Pôa Trần Đức Nhật, Kăn phŏ hnê ngăn Vi ƀan pơlê kong kơdrâm Ƀuôn Ma Thuột, kong pơlê Dak Lak tối ăm ‘nâi, klăng leh tơbâ 49 hơnăm ƀlêi trâng Ƀuôn Ma Thuột, tơleăng lĕm kong pơlê Dak Lak (10/3/1975 – 10/3/2024) pơlê kong kơdrâm Ƀuôn Ma Thuột kô pêi pro tơdroăng ô kơphế tê kơtê tung pơlê kong kơdrâm Ƀuôn Ma Thuột.

Pơtối mê, tơdroăng ôu kơphế tê kơtê kô tơkŭm po a Kơchơ tơkŭm ai tiô hâi @ Ƀuôn Ma Thuột, Plông kân 10 khế 3 ƀă Đường sách Ƀuôn Ma Thuột tung 2 hâi, 9 ƀă 10/3/2024. Pakĭng mê, khu râ kăn pơkuâ pơlê kong kơdrâm xuân pêi pro tơdroăng ôu kơphế tê kơtê tung mâu bêng, cheăm ki vâ iâ 1 hâi (10/3/2024).

Troh nôkố hiăng ai lối 400 tíu ôu kơphế tung pơlê kong kơdrâm Ƀuôn Ma Thuột kĭ veăng. Inâi, tíu mâu tíu ôu kơphế veăng ăm ôu kơphế tê kơtê châ tối tơbleăng rơdâ tung mâu rơ’jíu, um tơvi ƀă tung trang măng pơlê pơla.