Veăng tung rôh tơbleăng túa lĕm tro kế kâ mâu hdroâng kuăn ngo kơpong Tây Nguyên ai mâu ngê̆ nhân dêi 4/5 to kong pơlê mê cho: Kon Tum, Gia Lai, Dak Lak ƀă Lâm Đồng. Ƀă tơdroăng ki pế pơchên kế kâ tiô khôi hmâ, mâu ngê̆ nhân dêi 4 khu hiăng tơbleăng pế pơchên xêh mâu kế kâ khôi hmâ, mâu khâu ngê̆ nhân dêi 4 khu hiăng tơbleăng mâu kế kâ, tơmeăm ôu ki kơhiâm dêi hdroâng kuăn ngo tơná.

Bă lối 10 túa kế kâ ‘măn a kơƀeăng, kuăn pơlê ƀă tơmối hiăng châ kâ mâu kế kâ tiô khôi hmâ dêi mơngế K’Ho a kong pơlê Lâm Đồng pơtối mê cho kế kâ dêi Jêh - Triêng a kong pơlê Kon Tum. Ki lĕm má môi mâu kế kâ kố pơrá châ pế pơchên ing kơpeăng kŏng dêi mâu ngê̆ nhân hbrâ rơnáu krâu khât ƀă ki hên mâu kế kâ kố ai xiâm kối sap ing tung kong.

Pakĭng mâu kế kâ, têa ôu khôi hmâ, môi tiah tơxông prông, í poh, drôu xiâm ƀă hên ki ê ối ai mâu khu ngê̆ nhân ối tơbleăng mâu kế kâ ki nếo châ pế pơchên ing mâu kế tơmeăm OCOP xua tơná kuăn pơlê pêi mơjiâng ing mâu thôn pơlê.