Rôh apoăng hơnăm nếo, hbrâ vâ tơdah Têt tiô khôi hmâ dêi hdroâng mơngế, a kơpong Tây Nguyên po hên mơdĭng túa lĕm tro ki lĕm tơviah. Kố xuân cho rôh vâ mơngiơk ếo pơtâk mâu hdroâng kuăn ngo châ mơđah tơbleăng rơtế ƀă idrâp chêng koăng, tơdrá hơdruê xuăng. Nâ H’Blim a ƀon Ja Rah, cheăm Nâm Nung, kong pơlê Lâm Đồng rơtế ƀă dêi kơnốu ƀă mâu vâi muăn xâp ếo pơtâk kuăn ngo M’Nông veăng ai mâ tung po mơdĭng “Tăm Blang M’prang ƀon” tối:

“Hdroâng M’Nông ai ếo pơtâk chal krâ lĕm khât ƀă mâu chêng, túa kơyhnhon xuăng gá ro ƀă ếo pơtâk chal krâ vâi tĕn xêh, ƀai chêng vâ hmâng ƀai ki lâi mê tâp ƀai ki mê, ai rôh po tơdroăng klâi mê mơđah krếo thế vâi krâ nhŏng o troh ngăn, mơhnhôk rah xo ƀai chêng klâ ăm gá tro ƀă túa kơhnhon xuăng, túa lĕm tro chal krâ kố gá ro xuân hnê pơchân kơnốu kuăn veăng ai mâ á ro khât”.

Mơngiơk ếo pơtâk chal krâ ôh ti xê to ếo pơtâk ki vâ xâp tung mâu hâi leh, po mơdĭng, mê gá hiăng chiâng túa ki lĕm tro tung pơlê pơla mâu hdroâng kuăn ngo Tây Nguyên. Jâ Ka Thu a cheăm Hòa Ninh, kong pơlê Lâm Đồng tối, ếo pơtâk chal krâ hmâ ƀă mơngế K’Ho sap ing rôh ki nếo kot mâ troh a hâi ki kơtê i hiâm, hlâ ah:

“Á hnê pơchân mâu vâi kuăn, maluâ nôkố ai hên ché tê a kơchơ, la ƀă kuăn ngo pin mê ếo pơtâk chal krâ athế rak vế, pôi tá ăm gá hía, xua troh hâi má mơ’nui, tâng ôh ti ai môi plâ ếo pơtâk mê kơxiâp khât kơ vâi krâ nhŏng o tung pơlê cheăm, ƀă jâ pôa pin. Athế ai ếo pơtâk vâ vêh ƀă jâ pôa, mê athế khŏm mơ-eăm ai”.

Pơxiâm ing tơdroăng ki hâk vâ ai ếo pơtâk xâp tung tơdroăng rêh ối, nôkố tung mâu măng pơlê pơla, sap ing trang krê dêi tơná troh mâu tíu ki tĕn chêp pơchoh, khu pêi cheăng tơrŭm ƀă hên ki ê xuân eăng  mơngiơk ếo pơtâk chal krâ dêi mâu hdroâng kuăn ngo Tây Nguyên. Nếo achê kố, a Khu pêi cheăng tơrŭm Tê̆n ếo pơtâk chal krâ Tơng Bông, Vi ƀan hnê ngăn bêng Ea Kao, kong pơlê Dak Lak hiăng tơkŭm po (laiv-strim) livestream ai inâi “Ƀuôn Tơng Jŭ – Ea Kao pâ koh hmât”, mơ’no tơdrêng tung măng pơlê pơla môi tiah Facebook, Zalo OA, TikTok.

Tơdroăng kố cho vâ tơbleăng tơmeăm tĕn chal krâ ƀă mơđah tơbleăng túa ôm hyô pơlê pơla ƀuôn Tơng Jŭ, ƀă mâu tơmeăm ki xiâm môi tiah ếo pơtâk chal krâ kơnốu, kơdrâi Rơđế, ếo pơtâk vâi hdrêng, ếo xŏn, ếo đâm tê̆n, kra-vat, ché, kơleăm lêk kơƀăng ƀă mâu ếo pơtâk chal nôkố. Ing tơdroăng ki livestream, cheăm hiăng tơbleăng tâi tâng kong kế chiâng xêh, tơnêi tơníu túa lĕm tro dêi bêng Ea Kao tro ƀă tơdroăng rêh ối pêi cheăng dêi Kuăn pơlê, malối cho kuăn pơlê hdroâng kuăn ngo.

A Gia Lai ai hên tíu ôm hyô pơlê pơla ki lĕm ro môi tiah Plei Ốp (bêng Pleiku), Pơlê Ôm hyô Pơlê pơla Ia Mơ Nông, cheăm Ya Ly, lơ môi tiah (hom-stêi) homestay Đinh A Ngưi a cheăm Tơ Tung ƀă hên ki ê, châ hmâng vâi tŏn chêng koăng, tăng ‘nâi tơdroăng po mơdĭng, kế kâ ƀă tơdroăng rêh ối kong kế nhâ loăng, pro chiâng túa rêh kâ ối krá tơniăn tơrŭm ƀă rak vế kế tơmeăm kơnía git ‘na túa lĕm tro.