Ƀă ki xiâm cho ô eăng mâu kế tơmeăm ki kơnía git ‘na mơhno túa lĕm tro khôi hmâ ki lĕm dêi mâu hdroâng kuăn ngo kơpong Tây Nguyên, mơđah tơbleăng, mơhnhôk tơmối ôm hyô, Hâi mơdĭng Mơhno túa lĕm tro, Tơ’noăng ivá ƀă Ôm hyô mâu hdroâng kuăn ngo kơpong Tây Nguyên rôh má 1 hơnăm 2023 châ tơkŭm po tung 3 hâi, sap ing hâi lơ 29/11 troh hâi lơ 1/12 a pơlê kong kơdrâm Kon Tum, kong pơlê Kon Tum.

Tâi tâng ai dâng 1 rơpâu ngế ngê̆ nhân, diễn viên, mâu ngế ki tơ’noăng cho kuăn pơlê dêi mâu hdroâng kuăn ngo nôkố dế rêh ối a 5 to kong pơlê kơpong Tây Nguyên. Ƀă inâi “Kân rơdâ Tây Nguyên- Ki xiâm dêi tơdroăng rak vế”, Hâi po mơdĭng Mơhno túa lĕm tro, Tơ’noăng ivá ƀă Ôm hyô mâu hdroâng kuăn ngo kơpong Tây Nguyên rôh má 1 hơnăm 2023 po hên tơdroăng ki hơniâp ro. Rơtế ƀă tơdroăng mơđah, rôh mơdĭng ai mâu tơdroăng mơhno túa lĕm tro, tơ’noăng ivá ƀă ôm hyô.