kŭn pơrá xâp mâu ếo pơtâk hdroâng kuăn ngo ƀă hên mơngiơk phá tơ-ê dêi pó, châ pro hên túa, tiô hơnăm. Cô yăo Nay H’Tố Trinh, cô hnê Hngêi trung Mâm non Hoa Hồng hnê mơhno mâu vâ o ối kŭn séa ngăn ƀă châ mâu vâi krâ ki rơkê râng kŏng hnê tơdroăng teăn ếo pơtâk inhên.

"Hngêi trung mâm non ngin tơkŭm po mâu roh châ tâ, châ hlo khôi túa lĕm tro hdroâng kuăn ngo ăm mâu muăn ƀă hên tơdroăng môi tiah tôu chêng koăng, teăn pong chêa, teăn ếo pơtâk...Ngin krếo mâu vâi ki rơkê troh hnê teăn ếo pơtâk troh tơbleăng tơmeăm ƀă tơdrêng hnê mơhno mâu muăn. Cho cô yăo, pói vâ kân má môi ngin cho gum mâu muăn châ hriâm, hlê ki kơnía dêi tơdroăng teăn ếo pơtâk, cho tơmeăm xêt khât ki jâ pôa chôu ‘măn ăm, ing mê ‘nâi nhuô̆m, rak vế ƀă pơtối ăm rơxông kơ’nâi".

Mâu vâi krâ ki rơkê teăn ếo pơtâk, teăn pong chêa ƀă vâi ki rơkê  tôu chêng koăng troh ing mâu pơlê Nông Siu, pơlê Bha Nga, pơlê Blak (cheăm Ia Dreh, kong pơlê Gia Lai) hiăng gum mâu muăn ối kŭn môi tơdroăng châ tâ, châ hlo ki lĕm ƀă ai kơnâ trâu hơngế ‘na khôi túa lĕm tro hdroâng kuăn ngo. Jâ Nay H’Kông – Kăn pơkuâ Kâu lăk ƀô̆ Teăn ếo pơtâk pơlê Nông Siu hâk tơngăm xua tơmeăm ếo pơtâk dêi Kâu lăk ƀô̆ hâk tơngăm châ veăng hên tơdroăng ki kal ‘na khôi túa lĕm tro tung kong pơlê, kơxô̆ liăn tê tơmeăm châ xo lối 50 rơtuh liăn, á ƀă jâ châ Vi ƀan Măt trâ̆n kong pơlê Gia Lai diâp ƀâng kheăn kơdeăn. Laga ki kal tâ mê cho, ing mê mơđah tơbleăng châ mơngiơk lĕm khôi túa lĕm tro dêi mơngế Jarai, ki rơhêng vâ tối cho hnê tơdroăng cheăng vâi krâ nah ăm rơxông ối nếo.

"Ngin hiăng veăng tơbleăng tơdroăng teăn ếo pơtâk a pái hngêi trung mauh yăo tung pơlê. Akố, ngin ôh tá xê to tơbleăng, mơđah tơmeăm mê ối hnê ăm mâu vâi muăn tơdroăng ki apoăng dêi tơdroăng teăn ếo pơtâk. Drêng châ hlo, châ pêi a mâu ếo pơtâk, mâu muăn hâk vâ ‘nâng, ing mê mơnhông hiâm mơno hâk vâ ƀă ếo pơtâk. Ngin pói tơngah drêng xông kân, ngin muăn kô chiâng teăn xêh mâu ếo pơtâk môi tiah mâu xăng, mâu mêh prôk hdrối hiăng hnê ăm. Tơdroăng ki hâk dêi mâu muăn xuân djâ ăm ngin hên tơdroăng ki phiu ro, xua mâu muăn kô cho mâu ngế ki pơtó ƀă rak tơdroăng cheăng tiô khôi vâi krâ nah kố".

Tơdroăng châ tâ, châ hlo khôi túa lĕm tro hdroâng kuăn ngo a cheăm Ia Dreh, kong pơlê Gia Lai đi đo châ khu râ kăn pơkuâ ƀă mâu khu tơrŭm rêm khu râ vâ môi tuăn. Jâ Nguyễn Thị Ly Na – Phŏ Kăn hnê ngăn Khu pơkuâ Vâi kơdrâi cheăm Ia Dreh tối ăm ‘nâi, sap ing hơnăm nah, drêng tá hâi tơmot chiâng môi, Vi ƀan tơring Krông Pa (ton) hiăng pơkâ mơjiâng Kâu lăk ƀô̆ Teăn ếo pơtâk pơlê Nông Siu, ƀă 17 ngế, vâ rak ƀă mơnhông khôi túa lĕm tro hdroâng kuăn ngo Jarai a pơlê. Tơdroăng pêi dêi Kâu lăk ƀô̆ ôh tá xê to djâ ăm pêi lo liăn ăm nâ o, mê ối mơnhông châ khôi túa lĕm tro hdroâng kuăn ngo ăm rơxông ối nếo.

"Peăng Hngêi trung mâm non Hoa Hồng krếo khu vâi ki rơkê, Kâu lăk ƀô̆ teăn ếo pơtâk a hngêi trung vâ tơbleăng, hnê ăm rơxông ối nếo ‘nâi troh mâu tơmeăm dêi mơngế Jarai. Khu kố rơtế nâ o a mâu tíu pêi cheăng, mê cho pro ti lâi vâ châ  pơtối rak vế khôi túa lĕm tro dêi hdroâng kuăn ngo tơná; pói vâi tơmeăm dêi tơná châ rêm ngế ‘nâi troh ing tơdroăng trâm mâ mơhno khôi túa lĕm tro – rơhdruê xuăng".

Mâu roh hriâm châ tâ, châ hlo ki pơxúa má môi a Hngêi trung Mâm non Hoa Hồng, cheăm Ia Dreh, kong pơlê Gia Lai hiăng pro toăng ngêi trung mâm non chiâng tíu mơhno khôi túa lĕm tro ki phiu ro, tíu khôi túa lĕm tro hdroâng kuăn ngo ôh tá ối tung tíu chôu ‘măn tơmeăm ki ai nôkố, troh lâp lu rêm rơno prế, ếo pơtâk hdroâng kuăn ngo, rêm idrâp chuât xơtó dêi chêng koăng akố.