Klêi kơ’nâi châ mơnhên tối ‘na tơdroăng ki tơ’mot tung mâu tơdroăng dêi pơlê kong kân ki rơkê plĕng dêi UNESCO tung kơvâ tơdrá prôa, tơdrá hơdruê, pơlê kong kơdrâm Đà Lạt, kong pơlê Lâm Đồng dế pơkâ pêi pro hên troăng hơlâ vâ kring vế, thăm mơdêk tơdroăng pêi pro dêi mâu túa cheăng ‘na kơvâ tơdrá prôa, tơdrá hơdruê.

Drêng troh a hâi Pơlê kong kân lâp plâi tơnêi hâi lơ 31/10, pơlê kong kơdrâm Đà Lạt hiăng păng ‘nâng châ UNESCO pơ-ô, chêh ‘mot inâi tung pơlê kong kân ki hloh hlê rơkê plĕng UNESCO tung kơvâ tơdrá prôa, tơdrá hơdruê. Kố châ ngăn cho tơdroăng cheăng ki kal vâ pơlê kong kơdrâm Đà Lạt pơkâ hnoăng cheăng, pơtối mơdêk ivá cheăng ki hiăng rơkê ‘na tơdrá prôa, tơdrá hơdruê, ing mê, veăng po rơdâ tơrŭm cheăng ƀă lâp plâi tơnêi, thăm mơdêk ‘na tơdroăng cheăng kâ - rêh ối pơlê pơla pơtối châ mơnhông.

Tiô pôa Trần Quang Tú, Kăn hnê Vi ƀan pơlê kong kơdrâm Đà Lạt, pakĭng mâu tơdroăng thăm mơdêk hnê tối, thăm mơnhông ki hlê plĕng, pôu râng hnoăng cheăng dêi pơlê pơla, Đà Lạt dế pơkâ pêi pro adrêng hên troăng hơlâ vâ mơdêk krá tơniăn inâi, thăm mơnhông pơlê kong kơdrâm ki hloh hlê rơkê plĕng ‘na tơdrá prôa, tơdrá hơdruê tro tiô tơdroăng tơkêa ƀă UNESCO.

Tung mê, ki rơhêng vâ tối, tơkŭm pêi pro lĕm tro hnoăng cheăng kring vế, rak ngăn tơdrá prôa, tơdrá hơdruê tiô khôi hmâ, ing mê, vêh mơnhông tơdroăng ki tơ’lêi hlâu ‘na túa cheăng, troăng pơkâ vâ tơ’mot, thăm mơdêk pơkâ pêi pro hên tơdroăng cheăng ki ai tơdjâk troh tơdrá prôa, tơdrá hơdruê.