A Hngêi trung râ má pái Trần Đại Nghiã, tơring tơkăng kong Buôn Đôn, Khu ngăn ‘na  Văn hok  ngê̆ thuât kong pơlê Dak Lak tơkŭm po tơdroăng “Rêm kơtâ hlá mơ-éa po ngăn - Tơdroăng hâk ro lo kơneăng klêng’’. A kố, mâu vâi o hok tro châ pêi pro tơdroăng trâm mâ, tơpui tơno, tơbleăng hlá mơ-éa, pơchuât hlá mơ-éa ƀă ai mâu tơdroăng xah hêi túa lĕm tro ki hơniâp ro; pro vâi o chiâng môi tiah mơngế ki chêh tung hlá mơ-éa hơ’muăn ing mâu tơdroăng pro pơro ƀă mâu ƀai hơdruê xuăng hơniâp ro.

Rôh kố, Khu ngăn Văn hok ngê̆ thuât kong pơlê Dak Lak hiăng hbru  chât kơxop hlá mơ-éa văn hok ngê̆ thuât ăm Hngêi trung râ má pái Trần Đại Nghiã ƀă hlối tơbeăng kơxop hlá mơ-éa “Tơdroăng chêh Văn hok Ngê̆ thuât, Hlá tơbeăng hriâm ƀă pêi pro tiô tuăn tơmiât, hiâm mơno ki lĕm, túa pêi cheăng Hồ Chí Minh”  xua Khu rah chêh.  Kơxop hlá mơ-éa mê klối 300 kơtâ, tơkŭm chêh hên cho mâu dêi  văn ngê̆ sih, khu chêh hlá tơbeăng a Dak Lak dêi hên kơvâ cheăng môi tiah kơchuâ um, ‘na tơdrá hơdruê, xup um, chêh văn ki xŏn, pro thơ ƀă chêh hlá tơbeăng.

Rêm ƀai chêh cho môi tơdroăng hơ’muăn, ai um lĕm mơhno tối ‘na tơdroăng rêh ối, ai hên ƀai hriâm kơnía git ‘na tơdroăng hriâm ƀă pêi pro tiô tuăn tơmiât, hiâm mơno ki lĕm, túa pêi cheăng dêi Hồ Chí Minh, ngế  thơ Nguyễn Tiến Sỹ, ối a pơlê kong kơdrâm Buôn Ma Thuột tối:

“Tơdroăng hriâm tiô troăng hơlâ hiâm mơno ki lĕm dêi Pôa cho môi tơdroăng chêh tối hên. A hmâ tơkŭm chêh a tơdroăng ton nah, ‘na lịch sử ƀă tơdroăng tuăn ngôa tơmiât tơplâ dêi kăch măng, malối cho tung pơla tơnêi têa dế mot rơxông ki nếo. Tung pơla hdrối kố nah á ai môi ƀai chêh ‘na tơdroăng ton nah dêi kuăn ngo, ai 3 ƀai thơ hiăng chêh in tung kơxop hlá mơ-éa dêi Hô̆i Văn hok Ngê̆ thuât tơbleăng tung rôh kố”.

Xuân tung rôh kố, a Tíu ‘măn rak hlá mơ-éa kong pơlê Dak Lak tơkŭm po tơdroăng tơbleăng hlá mơ-éa um “Pơlê pêi cheăng tiô hmâ pêi pro ki lĕm dêi Việt Nam” dêi Helena Vân.  Kơxop hlá mơ-éa tơkŭm  lối 150 um méa ‘na pơlê tơdroăng pêi cheăng tiô túa ton nah troh lâp 3 kơpong Peăng Kơnhŏng - Tơdế - Peăng Hdroh. Mâu tơdroăng chêh  ai 2 nâl Xuăn - Ănglê. Ngế xup um Helena Vân ăm ‘nâi, ing mâu hlá mơ-éa, nâ vâ ‘măn rak tơdroăng hơ’muăn túa lĕm tro dêi rêm pơlê pêi cheăng ƀă bâ eăng, ƀă mơngiơk lĕm.

“Ing hên mâu kơtâ um dêi mâu pơlê pêi cheăng pơrá phá dêi rơpó, a tối mơgêi ƀă rah xo mâu khu um ki lĕm ki pơlê pêi cheăng pro tơmeăm dế vâ mơhía lôi, bú ối iâ mâu rơpŏng hngêi ƀă mâu ngế ki ối rak vế tơdroăng cheăng pêi túa ton nah. A púi vâ kô po rơdâ rế hên kơxop hlá mơ-éa ki kố ƀă kô ăm mâu hngêi ‘măn rak hlá mơ-éa dêi tơnêi têa, hngêi ‘măn rak hlá mơ-éa dêi mâu kong pơlê vâ rêm ngế kô lăm troh amê vâ pơchuât ngăn hlá mơ-éa, mung hlá mơ-éa vâ ‘mâi mơnhông pơlê ƀă púi vâ châ hên ngế ‘nâi tâ ƀă mâu pơlê pêi cheăng pro tơmeăm tiô túa roh nah ki hiăng vâ piu lôi mê”.