Tung 2 hâi hiăng luâ, ai vâ chê 600 ngế kăn ƀô̆, mơngế ki hơdruê xuăng dêi 15 khu tung kong pơlê Dak Lak hiăng veăng mơđah, ai 82 tơdroăng hơhruê, xuăng, rêi prôa, pro pơro. Tiô tối mơnhên dêi Khu châm điêm, mơđah hơdruê xuăng roh kố hiăng tơ’mot hên khu râ, kơvâ cheăng, rơxông vâi ‘nĕng, rơxông droh rơtăm, khu hnŭm pơla rá phá dêi pó, tơkeá vâ tối, mâu ngế ki veăng mơđah hơdruê xuăng kố sap ing 13 hơnăm troh a mâu ngế hiăng krâ châ 84 hơnăm. Tơdroăng kố ăm hlo, tơdroăng hơdruê xuăng hiăng châ lân rơdâ lâp lu ƀă ai ivá ki thăm rế vâ tơ’mot hên tâi tâng khu râ kuăn pơlê tung kong pơlê veăng hơdruê xuăng.

\

Mâu khu ki veăng tơ’noăng mê hiăng séa mơnhên ngăn tơdroăng ki xiâm dêi inâi tơkŭm po “Dak Lak idrâp chuât hâi ki nếo”, ai tơdroăng ki hbrâ rơnáu ƀă mơ’no liăn ngân vâ krếo mâu thái cô hnê mơhno, hnê mơjiâng tơdroăng hơdruê xuăng, tăng rah mâu tơdroăng hơdruê xuăng ki tơtro, lĕm ro, krip krih ‘na ngê̆ thuât ƀă túa ki mơđah tơbleăng; ai hên khôi túa, vêa vong, ếo pơtâk, mơngiơk pơrá phá, ing trơdroăng hơdruê xuăng chal vâi krâ nah tá troh a chal nếo nôkố. Túa lĕm tro tiô khôi hmâ dêi hdroâng kuăn ngo; mơhno tối ki krê dêi xêh dêi tơrêm pơlê cheăm, tơring, ing mê, khoh chiâng châ hlo, châ ‘nâi tơdroăng ki hên túa, hên vêa vong, gok gâ, hên hĕng dêi tơdroăng hơdruê xuăng.