Tơdroăng mê po sap hâi lơ 6/12 ƀă mâu tơdroăng pêi pro mê cho: Hôp tơbleăng, hnê pêi pro tơdroăng ôm hyô; pêt reăng ban; tơdroăng mơđah hơdruê xuăng pơxá Điện Biên - Tây Bắc - Pơlê kong kân Hồ Chí Minh tơdjêp ƀă mơnhông tơƀrê; prôk pơtăng drô troăng kơphô̆ pơxá “Điện Biên - Hên túa lĕm tro tơkŭm ƀă dêi rơpó’’.

Tung mâu hâi po Măng tĭng mơdĭng cho mơđah tơbleăng um ing tơdroăng plâ ƀlêi trâng Điện Biên Phủ hơnăm 1945 troh Tơplâ ƀlêi trâng châ pro tơleăng lĕm rơnó Hơngui 1975.  A rôh pơxiâm po leh, kuăn pơlê dêi Pơlê kong kân Hồ Chí Minh ƀă tơmối lâp plâi tơnêi châ ngăn, châ hlo tơdroăng mơhno túa lĕm tro dêi kơpong kong ngo, ngăn châ ‘nâi túa lĕm tro mâu hdroâng kuăn ngo: Thái, Mông, Hà Nhì, Dao; hlo tơdroăng pro xối mơdĭng Tằng Cẩu dêi kuăn ngo Thái - Sơn La ƀă mâu tơdroăng mơhno, tơbleăng ‘na túa lĕm tro, ôm hyô, tê mơdró tơmeăm pê lo ing chiâk deăng dêi kong pơlê Điện Biên, Sơn La.