Apoăng hơnăm kố, a Tíu chôu ‘măn rak vế kế tơmeăm khoăng ton nah Dak Lak, pơlê kong kơdrâm Ƀuôn Ma Thuột tơkŭm po môi tíu mơđah tơbleăng krê dó inâi ‘’Trường Sa – Tíu a ko têa rơlâu’’. Mơđah tơbleăng vâ chê 100 um xup ‘na tơdroăng hnê pơtâp hbrâ tơplâ ƀă tơdroăng rêh ối pêi cheăng dêi kăn ƀô̆, mô đô̆i ƀă kuăn pơlê a rơlố Trường Sa; troăng pêi 21 rơlố kŭn ối tung rơlố kân Trường Sa rơtế mâu tơmeăm môi tiah hlá cơ Tơnêi têa, hlá cơ lêng gâk kring têa kơxĭ kuăn pơlê Việt Nam, tơmeăm ki pro ing kơpeăng kŏng ing akrot têa kơxĭ, kơtôu kơpáu xua mâu lêng a rơlố Trường Sa pro xêh. Tung tơdroăng mơđah tơbleăng ối mơ’no um 5 kú phim Tơdroăng ki ai khât ‘na Trường Sa.

Mơđah tơbleăng hiăng mơhnhôk kơdrâm kuăn pơlê ƀă tơmối troh lăm ngăn. Pôa Tôn Thất Tuấn Ninh, ối a tơring Lăk, kong pơlê Dak Lak tối, mâu ƀai hiăng tối hên hĭn tŭm, achê, khât păng ‘nâng ‘na rơlố Trường Sa hên tơdroăng ƀă pêng păm tơdroăng rêh ối.

“A Tây Nguyên ƀă Dak Lak, roh apoăng á châ veăng môi mơđah tơbleăng chêh tối tơdroăng rêh ối xuân môi tiah tơdroăng cheăng dêi mâu lêng a rơlố Trường Sa, vâ kuăn pơlê a Tây Nguyên ‘nâi tơdroăng rêh ối a ko têa kơxĭ rơlâu dêi Tơnêi têa’’.

Ôh tá xê to a pơlê kong kơdrâm Ƀuôn Ma Thuột, sap hơnăm 2014 troh nôkố, Khu pơkuâ Tơdroăng kal mơ’no tiô troăng um tơvi, rơ’jíu ƀă Internet kong pơlê Dak Lak hiăng tơkŭm po hên tơdroăng pơtâng tối ‘na tơdroăng gâk kring hnoăng pơkuâ têa kơxĭ rơlố. Tung mê, ai mơđah tơbleăng troh lâp lu ‘’Hoàng Sa, Trường Sa dêi Việt Nam - Mâu tơdroăng ki mơnhên hnoăng mơnhông mơdêk ƀă luât’’ a tơring: MDrak, Ea Kar, Ea Súp, Krông Bông, Ea Hleo, Čư Kuin ƀă pơlê kong krâm Ƀuôn Hồ.

A rêm tíu mơđah tơbleăng lơgât ƀă mâu tơmeăm cho mơnhên tơdroăng mơnhông ƀă tiô luât mơnhên hnoăng pơkuâ dêi Việt Nam ƀă péa rơlố Hoàng Sa ƀă Trường Sa a Biển Đông. Mâu tơmeăm châ mơnhên tung hên tơmeăm dêi Việt Nam ƀă mâu kong têa, ki rơhêng vâ tối cho mâu tơmeăm, lơgât châ chêh kơchuâ, in sap ing chal 16 troh nôkố a Việt Nam ƀă a hên kong têa tung lâp plâi tơnêi.

Pôa Nguyễn Quốc Hiệp, Kăn phŏ pơkuâ tơdroăng kal mơ’no tiô troăng rơ’jíu, um tơvi ƀă Internet kong pơlê Dak Lak, Kăn pơkuâ Khu tơkŭm po mơđah tơbleăng tối ăm ‘nâi: Mâu tơmeăm ƀă vâ chê 100 lơgât châ mơđah tơbleăng cho tơkŭm mâu tơmeăm ki xiâm hiăng châ tơbleăng sap ing hdrối nah troh nôkố tung tơnêi têa ƀă lâp plâi tơnêi; mơnhên tơdroăng mơnhên, pêi pro ƀă gâk kring hnoăng pơkuâ dêi Việt Nam ƀă 2 rơlố Hoàng Sa ƀă Trường Sa. Klêi rêm roh mơđah tơbleăng mơhnhôk rơpâu roh ngế kuăn pơlê troh lăm ngăn, ti tăng plĕng.

