Kố cho pơlê má 4 dêi kong  pơlê châ vêh mơnhên tối cho pơlê ôm hyô pơlê pơla. Ing mơ’nui hơnăm 2023, tiô tơdroăng pơkâ kơxô̆ 2433 dêi Vi ƀan hnê ngăn kong pơlê Dak lak, ƀuôn Tơng Jŭ châ tŏng gum ‘na kế tơmeăm, mâu chêng koăng, ampli loa, kơmăi vi tĭnh, kơƀăng tăng ƀă mơjiâng trang thŏng tin điê̆n tưh ôm hyô vâ mơnhông ‘na tơdroăng ôm hyô pơlê pơla tiô troăng hơlâ ki tơniăn tâ.

Tiô khu ngăn ‘na túa lĕm tro, tơ’noăng ivá ƀă Ôm hyô kong pơlê Dak Lak, ƀuôn Tơng Jŭ cho môi tung 4 to pơlê châ mơnhên tối cho  pơlê ôm hyô pơlê pơla tung hơnăm kố, rơtế ƀă 3 to pơlê cho ƀuôn Tuôr, pơlê kong kơdrâm Ƀuôn Ma Thuột, ƀuôn Kly A (pơlê kong krâm Ƀuôn Hồ) ƀă ƀuôn Jun (tơring Lăk). Kố cho tơdroăng cheăng i kân dêi kơvâ ôm hyô vâ koh tơbâ troh 120 hơnăm hâi mơjiâng kong pơlê Dak Lak. Tiah mê, troh nôkố, kong pơlê Dak Lak hiăng ai 7 to pơlê ôm hyô pơlê pơla châ mơjiâng ƀă hiăng châ pêi cheăng.