Vi ƀan hnê ngăn kong pơlê Dak Lak nếo môi tuăn ăm phêp troăng hơlâ ăm phêp pơlê kong kơdrâm Ƀuôn Ma Thuột tơbleăng tíu pơkâ bro kơphô̆ prôk chêng ƀă tơdroăng ki ăm mung rơxế mái kơto a pơlê kong kơdrâm. Tơdroăng pơkâ kố châ tơngah kô bro chiâng môi tơdroăng ki rêh ối tơdjuôm pơxúa ăm kuăn pơlê ƀă tơmối.

Tiah mê, kơpong kơphô̆ prôk chêng tiô tối hdrối kô xing xoăng a tâi tâng troăng prôk Phan Đình Giót (troăng sap ing troăng Lê Duẩn troh troăng Lê Hồng Phong). Drô troăng prôk chêng kô mơđah tê mâu kế tơmeăm ki bro ƀă kŏng, kế tơmeăm chôu vế ƀă mâu kế tơmeăm kâ ôu ki xiâm dêi Tây Nguyên.

Ƀă tơdroăng ki mung rơxế mái kơto a troăng kơphô̆ tiô tối hdrối kô xing xoăng dâng 20 tíu a mâu kơpong rêh ối tơdjuôm, mâu kơpong tíu xiâm tê mơdró, mâu tíu troh ngăn tíu xối tơbâ mơhno túa lĕm tro ton nah, mâu tíu ki tot kôm rơxế bus. Kơxô̆ liăn ‘no pêi pro tơdroăng kố cho tiô tơdroăng ki ing pơlê pơla ‘no.