Mơhé dế a rơnó pôe báu, laga kơmăng ki lâi, Plei Ku Roh, bêng Yên Đỗ, pơlê kong kơdrâm Plei Ku xuân kơdrâm chêng chuât ƀă  rơkong tơpui tó a kơpong kuât. Xua kố cho drêng vâ chê 50 ngế dêi mâu khu tô chêng cho mơngế ối kŭn, khu tôu chêng cho droh rơtăm ƀă khu tôu chêng cho vâi kăn tung pơlê tá hiâm mơno pơtâp tôu ƀă  pơtâp tôu mâu ƀai veăng Festival – khu tôu chêng mâu rơtăm tối ăm ‘nâi, khu ngê̆ nhân dêi pơlê kô mơđah tơbleăng 4 ƀai cho vêh pro tĭng kâ báu nếo, hơdruê, tôu chêng koăng ƀă xah kế xah hdroâng kuăn ngo:

“Rơnó pôe báu, laga mâu ngế ngê̆ nhân xuân tá hiâm mơno pơtâp mâu ƀai ton laga tơdroăng tôu nếo vâ tơdroăng xah thăm rơkê tâ, vâ ăm tơmối ngăn”.

A tơring Krông Pa, tơdroăng hbrâ xuân kơdrâm phiu ro. Pôa Ngô Đức Mạo  - Kăn pơkuâ Tíu xiâm mơhno khôi túa lĕm tro – Tơdroăng kal ƀă Tơ’noăng ivá tơring tối ăm ‘nâi: Hơnăm kố, tơring pơtroh 50 ngế ngê̆ nhân veăng hên tơdroăng tung plâ Măng tĭng mơhno khôi túa lĕm tro Ôm hyô dêi kong pơlê. Pơtối mê, mâu tơdroăng tôu chêng kô châ mơđah tơbleăng tung festival; mâu ngê̆ nhân vêh pro hên tơdroăng tiô khôi vâi krâ nah môi tiah teăn tơmeăm, pong rơgi loăng, vê prế tung leh mơdĭng troăng kân kơphô̆. Vâ mơjiâng môi tíu mơhno khôi túa lĕm tro tung pơlê, khu ki veăng ối pế pơchên mâu kơchâi kâ ki má môi dêi pơlê môi tiah tơxông prông, í pôh, hơ’nêh ro têng môi hâi vâ tơbleăng ăm tơmối:

“A mâu roh kơmăng, klêi kơ’nâi môi hâi pêi cheăng pêt mơjiâng tơmeăm, mâu ngê̆ nhân pơrá tơkŭm a hngêi hôp tơdjuôm pơlê pơla vâ pơtâp. Ƀă mâu ngế ngê̆ nhân veăng pong rơgi loăng, vê prế, teăn pro tơmeăm, pât chêng mê xuân hbrâ vâ lăm  troh a Plei Ku cho hiăng kêi đeăng tơmeăm, tơbleăng ăm tơmối. Kơmăng ki lâi mâu ngê̆ nhân xuân pơtâp tĭng tiô khôi vâi krâ nah môi tiah mơdĭng hâk to hngêi nếo, mơdĭng kâ kơpôu vâ djâ ăm hên mơngiơk dêi mơngế Jarai a Krông Pa’’.

Măng tĭng khôi túa lĕm tro – Ôm hyô Gia Lai hơnăm 2023 kô tơkŭm po sap hâi lơ 11/11 troh lơ 18/11 veăng amê ai dâng 1.000 ngế ngê̆ nhân tung kong pơlê ƀă kong pơlê ki ê. Măng tĭng leh kô châ po ƀă Festival Tíu mơhno khôi túa lĕm tro Chêng koăng Gia Lai 2023 tơkŭm khu ngê̆ nhân dêi 17 tơring, pơlê kong krâm, pơlê kong kơdrâm tung lâp kong pơlê ƀă mâu kong pơlê Tây Nguyên. Pơtối cho mâu leh mơdĭng ki kân krip, ro má môi mơtiah leh mơdĭng reăng mâ hâi kong – ngo on Čư̆ Đang Ya (tơring Chư Păh); roh tơ’noăng vo plong loăng a têa kroăng Pô Cô (tơring Ia Grai).

