Ki nhên a Pơkâ kĭ Tơdroăng tơkŭm po Festival sâm Ngọc Linh- Kon Tum, Việt Nam (Festival sâm Ngọc Linh), Vi ƀan hnê ngăn kong pơlê Kon Tum pơkâ khŏm pêi tơƀrê môi tơdroăng rế cho tơdroăng cheăng kâ, rế pro pơxúa djâ tơvế ki rơkê dêi mơdĭng dêi kơpong tơnêi ai hên tơdroăng mơhno túa lĕm tro.

Ing rôh po Festival sâm Ngọc Linh kong pơlê Kon Tum rơhêng vâ mơdêk hnoăng cheăng rak vế kế tơmeăm kong kế ki chiâng xêh, tơdroăng ôm hyô tiô túa ki tơtro; pro ivá tơ’mot liăn cheăng ăm mâu kế tơmeăm dêi sâm Ngọc Linh ƀă pơkeăng ki ê chiâng mâu kế tơmeăm ki ai inâi, tơdrêng amê hlối bro chiâng mâu kế tơmeăm ôm hyô tơtro ƀă sâm Ngọc Linh.

Vâ hbrâ ăm Festival sâm Ngọc Linh tơkŭm po rôh apoăng a hơnăm 2024, Vi ƀan hnê ngăn kong pơlê Kon Tum hiăng pơcháu ăm Khu ngăn mơhno túa lĕm tro, tơ’noăng ivá ƀă ôm hyô pơkuâ po, tơrŭm ƀă mâu kơ koan, tíu pêi cheăng, cheăm tơring ki ai tơdjâk troh pêi klêi tơdroăng mơjiâng túa pơkâ vâ tơbleăng pêi pro hdrối hâi lơ 20/10/2023.