A pơlê kong kơdrâm Pleiku, Khu tơrŭm ngăn ‘na Ôm hyô kong pơlê Gia Lai nếo tơkŭm po hneăng tơpui tơno “Pơ-ô pơ-eăng rơda lĕm tro dêi hdrông kuăn ngo-rơtế prôk ƀă tơdroăng ôm hyô châ mơnhông”, ai tá tơdroăng ki veăng pêi pro dêi Khu xiâm ngăn ‘na Ôm hyô tơnêi têa Việt Nam ƀă hên khu mơdró kâ ối tung tơnêi têa, ƀă kong têa ê. Mâu ngế ki veăng ai mâ mê, hiăng veăng tơpui tơno, tối mơhno hên troăng hơlâ cho vâ thăm mơnhông tunjg tơrŭm vâ pro tơtêk luâ tâ kơ mê nếo tung kơvâ ôm hyô, laga, athế tơrŭm krá kâk ƀă hnoăng cheăng rak vế, pơtối mơnhông khôi túa, vêa vong dêi hdrông kuăn ngo, pakĭng mê, hnối tơno tơnêng nhên ‘na tíu ki ôí kreăng, ôí tơvâ tơvân dế nôkố, xua tá hâi ai troăng hơlâ pơkâ tối  nhên ăm tơdroăng cheăng ôm hyô tung pơlê pơla.

Ai hên mâu rơkong tơpui tối dêi mâu kăn ki veăng hôp, vâ môi tuăn Gia Lai kal athế mơjiâng pro hnoăng cheăng ki nếo, krá kâk, ton la ngiâ, athế hdró mơhno tơbleăng nhên mâu tíu ki po ôm hyô ki xiâm, ai tơmeăm khoăng, tơdroăng ki kơnía git khât, môi tiah tôu chêng koăng, hdrôu, rơngê rơngối, túa mơjiâng pro kuât ƀă hên hĕng mâu tơdroăng ki ê. Ki rơhêng vâ tối, pơkal athế ai tơdroăng tơpui tơno i nhên, khu ngế ki pôu râng hnoăng cheăng ăm tơná kuăn pơlê cho hdrông kuăn ngo, gum ăm kuăn pơlê hơ’muăn tối, xôi kiâ, tơno tơnêng mâu khôi túa, vêa vong ki păng ‘nâng dêi hdrông kuăn ngo tơná, ing mê, kô koai phim, xup um, bro video, ƀă tâ ‘măn tung măng pơlê pơla, veăng mơnhông mơdâk lân rơdâ bâ châk hơngê khôi túa, vêa vong dêi hdrông kuăn ngo a Gia Lai tiô kơ túa ki lĕm tro, ro tơniăn, krá ton.