“Ing mơđah tơbleăng hiăng kum kal khât vâ mơdêk hlê plĕng, hiâm mơno pôu râng hnoăng cheăng dêi rêm ngế kăn ƀô̆, đảng viên tối krê ƀă kuăn pơlê Việt Nam tối tơdjuôm, kum hên tung tơdroăng gâk kring hnoăng pơkuâ têa kơxĭ, rơlố pơlê xiâm ƀă pêi pro ƀlêi trâng 2 hnoăng cheăng pêi ton xŏn cho mơjiâng ƀă gâk kring Tơnêi têa’’.

Tơdroăng pơtâng tối ‘na hnoăng pơkuâ têa kơxĭ rơlố ối châ mâu tơring a Dak Lak pêi pro ƀă troh lâp lu troh thái cô ƀă hok tro tung mâu hngêi trung. A pơlê krâm Ƀuôn Hồ, Roh tơ’noăng ‘’O hâk vâ têa kơxĭ, rơlố Việt Nam’’ hiăng châ tơkŭm po a mơ’nui hơnăm 2023 tiô troăng mơđah tơbleăng a sân khâ̆u ăm mâu hngêi trung râ má péa. Ing roh rơ’noăng mê, tá thái cô ƀă hok tro pơrá ai tơdroăng ki hbrâ kơtăng, ti tăng plĕng trâu hơngế ‘na hnoăng pơkuâ têa kơxĭ rơlố pơlê xiâm, ing mê mơhno tơdroăng tơmiât pêi rơkê tung mâu tơdroăng tơ’noăng tơpui a ngiâ hên ngế, tơdroăng ki tơná rơkê ƀă tơdroăng pro pơro pơtâng tối.

Cô hnê H’Bhai Mlô, hngêi trung râ má péa Trần Phú, bêng Đoàn Kết, pơlê kong krâm Ƀuôn Hồ tối: Roh tơ’noăng ôh tá xê to mơjiâng tíu xah hêi pơxúa mê ối kum mơdêk hlê plĕng dêi thái cô ƀă hok tro ‘na têa kơxĭ, rơlố Việt Nam, ing mê mơjiâng, păn roăng tuăn pâ pơlê xiâm, tơnêi têa.

“Ăm hok tro châ achê rĕng ƀă ki kơnâ têa kơxĭ rơlố, tơdroăng mơnhông ton nah mâu rơxông pôa pâ hiăng pleăng dêi mơheăm chhá, châ chăn tung mâu roh tơplâ xâ gâk kring têa kơxĭ rơlố. Vâ mâu vâi o châ achê rĕng ing mê hlê plĕng, troăng tơmiât tro ‘na ki kơnía têa kơxĭ, rơlố dêi pơlê xiâm tơná. Mâu vâi o hok tro xuân hâk tơngăm ti tăng plĕng ƀă tăng mâu rơkong kơ-êng tiâ, mâu tơdroăng hlê plĕng ‘na têa kơxĭ rơlố’’.

Ƀă o Trần Nguyễn Đăng Khoa, hok tro lâm 11A1, Hngêi trung râ má pái Y Jut, cheăm Êa Bhôk, tơring Čư Kuin, kong pơlê Dak Lak, xua hâk vâ mê đi đo ti tăng plĕng tơdroăng, ngăn clip ‘na têa kơxĭ rơlố tung internet, kum o hlê plĕng nhên ‘na ki kơnía dêi têa kơxĭ rơlố tơnêi têa:

“Ƀă á o cho hok tro kal mơ-eăm hriâm tâp hôm tâ mê nếo, thăm pơtâng tối troh rêm ngế ‘na hnoăng pơkuâ têa kơxĭ rơlố dêi Việt Nam. Tơdroăng pói vâ dêi á o cho chiâng môi ngế lêng gâk kring têa kơxĭ, xua têa kơxĭ rơlố cho môi iâ mơheăm chhá dêi pin, chiâng ngế gâk kring têa kơxĭ rơlố mê cho hnoăng cheăng ki krih tơviah’’.