Rôh leh hơnăm kố ton 4 hâi, kong prâi tôu lĕm, rơngiâp. Kố cho rôh ki tơ’lêi hlâu vâ tơmối ôm hyô troh Khánh Hòa ôm hyô, ối pơtê. Tiô Khu ngăn Túa lĕm tro, Tơ’noăng ivá ƀă Ôm hyô kong pơlê, tung lâp kong pơlê tơdah vâ chê 908 rơpâu ngế tơmối, tâk lối 10% tâng vâ pơchông ƀă khế kố hơnăm nah.

Tung kơxô̆ tơmối troh a Khánh Hòa, lối môi kơpêng 4 cho tơmối ối pơtê, tơmối kong têa ê tâk vâ chê tơdế tâng vâ pơchông ƀă hơnăm hdrối. Mâu veăng ối pơtê châ vâi kok châ vâ chê 80%. Ƀă kơxô̆ liăn châ xo vâ chê 1 rơpâu rơtal sap ing ôm hyô tâk lối 25% tâng vâ pơchông ƀă hơnăm hdrối, Khánh Hòa pơtối tối rơdêi ivá tơ’mot dêi tíu troh têa kơxĭ xiâm tung lâp tơnêi têa. ‘măn chôu hên tơdroăng ki lĕm ro tung hiâm mơno tơmối tung rôh leh. Kố cho tơdroăng ki ro, ăm hlo ki mơnhông ôm hyô dêi Khánh Hòa - Ninh Thuận drêng tơrŭm.