Kố cho tơdroăng ki ối tung mâu tơdroăng cheăng Măng tĭng Mơhno túa lĕm tro – Ôm hyô Gia Lai hơnăm 2023. A rôh leh, 6 đô̆i ki tŏn chêng koăng ƀă vâ chê 200 ngế ngê̆ nhân lo ing mâu cheăm, pơlê kân tơring Čư̆ Pah hiăng ai mâu rôh prôk pơtăng a troăng, kơ’nhon xuăng tiô idrâp chêng koăng a kuât pơlê Ia Gri vâ tơdah mâu kăn ƀă mâu tơmối ki veăng troh a rôh pơxiâm po tơdroăng.

Măng tĭng Reăng Mâ hâi kong – Ngo on Čư̆ Đăng Ya hơnăm 2023 kô po troh tâi hâi lơ 12/11, mâu ngê̆ nhân tơring Čư̆ Pah kô mơđah tơdroăng ki tĕn pong, tĕn ếo pơtâk, pong rơgi loăng, pro mâu tơdrá proâ hdroâng kuăn ngo, mâu kế tơmeăm xúa tung tơdroăng rêh ối dêi hdroâng kuăn ngo Jarai, Bơhnéa ƀă ki ê vâ kum ăm tơmối ngăn. Tơdroăng ki nếo dêo ‘Măng tĭng reăng mâ hâi kong – Ngo on Čư̆ Đăng Ya” hơnăm 2023, kuăn pơlê a tơring kố ƀă mâu tơmối ối châ ngăn mâu rôh ki mơđah tơbleăng hơdrue xuăng ƀă inâi “Hơniâp ro tiô idrâp pêi báu”.