Roh kố, kong pơlê Gia Lai xuân tơkŭm po mâu leh mơdĭng troăng kơphô̆; vêh pro tơdroăng mơhno khôi túa lĕm tro pơlê pơla, mơdĭng khôi túa vâi krâ nah; mơđah tơbleăng, mơđah kế xah Tây Nguyên, um ngê̆ thuât ‘na khôi túa lĕm tro Gia Lai, tơbleăng ‘na tơmeăm kơnía tơnêi têa ki má môi ƀă tơmeăm kơnía tơnêi têa dêi kong pơlê Gia Lai, …

Pôa Nguyễn Xuân Hà – Kăn pơkuâ ƀơ-rô khôi túa lĕm tro – Tơdroăng kal pơlê kong kơdrâm Plei Ku, tíu tơkŭm po hên tơdroăng ki kal má môi tung măng tĭng tối ăm ‘nâi:

“Nôkố, mâu cheăm bêng, mâu kơ koan tíu cheăng dêi pơlê kong kơdrâm Plei Ku dế thăm hbrâ lĕm tro tơdroăng pơtâng tối, mơđah tơbleăng um méa Gia Lai tối tơdjuôm, um méa kuăn mơngế kơphô̆ ngo Plei Ku tối krê troh ôm hyô tung tơnêi têa ƀă kong têa ê. Nôkố mâu khu ngê̆ nhân a mâu pơlê kuăn pơlê hdroâng kuăn ngo dế thăm hriâm tâp a mâu tơdroăng mơđah tơbleăng chêng koăng, pong rơgi loăng, troh rơnuâ ếo pơtâk hdroâng kuăn ngo, teăn pro kế tơmeăm khoăng vâ hbrâ ăm mâu tơdroăng pêi tung tơdroăng po Măng tĭng Khôi túa lĕm tro ôm hyô kong pơlê Gia Lai’’.

Măng tĭng Khôi túa lĕm tro – Ôm hyô Gia Lai hơnăm 2023 vâ tơbleăng, mơđah mâu ki kơnâ khôi túa lĕm tro ki má môi, ki kơnâ ‘na kế tơmeăm khoăng ôm hyô dêi kong pơlê Gia Lai, ki rơhêng vâ tối cho tíu khôi túa lĕm tro chêng koăng Tây Nguyên ối tung tơdroăng pêi pro vêh bro, rak vế ƀă mơnhông ki kơnía dêi tơmeăm kơnâ mơhno khôi túa lĕm ‘na hiâm mơno teăng mâ ăm kuăn mơngế. Pôa Trương Hải Long, Kăn hnê ngăn Vi ƀan kong pơlê Gia Lai pơkâ thế mâu kơ koan cheăng mơdêk hiâm mơno mơdêk hnoăng, hbrâ tơrŭm tơniăn tơkŭm po tơdroăng kal ai ki nếo, ki lĕm tro má môi, mơhnhôk kuăn pơlê, tơmối, mâu khu mơ’no liăn cheăng, kum mơdêk cheăng kâ, khôi túa lĕm tro ƀă ôm hyô tung kong pơlê. Mâu hngêi tê mơdró, hngêi ăm tơmối kâ koi ối pơtê ôh tá mơdêk yă roh kố; kuăn pơlê pơlê kong kơdrâm Plei Ku pơtối pêi pro troăng pêi hngêi mơdrah ‘’Lĕm achê môi tiah ối a hngêi’’… vâ mơjiâng um méa lĕm achê, hâk vâ tơmối, tơniăn tơdroăng kal châ tơkŭm po châ tơ-ƀrê, tơniăn, kơnía./.