Sap hâi lơ 29 khế mơ’nui tung hơnăm tiô hâi mâ khế troh hâi má 5 Têt, Đà Lạt mơhnhôk 238.000 roh tơmối troh lăm ôm hêi, pơtê, tâk vâ chê 62% tâng pơchông ƀă roh kố hơnăm 2023. Tung kơxô̆ kố, ai 18.000 roh tơmối lâp plâi tơnêi, tâk 114% ƀă vâ chê 180.000 tơmối koi pơtê kơmăng.

Tơmối tâk rơdêi tung 3 hâi má 3, 4, 5 Têt pro hên tíu tê mơdró ô kâ a kơpong tíu xiâm Đà Lạt chiâng chôm a chôu ki tơkŭm ôu kâ. Vâ ôh tá chôm drô troăng kân môi tiah mâu hơnăm hdrối, Kŏng an pơlê kong kơdrâm Đà Lạt hiăng mơhnhôk 100% khu cheăng hnê prôk troăng kân.

Tiô Kŏng an pơlê kong kơdrâm Đà Lạt, rơtế ƀă hbrâ mơdât chôm drô troăng kân, tơdroăng séa ngăn, pơkuâ ƀă pơxâu phâk mâu ngế xôi ‘na ai trếo drôu tung châ, kơtâu têi, ƀơgai xuân châ khu cheăng thăm pêi pro.